39 shlokas
- 1
मनुरुवाच
सौभाग्यारोग्यफलदममुत्राक्षय्यकारकम्
भुक्तिमुक्तिप्रदं देव तन्मे ब्रूहि जनार्दन
manuruvāca
saubhāgyārogyaphaladamamutrākṣayyakārakam
bhuktimuktipradaṃ deva tanme brūhi janārdana
- 2
मत्स्य उवाच
यदुमायाः पुरा देव उवाच पुरसूदनः
कैलासशिखरासीनो देव्या पृष्टस्तदा किल
matsya uvāca
yadumāyāḥ purā deva uvāca purasūdanaḥ
kailāsaśikharāsīno devyā pṛṣṭastadā kila
- 3
कथासु सम्प्रवृत्तासु धर्म्यासु ललितासु च
तदिदानीं प्रवक्ष्यामि भुक्तिमुक्तिफलप्रदम्
kathāsu sampravṛttāsu dharmyāsu lalitāsu ca
tadidānīṃ pravakṣyāmi bhuktimuktiphalapradam
- 4
ईश्वर उवाच
शृणुष्वावहिता देवि तथैवानन्तपुण्यकृत्
नराणामथ नारीणामाराधनमनुत्तमम्
īśvara uvāca
śṛṇuṣvāvahitā devi tathaivānantapuṇyakṛt
narāṇāmatha nārīṇāmārādhanamanuttamam
- 5
नभस्ये वाथ वैशाखे पुण्यमार्गशिरस्य च
शुक्लपक्षे तृतीयायां सुस्नातो गौरसर्षपैः
nabhasye vātha vaiśākhe puṇyamārgaśirasya ca
śuklapakṣe tṛtīyāyāṃ susnāto gaurasarṣapaiḥ
- 6
गोरोचनं सगोमूत्रमुष्णं गोशकृतं तथा
दधिचन्दनसम्मिश्रं ललाटे तिलकं न्यसेत्
सौभाग्यारोग्यदं यस्मात्सदा च ललिताप्रियम्
gorocanaṃ sagomūtramuṣṇaṃ gośakṛtaṃ tathā
dadhicandanasammiśraṃ lalāṭe tilakaṃ nyaset
saubhāgyārogyadaṃ yasmātsadā ca lalitāpriyam
- 7
प्रतिपक्षं तृतीयासु पुमानापीतवाससी
धारयेदथ रक्तानि नारी चेदथ संयता
pratipakṣaṃ tṛtīyāsu pumānāpītavāsasī
dhārayedatha raktāni nārī cedatha saṃyatā
- 8
विधवा धातुरक्तानि कुमारी शुक्लवाससी
देवीं तु पञ्चगव्येन ततः क्षीरेण केवलम्
स्नापयेन्मधुना तद्वत्पुष्पगन्धोदकेन च
vidhavā dhāturaktāni kumārī śuklavāsasī
devīṃ tu pañcagavyena tataḥ kṣīreṇa kevalam
snāpayenmadhunā tadvatpuṣpagandhodakena ca
- 9
पूजयेच्छुक्लपुष्पैश्च फलैर्नानाविधैरपि
धान्यकाजाजिलवणैर्गुडक्षीरघृतान्वितैः
pūjayecchuklapuṣpaiśca phalairnānāvidhairapi
dhānyakājājilavaṇairguḍakṣīraghṛtānvitaiḥ
- 10
शुक्लाक्षततिलैर् अर्च्यां ततो देवीं सदार्चयेत्
पादाद्यभ्यर्चनं कुर्यात्प्रतिपक्षं वरानने
śuklākṣatatilair arcyāṃ tato devīṃ sadārcayet
pādādyabhyarcanaṃ kuryātpratipakṣaṃ varānane
- 11
वरदायै नमः पादौ तथा गुल्फौ नमः श्रियै
अशोकायै नमो जङ्घे पार्वत्यै जानुनी तथा
