14 shlokas
- 1
श्रीभगवानुवाच
अथान्यामपि वक्ष्यामि शोभनां शुभसप्तमीम्
यामुपोष्य नरो रोगशोकदुःखैः प्रमुच्यते
śrībhagavānuvāca
athānyāmapi vakṣyāmi śobhanāṃ śubhasaptamīm
yāmupoṣya naro rogaśokaduḥkhaiḥ pramucyate
- 2
पुण्येन चाश्वयुजे मासि कृतस्नानजपः शुचिः
वाचयित्वा ततो विप्रानारभेच्छुभसप्तमीम्
puṇyena cāśvayuje māsi kṛtasnānajapaḥ śuciḥ
vācayitvā tato viprānārabhecchubhasaptamīm
- 3
पूजयेद्भक्त्या गन्धमाल्यानुलेपनैः
नमामि सूर्यसम्भूताम् अशेषभुवनालयाम्
त्वामहं शुभकल्याणशरीरां सर्वसिद्धये
pūjayedbhaktyā gandhamālyānulepanaiḥ
namāmi sūryasambhūtām aśeṣabhuvanālayām
tvāmahaṃ śubhakalyāṇaśarīrāṃ sarvasiddhaye
- 4
अथ कृत्वा तिलप्रस्थं ताम्रपात्रेण संयुतम्
काञ्चनं वृषभं तद्वद्गन्धमाल्यगुडान्वितैः
atha kṛtvā tilaprasthaṃ tāmrapātreṇa saṃyutam
kāñcanaṃ vṛṣabhaṃ tadvadgandhamālyaguḍānvitaiḥ
- 5
फलैर्नानाविधैर्भक्ष्यैर्घृतपायससंयुतैः
दद्याद्द्विकालवेलायामर्यमा प्रीयतामिति
phalairnānāvidhairbhakṣyairghṛtapāyasasaṃyutaiḥ
dadyāddvikālavelāyāmaryamā prīyatāmiti
- 6
पञ्चगव्यं च संप्राश्य स्वपेद्भूमौ विमत्सरः
ततः प्रभाते संजाते भक्त्या सम्पूजयेद्द्विजान्
pañcagavyaṃ ca saṃprāśya svapedbhūmau vimatsaraḥ
tataḥ prabhāte saṃjāte bhaktyā sampūjayeddvijān
- 7
अनेन विधिना दद्यान्मासि मासि सदा नरः
वाससा वृषभं हैमं तद्वद्गां काञ्चनोद्भवाम्
anena vidhinā dadyānmāsi māsi sadā naraḥ
vāsasā vṛṣabhaṃ haimaṃ tadvadgāṃ kāñcanodbhavām
- 8
संवत्सरान्ते शयनमिक्षुदण्डगुडान्वितम्
सोपधानकविश्रामं भाजनासनसंयुतम्
saṃvatsarānte śayanamikṣudaṇḍaguḍānvitam
sopadhānakaviśrāmaṃ bhājanāsanasaṃyutam
- 9
ताम्रपात्रे तिलप्रस्थं सौवर्णं वृषभं तथा
दद्याद्वेदविदे सर्वं विश्वात्मा प्रीयतामिति
tāmrapātre tilaprasthaṃ sauvarṇaṃ vṛṣabhaṃ tathā
dadyādvedavide sarvaṃ viśvātmā prīyatāmiti
- 10
अनेन विधिना विद्वान्कुर्याद्यः शुभसप्तमीम्
तस्य श्रीर्विपुला कीर्तिर्भवेज्जन्मनि जन्मनि
anena vidhinā vidvānkuryādyaḥ śubhasaptamīm
tasya śrīrvipulā kīrtirbhavejjanmani janmani
- 11
अप्सरोगणगन्धर्वैः पूज्यमानः सुरालये
वसेद्गणाधिपो भूत्वा यावदाभूतसंप्लवम्
कल्पादाववतीर्णस्तु सप्तद्वीपाधिपो भवेत्
apsarogaṇagandharvaiḥ pūjyamānaḥ surālaye
vasedgaṇādhipo bhūtvā yāvadābhūtasaṃplavam
kalpādāvavatīrṇastu saptadvīpādhipo bhavet
- 12
ब्रह्महत्यासहस्रस्य भ्रूणहत्याशतस्य च
नाशायालमियं पुण्या पठ्यते शुभसप्तमी
brahmahatyāsahasrasya bhrūṇahatyāśatasya ca
nāśāyālamiyaṃ puṇyā paṭhyate śubhasaptamī
- 13
इमां पठेद्यः शृणुयान्मुहूर्तं पश्येत्प्रसङ्गादपि दीयमानम्
सोऽप्यत्र सर्वाघविमुक्तदेहः प्राप्नोति विद्याधरनायकत्वम्
imāṃ paṭhedyaḥ śṛṇuyānmuhūrtaṃ paśyetprasaṅgādapi dīyamānam
so'pyatra sarvāghavimuktadehaḥ prāpnoti vidyādharanāyakatvam
- 14
यावत्समाः सप्त नरः करोति यः सप्तमीं सप्तविधानयुक्ताम्
स सप्तलोकाधिपतिः क्रमेण भूत्वा पदं याति परं मुरारेः
yāvatsamāḥ sapta naraḥ karoti yaḥ saptamīṃ saptavidhānayuktām
sa saptalokādhipatiḥ krameṇa bhūtvā padaṃ yāti paraṃ murāreḥ

