49 shlokas
- 1
मत्स्य उवाच
तथैवान्यत्प्रवक्ष्यामि सर्वकामफलप्रदम्
सौभाग्यशयनं नाम यत्पुराणविदो विदुः
matsya uvāca
tathaivānyatpravakṣyāmi sarvakāmaphalapradam
saubhāgyaśayanaṃ nāma yatpurāṇavido viduḥ
- 2
पुरा दग्धेषु लोकेषु भूर्भुवःस्वर्महादिषु
सौभाग्यं सर्वभूतानामेकस्थमभवत्तदा
वैकुण्ठं स्वर्गमासाद्य विष्णोर्वक्षःस्थलस्थितम्
purā dagdheṣu lokeṣu bhūrbhuvaḥsvarmahādiṣu
saubhāgyaṃ sarvabhūtānāmekasthamabhavattadā
vaikuṇṭhaṃ svargamāsādya viṣṇorvakṣaḥsthalasthitam
- 3
ततः कालेन महता पुनः सर्गविधौ नृप
अहंकारावृते लोके प्रधानपुरुषान्विते
tataḥ kālena mahatā punaḥ sargavidhau nṛpa
ahaṃkārāvṛte loke pradhānapuruṣānvite
- 4
स्पर्धायां च प्रवृत्तायां कमलासनकृष्णयोः
लिङ्गाकारा समुद्भूता वह्नेर्ज्वालातिभीषणा
तयाभितप्तस्य हरेर्वक्षसस्तद्विनिःसृतम्
spardhāyāṃ ca pravṛttāyāṃ kamalāsanakṛṣṇayoḥ
liṅgākārā samudbhūtā vahnerjvālātibhīṣaṇā
tayābhitaptasya harervakṣasastadviniḥsṛtam
- 5
वक्षःस्थलं समाश्रित्य विष्णोः सौभाग्यमास्थितम्
रसरूपं ततो यावत्प्राप्नोति वसुधातलम्
vakṣaḥsthalaṃ samāśritya viṣṇoḥ saubhāgyamāsthitam
rasarūpaṃ tato yāvatprāpnoti vasudhātalam
- 6
उत्क्षिप्तमन्तरिक्षे तद्ब्रह्मपुत्रेण धीमता
दक्षेण पीतमात्रं तद्रूपलावण्यकारकम्
utkṣiptamantarikṣe tadbrahmaputreṇa dhīmatā
dakṣeṇa pītamātraṃ tadrūpalāvaṇyakārakam
- 7
बलं तेजो महज्जातं दक्षस्य परमेष्ठिनः
शेषं यदपतद्भूमावष्टधा समजायत
balaṃ tejo mahajjātaṃ dakṣasya parameṣṭhinaḥ
śeṣaṃ yadapatadbhūmāvaṣṭadhā samajāyata
- 8
ततो जनानां संजाताः सप्त सौभाग्यदायिकाः
इक्षवो रसराजाश्च निष्पावाजाजिधान्यकम्
tato janānāṃ saṃjātāḥ sapta saubhāgyadāyikāḥ
ikṣavo rasarājāśca niṣpāvājājidhānyakam
- 9
विकारवच्च गोक्षीरं कुसुम्भं कुङ्कुमं तथा
लवणं चाष्टमं तद्वत्सौभाग्याष्टकमुच्यते
vikāravacca gokṣīraṃ kusumbhaṃ kuṅkumaṃ tathā
lavaṇaṃ cāṣṭamaṃ tadvatsaubhāgyāṣṭakamucyate
- 10
पीतं यद्ब्रह्मपुत्रेण योगज्ञानविदा पुनः
दुहिता साभवत्तस्य या सतीत्यभिधीयते
pītaṃ yadbrahmaputreṇa yogajñānavidā punaḥ
duhitā sābhavattasya yā satītyabhidhīyate
- 11
लोकानतीत्य लालित्याल्ललिता तेन चोच्यते
त्रैलोक्यसुन्दरीम् एनाम् उपयेमे पिनाकधृक्
lokānatītya lālityāllalitā tena cocyate
trailokyasundarīm enām upayeme pinākadhṛk
- 12
या देवी सौभाग्यमयी भुक्तिमुक्तिफलप्रदा
तामाराध्य पुमान्भक्त्या नारी वा किं न विन्दति
yā devī saubhāgyamayī bhuktimuktiphalapradā
tāmārādhya pumānbhaktyā nārī vā kiṃ na vindati
- 13
मनुरुवाच
कथमाराधनं तस्या जगद्धात्र्या जनार्दन
तद्विधानं जगन्नाथ तत्सर्वं च वदस्व मे
manuruvāca
kathamārādhanaṃ tasyā jagaddhātryā janārdana
tadvidhānaṃ jagannātha tatsarvaṃ ca vadasva me
- 14
मत्स्य उवाच
वसन्तमासमासाद्य तृतीयायां जनप्रिय
शुक्लपक्षस्य पूर्वाह्णे तिलैः स्नानं समाचरेत्
matsya uvāca
vasantamāsamāsādya tṛtīyāyāṃ janapriya
śuklapakṣasya pūrvāhṇe tilaiḥ snānaṃ samācaret
- 15
तस्मिन्नहनि सा देवी किल विश्वात्मना सती
पाणिग्रहणकैर्मन्त्रैरुदूढा वरवर्णिनी
tasminnahani sā devī kila viśvātmanā satī
pāṇigrahaṇakairmantrairudūḍhā varavarṇinī
- 16
