17 shlokas
- 1
ईश्वर उवाच
शर्करासप्तमीं वक्ष्ये तद्वत्कल्मषनाशिनीम्
आयुरारोग्यमैश्वर्यं ययानन्तं प्रजायते
īśvara uvāca
śarkarāsaptamīṃ vakṣye tadvatkalmaṣanāśinīm
āyurārogyamaiśvaryaṃ yayānantaṃ prajāyate
- 2
माधवस्य सिते पक्षे सप्तम्यां नियतव्रतः
प्रातः स्नात्वा तिलैः शुक्लैः शुक्लमाल्यानुलेपनः
mādhavasya site pakṣe saptamyāṃ niyatavrataḥ
prātaḥ snātvā tilaiḥ śuklaiḥ śuklamālyānulepanaḥ
- 3
स्थण्डिले पद्ममालिख्य कुङ्कुमेन सकर्णिकम्
तस्मिन्नमः सवित्रे तु गन्धधूपौ निवेदयेत्
sthaṇḍile padmamālikhya kuṅkumena sakarṇikam
tasminnamaḥ savitre tu gandhadhūpau nivedayet
- 4
स्थापयेदुदकुम्भं च शर्करापात्रसंयुतम्
शुक्लवस्त्रैरलंकृत्य शुक्लमाल्यानुलेपनैः
सुवर्णेन समायुक्तं मन्त्रेणानेन पूजयेत्
sthāpayedudakumbhaṃ ca śarkarāpātrasaṃyutam
śuklavastrairalaṃkṛtya śuklamālyānulepanaiḥ
suvarṇena samāyuktaṃ mantreṇānena pūjayet
- 5
विश्ववेदमयो यस्माद्वेदवादीति पठ्यसे
सर्वस्यामृतमेव त्वमतः शान्तिं प्रयच्छ मे
viśvavedamayo yasmādvedavādīti paṭhyase
sarvasyāmṛtameva tvamataḥ śāntiṃ prayaccha me
- 6
पञ्चगव्यं ततः पीत्वा स्वपेत्तत्पार्श्वतः क्षितौ
सौरसूक्तं स्मरन्नास्ते पुराणश्रवणेन च
pañcagavyaṃ tataḥ pītvā svapettatpārśvataḥ kṣitau
saurasūktaṃ smarannāste purāṇaśravaṇena ca
- 7
अहोरात्रे गते पश्चादष्टम्यां कृतनैत्यकः
तत्सर्वं विदुषे तद्वद्ब्राह्मणाय निवेदयेत्
ahorātre gate paścādaṣṭamyāṃ kṛtanaityakaḥ
tatsarvaṃ viduṣe tadvadbrāhmaṇāya nivedayet
- 8
भोजयेच्छक्तितो विप्राञ्छर्कराघृतपायसैः
भुञ्जीतातैललवणं स्वयमप्यथ वाग्यतः
bhojayecchaktito viprāñcharkarāghṛtapāyasaiḥ
bhuñjītātailalavaṇaṃ svayamapyatha vāgyataḥ
- 9
अनेन विधिना सर्वं मासि मासि समाचरेत्
संवत्सरान्ते शयनं शर्कराकलशान्वितम्
anena vidhinā sarvaṃ māsi māsi samācaret
saṃvatsarānte śayanaṃ śarkarākalaśānvitam
- 10
सर्वोपस्करसंयुक्तं तथैकां गां पयस्विनीम्
गृहं च शक्तिमान्दद्यात्समस्तोपस्करान्वितम्
sarvopaskarasaṃyuktaṃ tathaikāṃ gāṃ payasvinīm
gṛhaṃ ca śaktimāndadyātsamastopaskarānvitam
- 11
सहस्रेणाथ निष्काणां कृत्वा दद्याच्छतेन वा
दशभिर्वाथ निष्केण तदर्धेनापि शक्तितः
sahasreṇātha niṣkāṇāṃ kṛtvā dadyācchatena vā
daśabhirvātha niṣkeṇa tadardhenāpi śaktitaḥ
- 12
सुवर्णाश्वः प्रदातव्यः पूर्ववन्मन्त्रवादनम्
न वित्तशाठ्यं कुर्वीत कुर्वन्दोषं समश्नुते
suvarṇāśvaḥ pradātavyaḥ pūrvavanmantravādanam
na vittaśāṭhyaṃ kurvīta kurvandoṣaṃ samaśnute
- 13
अमृतं पिबतो वक्त्रात्सूर्यस्यामृतबिन्दवः
निपेतुर्ये धरण्यां तु शालिमुद्गेक्षवः स्मृताः
amṛtaṃ pibato vaktrātsūryasyāmṛtabindavaḥ
nipeturye dharaṇyāṃ tu śālimudgekṣavaḥ smṛtāḥ
- 14
शर्करा तु परा तस्मादिक्षुसारोऽमृतात्मवान्
इष्टा रवेरतः पुण्या शर्करा हव्यकव्ययोः
śarkarā tu parā tasmādikṣusāro'mṛtātmavān
iṣṭā raverataḥ puṇyā śarkarā havyakavyayoḥ
- 15
शर्करासप्तमी चेयं वाजिमेधफलप्रदा
सर्वदुष्टप्रशमनी पुत्रपौत्रप्रवर्धिनी
śarkarāsaptamī ceyaṃ vājimedhaphalapradā
sarvaduṣṭapraśamanī putrapautrapravardhinī
- 16
यः कुर्यात्परया भक्त्या स वै सद्गतिमाप्नुयात्
कल्पमेकं वसेत्स्वर्गे ततो याति परं पदम्
yaḥ kuryātparayā bhaktyā sa vai sadgatimāpnuyāt
kalpamekaṃ vasetsvarge tato yāti paraṃ padam
- 17
इदमनघं शृणोति यः स्मरेद्वा परिपठतीह दिवाकरस्य लोके
मतिमपि च ददाति सोऽपि देवैरमरवधूजनमालयाभिपूज्यः
idamanaghaṃ śṛṇoti yaḥ smaredvā paripaṭhatīha divākarasya loke
matimapi ca dadāti so'pi devairamaravadhūjanamālayābhipūjyaḥ

