42 shlokas
- 1
नारद उवाच
किमुद्वेगाद्भुते कृत्यमलक्ष्मीः केन हन्यते
मृतवत्साभिषेकादिकार्येषु च किमिष्यते
nārada uvāca
kimudvegādbhute kṛtyamalakṣmīḥ kena hanyate
mṛtavatsābhiṣekādikāryeṣu ca kimiṣyate
- 2
श्रीभगवानुवाच
पुरा कृतानि पापानि फलन्त्यस्मिंस्तपोधन
रोगदौर्गत्यरूपेण तथैवेष्टवधेन च
śrībhagavānuvāca
purā kṛtāni pāpāni phalantyasmiṃstapodhana
rogadaurgatyarūpeṇa tathaiveṣṭavadhena ca
- 3
तद्विघाताय वक्ष्यामि सदा कल्पाणकारकम्
सप्तमीस्नपनं नाम जनपीडाविनाशनम्
tadvighātāya vakṣyāmi sadā kalpāṇakārakam
saptamīsnapanaṃ nāma janapīḍāvināśanam
- 4
बालानां मरणं यत्र क्षीरपाणां प्रदृश्यते
तद्वद्वृद्धातुराणां च यौवने चापि वर्तताम्
bālānāṃ maraṇaṃ yatra kṣīrapāṇāṃ pradṛśyate
tadvadvṛddhāturāṇāṃ ca yauvane cāpi vartatām
- 5
शान्तये तत्र वक्ष्यामि मृतवत्साभिषेचनम्
एतद् एवाद्भुतोद्वेगचित्तभ्रमविनाशनम्
śāntaye tatra vakṣyāmi mṛtavatsābhiṣecanam
etad evādbhutodvegacittabhramavināśanam
- 6
भविष्यति च वाराहो यत्र कल्पस्तपोधन
वैवस्वतश्च तत्रापि यदा तु मनुरुत्तमः
bhaviṣyati ca vārāho yatra kalpastapodhana
vaivasvataśca tatrāpi yadā tu manuruttamaḥ
- 7
भविष्यति च तत्रैव पञ्चविंशतिमं यदा
कृतं नाम युगं तत्र हैहयान्वयवर्धनः
भविता नृपतिर्वीरः कृतवीर्यः प्रतापवान्
bhaviṣyati ca tatraiva pañcaviṃśatimaṃ yadā
kṛtaṃ nāma yugaṃ tatra haihayānvayavardhanaḥ
bhavitā nṛpatirvīraḥ kṛtavīryaḥ pratāpavān
- 8
स सप्तद्वीपमखिलं पालयिष्यति भूतलम्
यावद्वर्षसहस्राणि सप्तसप्तति नारद
sa saptadvīpamakhilaṃ pālayiṣyati bhūtalam
yāvadvarṣasahasrāṇi saptasaptati nārada
- 9
जातमात्रं च तस्यापि यावत्पुत्रशतं तथा
च्यवनस्य तु शापेन विनाशमपयास्यति
jātamātraṃ ca tasyāpi yāvatputraśataṃ tathā
cyavanasya tu śāpena vināśamapayāsyati
- 10
सहस्रबाहुश्च यदा भविता तस्य वै सुतः
कुरङ्गनयनः श्रीमान्सम्भूतो नृपलक्षणैः
sahasrabāhuśca yadā bhavitā tasya vai sutaḥ
kuraṅganayanaḥ śrīmānsambhūto nṛpalakṣaṇaiḥ
- 11
कृतवीर्यस्तदाराध्य सहस्रांशुं दिवाकरम्
उपवासैर्व्रतैर्दिव्यैर्वेदसूक्तैश्च नारद
पुत्रस्य जीवनायालमेतत्स्नानमवाप्स्यति
kṛtavīryastadārādhya sahasrāṃśuṃ divākaram
