28 shlokas
- 1
ईश्वर उवाच
तथैवान्यां प्रवक्ष्यामि तृतीयां पापनाशिनीम्
नाम्ना च लोके विख्याताम् आर्द्रानन्दकरीमिमाम्
īśvara uvāca
tathaivānyāṃ pravakṣyāmi tṛtīyāṃ pāpanāśinīm
nāmnā ca loke vikhyātām ārdrānandakarīmimām
- 2
यदा शुक्लतृतीयायामाषाढर्क्षं भवेत्क्वचित्
ब्रह्मर्क्षं वा मृगर्क्षं वा हस्तो मूलमथापि वा
दर्भगन्धोदकैः स्नानं तदा सम्यक्समाचरेत्
yadā śuklatṛtīyāyāmāṣāḍharkṣaṃ bhavetkvacit
brahmarkṣaṃ vā mṛgarkṣaṃ vā hasto mūlamathāpi vā
darbhagandhodakaiḥ snānaṃ tadā samyaksamācaret
- 3
शुक्लमाल्याम्बरधरः शुक्लगन्धानुलेपनः
भवानीमर्चयेद्भक्त्या शुक्लपुष्पैः सुगन्धिभिः
महादेवेन सहितामुपविष्टां महासने
śuklamālyāmbaradharaḥ śuklagandhānulepanaḥ
bhavānīmarcayedbhaktyā śuklapuṣpaiḥ sugandhibhiḥ
mahādevena sahitāmupaviṣṭāṃ mahāsane
- 4
वासुदेव्यै नमः पादौ शंकराय नमो हरम्
जङ्घे शोकविनाशिन्यै आनन्दाय नमः प्रभो
vāsudevyai namaḥ pādau śaṃkarāya namo haram
jaṅghe śokavināśinyai ānandāya namaḥ prabho
- 5
रम्भायै पूजयेदूरू शिवाय च पिनाकिनः
अदित्यै च कटिं देव्याः शूलिनः शूलपाणये
rambhāyai pūjayedūrū śivāya ca pinākinaḥ
adityai ca kaṭiṃ devyāḥ śūlinaḥ śūlapāṇaye
- 6
माधव्यै च तथा नाभिमथ शम्भोर्भवाय च
स्तनावानन्दकारिण्यै शंकरस्येन्दुधारिणे
mādhavyai ca tathā nābhimatha śambhorbhavāya ca
stanāvānandakāriṇyai śaṃkarasyendudhāriṇe
- 7
उत्कण्ठिन्यै नमः कण्ठं नीलकण्ठाय वै हरम्
करावुत्पलधारिण्यै रुद्राय च जगत्पते
बाहू च परिरम्भिण्यै त्रिशूलाय हरस्य च
utkaṇṭhinyai namaḥ kaṇṭhaṃ nīlakaṇṭhāya vai haram
karāvutpaladhāriṇyai rudrāya ca jagatpate
bāhū ca parirambhiṇyai triśūlāya harasya ca
- 8
देव्या मुखं विलासिन्यै वृषेशाय पुनर्विभोः
स्मितं सस्मेरलीलायै विश्ववक्त्राय वै विभो
devyā mukhaṃ vilāsinyai vṛṣeśāya punarvibhoḥ
smitaṃ sasmeralīlāyai viśvavaktrāya vai vibho
- 9
नेत्रे मदनवासिन्यै विश्वधाम्ने त्रिशूलिनः
भ्रुवौ नृत्यप्रियायै तु ताण्डवेशाय शूलिनः
netre madanavāsinyai viśvadhāmne triśūlinaḥ
bhruvau nṛtyapriyāyai tu tāṇḍaveśāya śūlinaḥ
- 10
देव्या ललाटमिन्द्राण्यै हव्यवाहाय वै विभोः
स्वाहायै मुकुटं देव्या विभोर्गङ्गाधराय वै
devyā lalāṭamindrāṇyai havyavāhāya vai vibhoḥ
svāhāyai mukuṭaṃ devyā vibhorgaṅgādharāya vai
- 11
विश्वकायौ विश्वमुखौ विश्वपादकरौ शिवौ
प्रसन्नवदनौ वन्दे पार्वतीपरमेश्वरौ
viśvakāyau viśvamukhau viśvapādakarau śivau
prasannavadanau vande pārvatīparameśvarau
- 12
एवं सम्पूज्य विधिवदग्रतः शिवयोः पुनः
पद्मोत्पलानि रजसा नानावर्णेन कारयेत्
evaṃ sampūjya vidhivadagrataḥ śivayoḥ punaḥ
padmotpalāni rajasā nānāvarṇena kārayet
- 13
शङ्खचक्रे सकटके स्वस्तिकाङ्कुशचामरान्
यावन्तः पांसवस्तत्र रजसः पतिता भुवि
तावद्वर्षसहस्राणि शिवलोके महीयते
śaṅkhacakre sakaṭake svastikāṅkuśacāmarān
yāvantaḥ pāṃsavastatra rajasaḥ patitā bhuvi
tāvadvarṣasahasrāṇi śivaloke mahīyate
- 14
चत्वारि घृतपात्राणि सहिरण्यानि शक्तितः
दत्त्वा द्विजाय करकमुदकान्नसमन्वितम्
