28 shlokas
- 1
मनुरुवाच
किम् अभीष्टवियोगशोकसंघादलम् उद्धर्तुमुपोषणं व्रतं वा
विभवोद्भवकारि भूतलेऽस्मिन्भवभीतेरपि सूदनं च पुंसः
manuruvāca
kim abhīṣṭaviyogaśokasaṃghādalam uddhartumupoṣaṇaṃ vrataṃ vā
vibhavodbhavakāri bhūtale'sminbhavabhīterapi sūdanaṃ ca puṃsaḥ
- 2
मत्स्य उवाच
परिपृष्टमिदं जगत्प्रियं ते विबुधानामपि दुर्लभं महत्त्वात्
तव भक्तिमतस्तथापि वक्ष्ये व्रतमिन्द्रासुरमानवेषु गुह्यम्
matsya uvāca
paripṛṣṭamidaṃ jagatpriyaṃ te vibudhānāmapi durlabhaṃ mahattvāt
tava bhaktimatastathāpi vakṣye vratamindrāsuramānaveṣu guhyam
- 3
पुण्यमाश्वयुजे मासि विशोकद्वादशीव्रतम्
दशम्यां लघुभुग्विद्वानारभेन्नियमेन तु
puṇyamāśvayuje māsi viśokadvādaśīvratam
daśamyāṃ laghubhugvidvānārabhenniyamena tu
- 4
उदङ्मुखः प्राङ्मुखो वा दन्तधावनपूर्वकम्
एकादश्यां निराहारः समभ्यर्च्य तु केशवम्
श्रियं वाभ्यर्च्य विधिवद्भोक्ष्यामि त्वपरेऽहनि
udaṅmukhaḥ prāṅmukho vā dantadhāvanapūrvakam
ekādaśyāṃ nirāhāraḥ samabhyarcya tu keśavam
śriyaṃ vābhyarcya vidhivadbhokṣyāmi tvapare'hani
- 5
एवं नियमकृत्सुप्त्वा प्रातरुत्थाय मानवः
स्नानं सर्वौषधैः कुर्यात्पञ्चगव्यजलेन तु
शुक्लमाल्याम्बरधरः पूजयेच्छ्रीशमुत्पलैः
evaṃ niyamakṛtsuptvā prātarutthāya mānavaḥ
snānaṃ sarvauṣadhaiḥ kuryātpañcagavyajalena tu
śuklamālyāmbaradharaḥ pūjayecchrīśamutpalaiḥ
- 6
विशोकाय नमः पादौ जङ्घे च वरदाय वै
श्रीशाय जानुनी तद्वदूरू च जलशायिने
viśokāya namaḥ pādau jaṅghe ca varadāya vai
śrīśāya jānunī tadvadūrū ca jalaśāyine
- 7
कन्दर्पाय नमो गुह्यं माधवाय नमः कटिम्
दामोदरायेत्युदरं पार्श्वे च विपुलाय वै
kandarpāya namo guhyaṃ mādhavāya namaḥ kaṭim
dāmodarāyetyudaraṃ pārśve ca vipulāya vai
- 8
नाभिं च पद्मनाभाय हृदयं मन्मथाय वै
श्रीधराय विभोर्वक्षः करौ मधुजिते नमः
nābhiṃ ca padmanābhāya hṛdayaṃ manmathāya vai
śrīdharāya vibhorvakṣaḥ karau madhujite namaḥ
- 9
चक्रिणे वामबाहुं च दक्षिणं गदिने नमः
वैकुण्ठाय नमः कण्ठमास्यं यज्ञमुखाय वै
cakriṇe vāmabāhuṃ ca dakṣiṇaṃ gadine namaḥ
vaikuṇṭhāya namaḥ kaṇṭhamāsyaṃ yajñamukhāya vai
- 10
नासामशोकनिधये वासुदेवाय चाक्षिणी
ललाटं वामनायेति हरये च पुनर्भ्रुवौ
nāsāmaśokanidhaye vāsudevāya cākṣiṇī
lalāṭaṃ vāmanāyeti haraye ca punarbhruvau
- 11
अलकान्माधवायेति किरीटं विश्वरूपिणे
नमः सर्वात्मने तद्वच्छिर इत्यभिपूजयेत्
alakānmādhavāyeti kirīṭaṃ viśvarūpiṇe
namaḥ sarvātmane tadvacchira ityabhipūjayet
- 12
एवं सम्पूज्य गोविन्दं फलमाल्यानुलेपनैः
ततस्तु मण्डलं कृत्वा स्थण्डिलं कारयेन्मुदा
evaṃ sampūjya govindaṃ phalamālyānulepanaiḥ
tatastu maṇḍalaṃ kṛtvā sthaṇḍilaṃ kārayenmudā
- 13
चतुरस्रं समन्ताच्च रत्निमात्रमुदक्प्लवम्
श्लक्ष्णं हृद्यं च परितो वप्रत्रयसमावृतम्
caturasraṃ samantācca ratnimātramudakplavam
ślakṣṇaṃ hṛdyaṃ ca parito vapratrayasamāvṛtam
- 14
अङ्गुलेनोच्छ्रिता वप्रास्तद्विस्तारस्तु द्व्यङ्गुलः
स्थण्डिलस्योपरिष्टाच्च भित्तिरष्टाङ्गुला भवेत्
aṅgulenocchritā vaprāstadvistārastu dvyaṅgulaḥ