upavāsairvratairdivyairvedasūktaiśca nārada
putrasya jīvanāyālametatsnānamavāpsyati
- 12
कृतवीर्येण वै पृष्ट इदं वक्ष्यति भास्करः
अशेषदुष्टशमनं सदा कल्मषनाशनम्
kṛtavīryeṇa vai pṛṣṭa idaṃ vakṣyati bhāskaraḥ
aśeṣaduṣṭaśamanaṃ sadā kalmaṣanāśanam
- 13
सूर्य उवाच
अलं क्लेशेन महता पुत्रस्तव नराधिप
भविष्यति चिरंजीवी किंतु कल्मषनाशनम्
sūrya uvāca
alaṃ kleśena mahatā putrastava narādhipa
bhaviṣyati ciraṃjīvī kiṃtu kalmaṣanāśanam
- 14
सप्तमीस्नपनं वक्ष्ये सर्वलोकहिताय वै
जातस्य मृतवत्सायाः सप्तमे मासि नारद
अथवा शुक्लसप्तम्यामेतत्सर्वं प्रशस्यते
saptamīsnapanaṃ vakṣye sarvalokahitāya vai
jātasya mṛtavatsāyāḥ saptame māsi nārada
athavā śuklasaptamyāmetatsarvaṃ praśasyate
- 15
ग्रहताराबलं लब्ध्वा कृत्वा ब्राह्मणवाचनम्
बालस्य जन्मनक्षत्रं वर्जयेत्तां तिथिं बुधः
तद्वद्वृद्धातुराणां च कृत्यं स्यादितरेषु च
grahatārābalaṃ labdhvā kṛtvā brāhmaṇavācanam
bālasya janmanakṣatraṃ varjayettāṃ tithiṃ budhaḥ
tadvadvṛddhāturāṇāṃ ca kṛtyaṃ syāditareṣu ca
- 16
गोमयेनानुलिप्तायां भूमावेकाग्निवत्तदा
तण्डुलै रक्तशालीयैश्चरुं गोक्षीरसंयुतम्
निर्वपेत्सूर्यरुद्राभ्यां तन्मन्त्राभ्यां विधानतः
gomayenānuliptāyāṃ bhūmāvekāgnivattadā
taṇḍulai raktaśālīyaiścaruṃ gokṣīrasaṃyutam
nirvapetsūryarudrābhyāṃ tanmantrābhyāṃ vidhānataḥ
- 17
कीर्तयेत्सूर्यदेवत्यं सप्तर्चं च घृताहुतीः
जुहुयाद्रुद्रसूक्तेन तद्वद्रुद्राय नारद
kīrtayetsūryadevatyaṃ saptarcaṃ ca ghṛtāhutīḥ
juhuyādrudrasūktena tadvadrudrāya nārada
- 18
होतव्याः समिधश्चात्र तथैवार्कपलाशयोः
यवकृष्णतिलैर्होमः कर्तव्योऽष्टशतं पुनः
hotavyāḥ samidhaścātra tathaivārkapalāśayoḥ
yavakṛṣṇatilairhomaḥ kartavyo'ṣṭaśataṃ punaḥ
- 19
व्याहृतीभिस्तथाज्येन तथैवाष्टशतं पुनः
हुत्वा स्नानं च कर्तव्यं मङ्गलं येन धीमता
vyāhṛtībhistathājyena tathaivāṣṭaśataṃ punaḥ
hutvā snānaṃ ca kartavyaṃ maṅgalaṃ yena dhīmatā
- 20
विप्रेण वेदविदुषा विधिवद्दर्भपाणिना
स्थापयित्वा तु चतुरः कुम्भान्कोणेषु शोभनान्
vipreṇa vedaviduṣā vidhivaddarbhapāṇinā
sthāpayitvā tu caturaḥ kumbhānkoṇeṣu śobhanān
- 21
पञ्चमं च पुनर्मध्ये दध्यक्षतविभूषितम्