प्रतिपक्षं चतुर्मासं यावदेतन्निवेदयेत्
catvāri ghṛtapātrāṇi sahiraṇyāni śaktitaḥ
dattvā dvijāya karakamudakānnasamanvitam
pratipakṣaṃ caturmāsaṃ yāvadetannivedayet
- 15
ततस्तु चतुरो मासान्पूर्ववत्करकोपरि
चत्वारि सक्तुपात्राणि तिलपात्राण्यतः परम्
tatastu caturo māsānpūrvavatkarakopari
catvāri saktupātrāṇi tilapātrāṇyataḥ param
- 16
गन्धोदकं पुष्पवारि चन्दनं कुङ्कुमोदकम्
अपक्वं दधि दुग्धं च गोशृङ्गोदकमेव च
gandhodakaṃ puṣpavāri candanaṃ kuṅkumodakam
apakvaṃ dadhi dugdhaṃ ca gośṛṅgodakameva ca
- 17
पिष्टोदकं तथा वारि कुष्ठचूर्णान्वितं पुनः
उशीरसलिलं तद्वद्यवचूर्णोदकं पुनः
piṣṭodakaṃ tathā vāri kuṣṭhacūrṇānvitaṃ punaḥ
uśīrasalilaṃ tadvadyavacūrṇodakaṃ punaḥ
- 18
तिलोदकं च संप्राश्य स्वपेन्मार्गशिरादिषु
मासेषु पक्षद्वितयं प्राशनं समुदाहृतम्
tilodakaṃ ca saṃprāśya svapenmārgaśirādiṣu
māseṣu pakṣadvitayaṃ prāśanaṃ samudāhṛtam
- 19
सर्वत्र शुक्लपुष्पाणि प्रशस्तानि सदार्चने
दानकाले च सर्वत्र मन्त्रमेतमुदीरयेत्
sarvatra śuklapuṣpāṇi praśastāni sadārcane
dānakāle ca sarvatra mantrametamudīrayet
- 20
गौरी मे प्रीयतां नित्यमघनाशाय मङ्गला
सौभाग्यायास्तु ललिता भवानी सर्वसिद्धये
gaurī me prīyatāṃ nityamaghanāśāya maṅgalā
saubhāgyāyāstu lalitā bhavānī sarvasiddhaye
- 21
संवत्सरान्ते लवणं गुडकुम्भं च सर्जिकाम्
चन्दनं नेत्रपट्टं च सहिरण्याम्बुजेन तु
saṃvatsarānte lavaṇaṃ guḍakumbhaṃ ca sarjikām
candanaṃ netrapaṭṭaṃ ca sahiraṇyāmbujena tu
- 22
उमामहेश्वरं हैमं तद्वदिक्षुफलैर्युतम्
सतूलावरणां शय्यां सविश्रामां निवेदयेत्
सपत्नीकाय विप्राय गौरी मे प्रीयतामिति
umāmaheśvaraṃ haimaṃ tadvadikṣuphalairyutam
satūlāvaraṇāṃ śayyāṃ saviśrāmāṃ nivedayet
sapatnīkāya viprāya gaurī me prīyatāmiti
- 23
आर्द्रानन्दकरी नाम्ना तृतीयैषा सनातनी
यामुपोष्य नरो याति शम्भोर्यत्परमं पदम्
ārdrānandakarī nāmnā tṛtīyaiṣā sanātanī
yāmupoṣya naro yāti śambhoryatparamaṃ padam
- 24
इह लोके सदानन्दमाप्नोति धनसम्पदः
आयुरारोग्यसम्पत्त्या न कश्चिच्छोकमाप्नुयात्
iha loke sadānandamāpnoti dhanasampadaḥ
āyurārogyasampattyā na kaścicchokamāpnuyāt
- 25
नारी वा कुरुते या तु कुमारी विधवा च या
सापि तत्फलमाप्नोति देव्यनुग्रहलालिता
nārī vā kurute yā tu kumārī vidhavā ca yā
sāpi tatphalamāpnoti devyanugrahalālitā
- 26
प्रतिपक्षमुपोष्यैवं मन्त्रार्चनविधानवित्
रुद्राणीलोकमभ्येति पुनरावृत्तिदुर्लभम्
pratipakṣamupoṣyaivaṃ mantrārcanavidhānavit
rudrāṇīlokamabhyeti punarāvṛttidurlabham
- 27
य इदं शृणुयान्नित्यं श्रावयेद्वापि मानवः
शक्रलोके स गन्धर्वैः पूज्यतेऽपि युगत्रयम्
ya idaṃ śṛṇuyānnityaṃ śrāvayedvāpi mānavaḥ
śakraloke sa gandharvaiḥ pūjyate'pi yugatrayam
- 28
आनन्ददां सकलदुःखहरां तृतीयां या स्त्री करोत्यविधवा विधवाथ वापि
सा स्वे गृहे सुखशतान्यनुभूय भूयो गौरीपदं सदयिता दयिता प्रयाति
ānandadāṃ sakaladuḥkhaharāṃ tṛtīyāṃ yā strī karotyavidhavā vidhavātha vāpi
sā sve gṛhe sukhaśatānyanubhūya bhūyo gaurīpadaṃ sadayitā dayitā prayāti

