36 shlokas
- 1
तस्मिन्विनिहते दैत्ये ग्रसने लोकनायके
निर्मर्यादमयुध्यन्त हरिणा सह दानवाः
tasminvinihate daitye grasane lokanāyake
nirmaryādamayudhyanta hariṇā saha dānavāḥ
- 2
पट्टिशैर्मुशलैः पाशैर्गदाभिः कुणपैरपि
तीक्ष्णाननैश्च नाराचैश्चक्रैः शक्तिभिरेव च
paṭṭiśairmuśalaiḥ pāśairgadābhiḥ kuṇapairapi
tīkṣṇānanaiśca nārācaiścakraiḥ śaktibhireva ca
- 3
तानस्त्रान्दानवैर्मुक्तांश्चित्रयोधी जनार्दनः
एकैकं शतशश्चक्रे बाणैरग्निशिखोपमैः
tānastrāndānavairmuktāṃścitrayodhī janārdanaḥ
ekaikaṃ śataśaścakre bāṇairagniśikhopamaiḥ
- 4
ततः क्षीणायुधप्राणा दानवा भ्रान्तचेतसः
अस्त्राण्यादातुमभवन्नसमर्था यदा रणे
tataḥ kṣīṇāyudhaprāṇā dānavā bhrāntacetasaḥ
astrāṇyādātumabhavannasamarthā yadā raṇe
- 5
तदा मृतैर्गजैरश्वैर्जनार्दनमयोधयन्
समन्तात्कोटिशो दैत्याः सर्वतः प्रत्ययोधयन्
tadā mṛtairgajairaśvairjanārdanamayodhayan
samantātkoṭiśo daityāḥ sarvataḥ pratyayodhayan
- 6
बहु कृत्वा वपुर्विष्णुः किंचिच्छान्तभुजोऽभवत्
उवाच च गरुत्मन्तं तस्मिन्सुतुमुले रणे
bahu kṛtvā vapurviṣṇuḥ kiṃcicchāntabhujo'bhavat
uvāca ca garutmantaṃ tasminsutumule raṇe
- 7
गरुत्मन्कच्चिदश्रान्तस्त्वमस्मिन्नपि साम्प्रतम्
यद्यश्रान्तोऽसि तद्याहि मथनस्य रथं प्रति
garutmankaccidaśrāntastvamasminnapi sāmpratam
yadyaśrānto'si tadyāhi mathanasya rathaṃ prati
- 8
श्रान्तोऽस्यथ मुहूर्तं त्वं रणादपसृतो भव
इत्युक्तो गरुडस्तेन विष्णुना प्रभविष्णुना
śrānto'syatha muhūrtaṃ tvaṃ raṇādapasṛto bhava
ityukto garuḍastena viṣṇunā prabhaviṣṇunā
- 9
आससाद रणे दैत्यं मथनं घोरदर्शनम्
दैत्यस्त्वभिमुखं दृष्ट्वा शङ्खचक्रगदाधरम्
āsasāda raṇe daityaṃ mathanaṃ ghoradarśanam
daityastvabhimukhaṃ dṛṣṭvā śaṅkhacakragadādharam
- 10
जघान भिन्दिपालेन शितबाणेन वक्षसि
तत्प्रहारम् अचिन्त्यैव विष्णुस्तस्मिन्महाहवे
jaghāna bhindipālena śitabāṇena vakṣasi
tatprahāram acintyaiva viṣṇustasminmahāhave
- 11
जघान पञ्चभिर्बाणैर्मार्जितैश्च शिलाशितैः
पुनर्दशभिर् अष्टैस्तं तताड स्तनान्तरे
jaghāna pañcabhirbāṇairmārjitaiśca śilāśitaiḥ
punardaśabhir aṣṭaistaṃ tatāḍa stanāntare
- 12
विद्धो मर्मसु दैत्येन्द्रो हरिबाणैरकम्पत
स मुहूर्तं समाश्वास्य जग्राह परिघं तदा
viddho marmasu daityendro haribāṇairakampata
sa muhūrtaṃ samāśvāsya jagrāha parighaṃ tadā
- 13
जघ्ने जनार्दनं चापि परिघेणाग्निवर्चसा
विष्णुस्तेन प्रहारेण किंचिदाघूर्णितोऽभवत्
jaghne janārdanaṃ cāpi parigheṇāgnivarcasā
viṣṇustena prahāreṇa kiṃcidāghūrṇito'bhavat
- 14
ततः क्रोधविवृत्ताक्षो गदां जग्राह माधवः
मथनं सरथं रोषान्निष्पिपेषाथ रोषतः
tataḥ krodhavivṛttākṣo gadāṃ jagrāha mādhavaḥ
mathanaṃ sarathaṃ roṣānniṣpipeṣātha roṣataḥ
- 15
स पपाताथ दैत्येन्द्रः क्षयकालेऽचलो यथा
तस्मिन्निपतिते भूमौ दानवे वीर्यशालिनि
sa papātātha daityendraḥ kṣayakāle'calo yathā
tasminnipatite bhūmau dānave vīryaśālini
- 16
अवसादं ययुर्दैत्याः कर्दमे करिणो यथा
ततस्तेषु विपन्नेषु दानवेष्वतिमानिषु
avasādaṃ yayurdaityāḥ kardame kariṇo yathā