sthaṇḍilasyopariṣṭācca bhittiraṣṭāṅgulā bhavet
- 15
नदीवालुकया शूर्पे लक्ष्म्याः प्रतिकृतिं न्यसेत्
स्थण्डिले शूर्पमारोप्य लक्ष्मीमित्यर्चयेद्बुधः
nadīvālukayā śūrpe lakṣmyāḥ pratikṛtiṃ nyaset
sthaṇḍile śūrpamāropya lakṣmīmityarcayedbudhaḥ
- 16
नमो देव्यै नमः शान्त्यै नमो लक्ष्म्यै नमः श्रियै
नमः पुष्ट्यै नमस्तुष्ट्यै वृष्ट्यै हृष्ट्यै नमो नमः
namo devyai namaḥ śāntyai namo lakṣmyai namaḥ śriyai
namaḥ puṣṭyai namastuṣṭyai vṛṣṭyai hṛṣṭyai namo namaḥ
- 17
विशोका दुःखनाशाय विशोका वरदास्तु मे
विशोका चास्तु सम्पत्त्यै विशोका सर्वसिद्धये
viśokā duḥkhanāśāya viśokā varadāstu me
viśokā cāstu sampattyai viśokā sarvasiddhaye
- 18
ततः शुक्लाम्बरैः शूर्पं वेष्ट्य सम्पूजयेत्फलैः
वस्त्रैर्नानाविधैस्तद्वत्सुवर्णकमलेन च
tataḥ śuklāmbaraiḥ śūrpaṃ veṣṭya sampūjayetphalaiḥ
vastrairnānāvidhaistadvatsuvarṇakamalena ca
- 19
रजनीषु च सर्वासु पिबेद्दर्भोदकं बुधः
ततस्तु गीतनृत्यादि कारयेत्सकलां निशाम्
rajanīṣu ca sarvāsu pibeddarbhodakaṃ budhaḥ
tatastu gītanṛtyādi kārayetsakalāṃ niśām
- 20
यामत्रये व्यतीते तु सुप्त्वाप्युत्थाय मानवः
अभिगम्य च विप्राणां मिथुनानि तदार्चयेत्
yāmatraye vyatīte tu suptvāpyutthāya mānavaḥ
abhigamya ca viprāṇāṃ mithunāni tadārcayet
- 21
शक्तितस्त्रीणि चैकं वा वस्त्रमाल्यानुलेपनैः
शयनस्थानि पूज्यानि नमोऽस्तु जलशायिने
śaktitastrīṇi caikaṃ vā vastramālyānulepanaiḥ
śayanasthāni pūjyāni namo'stu jalaśāyine
- 22
ततस्तु गीतवाद्येन रात्रौ जागरणे कृते
प्रभाते च ततः स्नानं कृत्वा दाम्पत्यमर्चयेत्
tatastu gītavādyena rātrau jāgaraṇe kṛte
prabhāte ca tataḥ snānaṃ kṛtvā dāmpatyamarcayet
- 23
भोजनं च यथाशक्त्या वित्तशाठ्यविवर्जितः
भुक्त्वा श्रुत्वा पुराणानि तद्दिनं चातिवाहयेत्
bhojanaṃ ca yathāśaktyā vittaśāṭhyavivarjitaḥ
bhuktvā śrutvā purāṇāni taddinaṃ cātivāhayet
- 24
अनेन विधिना सर्वं मासि मासि समाचरेत्
व्रतान्ते शयनं दद्याद्गुडधेनुसमन्वितम्
सोपधानकविश्रामं सास्तरावरणं शुभम्
anena vidhinā sarvaṃ māsi māsi samācaret
vratānte śayanaṃ dadyādguḍadhenusamanvitam
sopadhānakaviśrāmaṃ sāstarāvaraṇaṃ śubham
- 25
यथा न लक्ष्मीर्देवेश त्वां परित्यज्य गच्छति
तथा सुरूपतारोग्यम् अशोकश्चास्तु मे सदा
yathā na lakṣmīrdeveśa tvāṃ parityajya gacchati
tathā surūpatārogyam aśokaścāstu me sadā
- 26
यथा देवेन रहिता न लक्ष्मीर्जायते क्वचित्
तथा विशोकता मेऽस्तु भक्तिरग्र्या च केशवे
yathā devena rahitā na lakṣmīrjāyate kvacit
tathā viśokatā me'stu bhaktiragryā ca keśave
- 27
मन्त्रेणानेन शयनं गुडधेनुसमन्वितम्
शूर्पं च लक्ष्म्या सहितं दातव्यं भूतिमिच्छता
mantreṇānena śayanaṃ guḍadhenusamanvitam
śūrpaṃ ca lakṣmyā sahitaṃ dātavyaṃ bhūtimicchatā
- 28
उत्पलं करवीरं च बाणमम्लानकुङ्कुमम्
केतकी सिन्दुवारं च मल्लिका गन्धपाटला
कदम्बं कुब्जकं जातिः शस्तान्येतानि सर्वदा
utpalaṃ karavīraṃ ca bāṇamamlānakuṅkumam
ketakī sinduvāraṃ ca mallikā gandhapāṭalā
kadambaṃ kubjakaṃ jātiḥ śastānyetāni sarvadā