varadāyai namaḥ pādau tathā gulphau namaḥ śriyai
aśokāyai namo jaṅghe pārvatyai jānunī tathā
- 12
ऊरू मङ्गलकारिण्यै वामदेव्यै तथा कटिम्
पद्मोदरायै जठरमुरः कामश्रियै नमः
ūrū maṅgalakāriṇyai vāmadevyai tathā kaṭim
padmodarāyai jaṭharamuraḥ kāmaśriyai namaḥ
- 13
करौ सौभाग्यदायिन्यै बाहू हरमुखश्रियै
मुखं दर्पणवासिन्यै स्मरदायै स्मितं नमः
karau saubhāgyadāyinyai bāhū haramukhaśriyai
mukhaṃ darpaṇavāsinyai smaradāyai smitaṃ namaḥ
- 14
गौर्यै नमस्तथा नासामुत्पलायै च लोचने
तुष्ट्यै ललाटमलकान्कात्यायन्यै शिरस्तथा
gauryai namastathā nāsāmutpalāyai ca locane
tuṣṭyai lalāṭamalakānkātyāyanyai śirastathā
- 15
नमो गौर्यै नमो धिष्ण्यै नमः कान्त्यै नमः श्रियै
रम्भायै ललितायै च वासुदेव्यै नमो नमः
namo gauryai namo dhiṣṇyai namaḥ kāntyai namaḥ śriyai
rambhāyai lalitāyai ca vāsudevyai namo namaḥ
- 16
एवं सम्पूज्य विधिवदग्रतः पद्ममालिखेत्
पत्त्रैर्द्वादशभिर्युक्तं कुङ्कुमेन सकर्णिकम्
evaṃ sampūjya vidhivadagrataḥ padmamālikhet
pattrairdvādaśabhiryuktaṃ kuṅkumena sakarṇikam
- 17
पूर्वेण विन्यसेद्गौरीमपर्णां च ततः परम्
भवानीं दक्षिणे तद्वद्रुद्राणीं च ततः परम्
pūrveṇa vinyasedgaurīmaparṇāṃ ca tataḥ param
bhavānīṃ dakṣiṇe tadvadrudrāṇīṃ ca tataḥ param
- 18
विन्यसेत्पश्चिमे सौम्यां सदा मदनवासिनीम्
वायव्ये पाटलामुग्रामन्तरेण ततोऽप्युमाम्
vinyasetpaścime saumyāṃ sadā madanavāsinīm
vāyavye pāṭalāmugrāmantareṇa tato'pyumām
- 19
मध्ये यथास्वं मांसाङ्गां मङ्गलां कुमुदां सतीम्
रुद्रं च मध्ये संस्थाप्य ललितां कर्णिकोपरि
कुसुमैरक्षतैर्वार्भिर्नमस्कारेण विन्यसेत्
madhye yathāsvaṃ māṃsāṅgāṃ maṅgalāṃ kumudāṃ satīm
rudraṃ ca madhye saṃsthāpya lalitāṃ karṇikopari
kusumairakṣatairvārbhirnamaskāreṇa vinyaset
- 20
गीतमङ्गलनिर्घोषान्कारयित्वा सुवासिनीः
पूजयेद्रक्तवासोभी रक्तमाल्यानुलेपनैः
सिन्दूरं स्नानचूर्णं च तासां शिरसि पातयेत्
gītamaṅgalanirghoṣānkārayitvā suvāsinīḥ
pūjayedraktavāsobhī raktamālyānulepanaiḥ
sindūraṃ snānacūrṇaṃ ca tāsāṃ śirasi pātayet
- 21
सिन्दूरकुङ्कुमस्नानमतीवेष्टतमं यतः
तथोपदेष्टारमपि पूजयेद्यत्नतो गुरुम्
न पूज्यते गुरुर्यत्र सर्वास्तत्राफलाः क्रियाः