स्थापयेदव्रणं कुम्भं सप्तर्चेनाभिमन्त्रितम्
pañcamaṃ ca punarmadhye dadhyakṣatavibhūṣitam
sthāpayedavraṇaṃ kumbhaṃ saptarcenābhimantritam
- 22
सौरेण तीर्थतोयेन पूर्णं रत्नसमन्वितम्
सर्वान्सर्वौषधैर्युक्तान्पञ्चगव्यसमन्वितान्
पञ्चरत्नफलैः पुष्पैर्वासोभिः परिवेष्टयेत्
saureṇa tīrthatoyena pūrṇaṃ ratnasamanvitam
sarvānsarvauṣadhairyuktānpañcagavyasamanvitān
pañcaratnaphalaiḥ puṣpairvāsobhiḥ pariveṣṭayet
- 23
गजाश्वरथ्यावल्मीकात्संगमाद्ध्रदगोकुलात्
संशुद्धां मृदमानीय सर्वेष्वेव विनिक्षिपेत्
gajāśvarathyāvalmīkātsaṃgamāddhradagokulāt
saṃśuddhāṃ mṛdamānīya sarveṣveva vinikṣipet
- 24
चतुर्ष्वपि च कुम्भेषु रत्नगर्भेषु मध्यमम्
गृहीत्वा ब्राह्मणस्तत्र सौरान्मन्त्रानुदीरयेत्
caturṣvapi ca kumbheṣu ratnagarbheṣu madhyamam
gṛhītvā brāhmaṇastatra saurānmantrānudīrayet
- 25
नारीभिः सप्तसंख्याभिर् अव्यङ्गाङ्गीभिर् अत्र च
पूजिताभिर्यथाशक्त्या माल्यवस्त्रविभूषणैः
सविप्राभिश्च कर्तव्यं मृतवत्साभिषेचनम्
nārībhiḥ saptasaṃkhyābhir avyaṅgāṅgībhir atra ca
pūjitābhiryathāśaktyā mālyavastravibhūṣaṇaiḥ
saviprābhiśca kartavyaṃ mṛtavatsābhiṣecanam
- 26
एतेऽभिषेकमन्त्राः
दीर्घायुरस्तु बालोऽयं जीवत्पुत्रा च भामिनी
आदित्यश्चन्द्रमाः सार्धं ग्रहनक्षत्रमण्डलैः
ete'bhiṣekamantrāḥ
dīrghāyurastu bālo'yaṃ jīvatputrā ca bhāminī
ādityaścandramāḥ sārdhaṃ grahanakṣatramaṇḍalaiḥ
- 27
सशक्रा लोकपाला वै ब्रह्मविष्णुमहेश्वराः
ते ते चान्ये च देवौघाः सदा पान्तु कुमारकम्
saśakrā lokapālā vai brahmaviṣṇumaheśvarāḥ
te te cānye ca devaughāḥ sadā pāntu kumārakam
- 28
मित्रः शनिर्वा हुतभुग्ये च बालग्रहाः क्वचित्
पीडां कुर्वन्तु बालस्य मा मातुर्जनकस्य वै
mitraḥ śanirvā hutabhugye ca bālagrahāḥ kvacit
pīḍāṃ kurvantu bālasya mā māturjanakasya vai
- 29
ततः शुक्लाम्बरधरा कुमारपतिसंयुता
सप्तकं पूजयेद्भक्त्या स्त्रीणामथ गुरुं पुनः
tataḥ śuklāmbaradharā kumārapatisaṃyutā
saptakaṃ pūjayedbhaktyā strīṇāmatha guruṃ punaḥ
- 30
काञ्चनीं च ततः कुर्यात्ताम्रपात्रोपरिस्थिताम्
प्रतिमां धर्मराजस्य गुरवे विनिवेदयेत्
kāñcanīṃ ca tataḥ kuryāttāmrapātroparisthitām
pratimāṃ dharmarājasya gurave vinivedayet