tatasteṣu vipanneṣu dānaveṣvatimāniṣu
- 17
प्रकोपाद्रक्तनयनो महिषो दानवेश्वरः
प्रत्युद्ययौ हरिं रौद्रः स्वबाहुबलमास्थितः
prakopādraktanayano mahiṣo dānaveśvaraḥ
pratyudyayau hariṃ raudraḥ svabāhubalamāsthitaḥ
- 18
तीक्ष्णधारेण शूलेन महिषो हरिमर्दयन्
शक्त्या च गरुडं वीरो महिषोऽभ्यहनद्धृदि
tīkṣṇadhāreṇa śūlena mahiṣo harimardayan
śaktyā ca garuḍaṃ vīro mahiṣo'bhyahanaddhṛdi
- 19
ततो व्यावृत्य वदनं महाचलगुहानिभम्
ग्रस्तुमैच्छद्रणे दैत्यः स गरुत्मन्तमच्युतम्
tato vyāvṛtya vadanaṃ mahācalaguhānibham
grastumaicchadraṇe daityaḥ sa garutmantamacyutam
- 20
अथाच्युतोऽपि विज्ञाय दानवस्य चिकीर्षितम्
वदनं पूरयामास दिव्यैरस्त्रैर्महाबलः
athācyuto'pi vijñāya dānavasya cikīrṣitam
vadanaṃ pūrayāmāsa divyairastrairmahābalaḥ
- 21
महिषस्याथ ससृजे बाणौघं गरुडध्वजः
पिधाय वदनं दिव्यैर्दिव्यास्त्रपरिमन्त्रितैः
mahiṣasyātha sasṛje bāṇaughaṃ garuḍadhvajaḥ
pidhāya vadanaṃ divyairdivyāstraparimantritaiḥ
- 22
स तैर्बाणैरभिहतो महिषोऽचलसंनिभः
परिवर्तितकायोऽधः पपात न ममार च
sa tairbāṇairabhihato mahiṣo'calasaṃnibhaḥ
parivartitakāyo'dhaḥ papāta na mamāra ca
- 23
महिषं पतितं दृष्ट्वा भूमौ प्रोवाच केशवः
महिषासुर मत्तस्त्वं वधं नास्त्रैरिहार्हसि
mahiṣaṃ patitaṃ dṛṣṭvā bhūmau provāca keśavaḥ
mahiṣāsura mattastvaṃ vadhaṃ nāstrairihārhasi
- 24
योषिद्वध्यः पुरोक्तोऽसि साक्षात्कमलयोनिना
उत्तिष्ठ जीवितं रक्ष गच्छास्मात्संगराद्द्रुतम्
yoṣidvadhyaḥ purokto'si sākṣātkamalayoninā
uttiṣṭha jīvitaṃ rakṣa gacchāsmātsaṃgarāddrutam
- 25
तस्मिन्पराङ्मुखे दैत्ये महिषे शुम्भदानवः
संदष्टौष्ठपुटः कोपाद्भ्रुकुटीकुटिलाननः
tasminparāṅmukhe daitye mahiṣe śumbhadānavaḥ
saṃdaṣṭauṣṭhapuṭaḥ kopādbhrukuṭīkuṭilānanaḥ
- 26
निर्मथ्य पाणिना पाणिं धनुरादाय भैरवम्
सज्यं चकार स धनुः शरांश्चाशीविषोपमान्
nirmathya pāṇinā pāṇiṃ dhanurādāya bhairavam
sajyaṃ cakāra sa dhanuḥ śarāṃścāśīviṣopamān
- 27
स चित्रयोधी दृढमुष्टिपातस्ततस्तु विष्णुं गरुडं च दैत्यः
बाणैर्ज्वलद्वह्निशिखानिकाशैः क्षिप्तैरसंख्यैः परिघातहीनैः
sa citrayodhī dṛḍhamuṣṭipātastatastu viṣṇuṃ garuḍaṃ ca daityaḥ
bāṇairjvaladvahniśikhānikāśaiḥ kṣiptairasaṃkhyaiḥ parighātahīnaiḥ
- 28
विष्णुश्च दैत्येन्द्रशराहतोऽपि भुशुण्डिमादाय कृतान्ततुल्याम्
तया भुशुण्ड्या च पिपेष मेषं शुम्भस्य पत्त्रं धरणीधराभम्
viṣṇuśca daityendraśarāhato'pi bhuśuṇḍimādāya kṛtāntatulyām
tayā bhuśuṇḍyā ca pipeṣa meṣaṃ śumbhasya pattraṃ dharaṇīdharābham
- 29
तस्मादवप्लुत्य हताच्च मेषाद्भूभौ पदातिः स तु दैत्यनाथः
ततो महीस्थस्य हरिः शरौघान्मुमोच कालानलतुल्यभासः
tasmādavaplutya hatācca meṣādbhūbhau padātiḥ sa tu daityanāthaḥ
tato mahīsthasya hariḥ śaraughānmumoca kālānalatulyabhāsaḥ
- 30
शरैस्त्रिभिस्तस्य भुजं बिभेद षड्भिश्च शीर्षं दशभिश्च केतुम्
विष्णुर्विकृष्टैः श्रवणावसानं दैत्यस्य विव्याध विवृत्तनेत्रः
śaraistribhistasya bhujaṃ bibheda ṣaḍbhiśca śīrṣaṃ daśabhiśca ketum
viṣṇurvikṛṣṭaiḥ śravaṇāvasānaṃ daityasya vivyādha vivṛttanetraḥ