sindūrakuṅkumasnānamatīveṣṭatamaṃ yataḥ
tathopadeṣṭāramapi pūjayedyatnato gurum
na pūjyate gururyatra sarvāstatrāphalāḥ kriyāḥ
- 22
नभस्ये पूजयेद्गौरीम् उत्पलैरसितैः सदा
बन्धुजीवैराश्वयुजे कार्त्तिके शतपत्त्रकैः
nabhasye pūjayedgaurīm utpalairasitaiḥ sadā
bandhujīvairāśvayuje kārttike śatapattrakaiḥ
- 23
जातीपुष्पैर्मार्गशीर्षे पौषे पीतैः कुरण्टकैः
कुन्दकुङ्कुमपुष्पैस्तु देवीं माघे तु पूजयेत्
सिन्दुवारेण जात्या वा फाल्गुनेऽप्यर्चयेदुमाम्
jātīpuṣpairmārgaśīrṣe pauṣe pītaiḥ kuraṇṭakaiḥ
kundakuṅkumapuṣpaistu devīṃ māghe tu pūjayet
sinduvāreṇa jātyā vā phālgune'pyarcayedumām
- 24
चैत्रे तु मल्लिकाशोकैर्वैशाखे गन्धपाटलैः
ज्येष्ठे कमलमन्दारैराषाढे च नवाम्बुजैः
कदम्बैरथ मालत्या श्रावणे पूजयेत्सदा
caitre tu mallikāśokairvaiśākhe gandhapāṭalaiḥ
jyeṣṭhe kamalamandārairāṣāḍhe ca navāmbujaiḥ
kadambairatha mālatyā śrāvaṇe pūjayetsadā
- 25
गोमूत्रं गोमयं क्षीरं दधि सर्पिः कुशोदकम्
बिल्वपत्त्रार्कपुष्पं च यवान्गोशृङ्गवारि च
gomūtraṃ gomayaṃ kṣīraṃ dadhi sarpiḥ kuśodakam
bilvapattrārkapuṣpaṃ ca yavāngośṛṅgavāri ca
- 26
पञ्चगव्यं च बिल्वं च प्राशयेत्क्रमशस्तदा
एतद्भाद्रपदाद्यं तु प्राशनं समुदाहृतम्
pañcagavyaṃ ca bilvaṃ ca prāśayetkramaśastadā
etadbhādrapadādyaṃ tu prāśanaṃ samudāhṛtam
- 27
प्रतिपक्षं च मिथुनं तृतीयायां वरानने
पूजयित्वार्चयेद्भक्त्या वस्त्रमाल्यानुलेपनैः
pratipakṣaṃ ca mithunaṃ tṛtīyāyāṃ varānane
pūjayitvārcayedbhaktyā vastramālyānulepanaiḥ
- 28
पुंसः पीताम्बरे दद्यात्स्त्रियै कौसुम्भवाससी
निष्पावाजाजिलवणम् इक्षुदण्डगुडान्वितम्
तस्यै दद्यात्फलं पुष्पं सुवर्णोत्पलसंयुतम्
puṃsaḥ pītāmbare dadyātstriyai kausumbhavāsasī
niṣpāvājājilavaṇam ikṣudaṇḍaguḍānvitam
tasyai dadyātphalaṃ puṣpaṃ suvarṇotpalasaṃyutam
- 29
यथा न देवि देवेशस्त्वां परित्यज्य गच्छति
तथा माम् उद्धराशेषदुःखसंसारसागरात्
yathā na devi deveśastvāṃ parityajya gacchati
tathā mām uddharāśeṣaduḥkhasaṃsārasāgarāt
- 30
कुमुदा विमलानन्ता भवानी च सुधा शिवा
ललिता कमला गौरी सती रम्भाथ पार्वती
kumudā vimalānantā bhavānī ca sudhā śivā
lalitā kamalā gaurī satī rambhātha pārvatī