तया सहैव देवेशं तृतीयायाम् अथार्चयेत्
फलैर्नानाविधैर्धूपैर्दीपनैवेद्यसंयुतैः
tayā sahaiva deveśaṃ tṛtīyāyām athārcayet
phalairnānāvidhairdhūpairdīpanaivedyasaṃyutaiḥ
- 17
प्रतिमां पञ्चगव्येन तथा गन्धोदकेन तु
स्नापयित्वार्चयेद्गौरीम् इन्दुशेखरसंयुताम्
pratimāṃ pañcagavyena tathā gandhodakena tu
snāpayitvārcayedgaurīm induśekharasaṃyutām
- 18
नमोऽस्तु पाटलायै तु पादौ देव्याः शिवस्य तु
शिवायेति च संकीर्य जयायै गुल्फयोर्द्वयोः
namo'stu pāṭalāyai tu pādau devyāḥ śivasya tu
śivāyeti ca saṃkīrya jayāyai gulphayordvayoḥ
- 19
त्रिगुणायेति रुद्राय भवान्यै जङ्घयोर्युगम्
शिवां रुद्रेश्वरायै च विजयायेति जानुनी
संकीर्त्य हरिकेशाय तथोरू वरदे नमः
triguṇāyeti rudrāya bhavānyai jaṅghayoryugam
śivāṃ rudreśvarāyai ca vijayāyeti jānunī
saṃkīrtya harikeśāya tathorū varade namaḥ
- 20
ईशायै च कीटं देव्याः शंकरायेति शंकरम्
कुक्षिद्वयं च कोटव्यै शूलिने शूलपाणये
īśāyai ca kīṭaṃ devyāḥ śaṃkarāyeti śaṃkaram
kukṣidvayaṃ ca koṭavyai śūline śūlapāṇaye
- 21
मङ्गलायै नमस्तुभ्यमुदरं चाभिपूजयेत्
सर्वात्मने नमो रुद्रमीशान्यै च कुचद्वयम्
maṅgalāyai namastubhyamudaraṃ cābhipūjayet
sarvātmane namo rudramīśānyai ca kucadvayam
- 22
शिवं वेदात्मने तद्वद्रुद्राण्यै कण्ठमर्चयेत्
त्रिपुरघ्नाय विश्वेशमनन्तायै करद्वयम्
śivaṃ vedātmane tadvadrudrāṇyai kaṇṭhamarcayet
tripuraghnāya viśveśamanantāyai karadvayam
- 23
त्रिलोचनाय च हरं बाहू कालानलप्रिये
सौभाग्यभवनायेति भूषणानि सदार्चयेत्
स्वाहास्वधायै च मुखमीश्वरायेति शूलिनम्
trilocanāya ca haraṃ bāhū kālānalapriye
saubhāgyabhavanāyeti bhūṣaṇāni sadārcayet
svāhāsvadhāyai ca mukhamīśvarāyeti śūlinam
- 24
अशोकमधुवासिन्यै पूज्यावोष्ठौ च भूतिदौ
स्थाणवे तु हरं तद्वद्धास्यं चन्द्रमुखप्रिये
aśokamadhuvāsinyai pūjyāvoṣṭhau ca bhūtidau
sthāṇave tu haraṃ tadvaddhāsyaṃ candramukhapriye
- 25
नमोऽर्धनारीशहरमसिताङ्गीति नासिकाम्
नम उग्राय लोकेशं ललितेति पुनर्भ्रुवौ
namo'rdhanārīśaharamasitāṅgīti nāsikām
nama ugrāya lokeśaṃ laliteti punarbhruvau
- 26
शर्वाय पुरहन्तारं वासव्यै तु तथालकान्
नमः श्रीकण्ठनाथायै शिवकेशांस्ततोऽर्चयेत्
भीमोग्रसमरूपिण्यै शिरः सर्वात्मने नमः
śarvāya purahantāraṃ vāsavyai tu tathālakān
namaḥ śrīkaṇṭhanāthāyai śivakeśāṃstato'rcayet
bhīmograsamarūpiṇyai śiraḥ sarvātmane namaḥ
- 27
शिवमभ्यर्च्य विधिवत्सौभाग्याष्टकमग्रतः
स्थापयेद्धृतनिष्पावकुसुम्भक्षीरजीरकम्
śivamabhyarcya vidhivatsaubhāgyāṣṭakamagrataḥ
sthāpayeddhṛtaniṣpāvakusumbhakṣīrajīrakam
- 28
रसराजं च लवणं कुस्तुम्बुरु तथाष्टकम्
दत्तं सौभाग्यमित्यस्मात्सौभाग्याष्टकमित्यतः
rasarājaṃ ca lavaṇaṃ kustumburu tathāṣṭakam
dattaṃ saubhāgyamityasmātsaubhāgyāṣṭakamityataḥ
- 29
एवं निवेद्य तत्सर्वमग्रतः शिवयोः पुनः
रात्रौ शृङ्गोदकं प्राश्य तद्वद्भूमावरिंदम
evaṃ nivedya tatsarvamagrataḥ śivayoḥ punaḥ
rātrau śṛṅgodakaṃ prāśya tadvadbhūmāvariṃdama
- 30
पुनः प्रभाते तु तथा कृतस्नानजपः शुचिः
संपूज्य द्विजदाम्पत्यं वस्त्रमाल्यविभूषणैः
punaḥ prabhāte tu tathā kṛtasnānajapaḥ śuciḥ
saṃpūjya dvijadāmpatyaṃ vastramālyavibhūṣaṇaiḥ

