19 shlokas
- 1
मनुरुवाच
मधुरा भारती केन व्रतेन मधुसूदन
तथैव जनसौभाग्यमतिविद्यासु कौशलम्
manuruvāca
madhurā bhāratī kena vratena madhusūdana
tathaiva janasaubhāgyamatividyāsu kauśalam
- 2
अभेदश्चापि दम्पत्योस्तथा बन्धुजनेन च
आयुश्च विपुलं पुंसां तन्मे कथय माधव
abhedaścāpi dampatyostathā bandhujanena ca
āyuśca vipulaṃ puṃsāṃ tanme kathaya mādhava
- 3
मत्स्य उवाच
सम्यक्पृष्टं त्वया राजञ्छृणु सारस्वतं व्रतम्
यस्य संकीर्तनादेव तुष्यतीह सरस्वती
matsya uvāca
samyakpṛṣṭaṃ tvayā rājañchṛṇu sārasvataṃ vratam
yasya saṃkīrtanādeva tuṣyatīha sarasvatī
- 4
यो यद्भक्तः पुमान्कुर्यादेतद्व्रतमनुत्तमम्
तद्वासरादौ सम्पूज्य विप्रानेतान्समाचरेत्
yo yadbhaktaḥ pumānkuryādetadvratamanuttamam
tadvāsarādau sampūjya viprānetānsamācaret
- 5
अथवादित्यवारेण ग्रहताराबलेन च
पायसं भोजयेद्विप्रान्कृत्वा ब्राह्मणवाचनम्
athavādityavāreṇa grahatārābalena ca
pāyasaṃ bhojayedviprānkṛtvā brāhmaṇavācanam
- 6
शुक्लवस्त्राणि दत्त्वा च सहिरण्यानि शक्तितः
गायत्रीं पूजयेद्भक्त्या शुक्लमाल्यानुलेपनैः
śuklavastrāṇi dattvā ca sahiraṇyāni śaktitaḥ
gāyatrīṃ pūjayedbhaktyā śuklamālyānulepanaiḥ
- 7
यथा न देवि भगवान्ब्रह्मलोके पितामहः
त्वां परित्यज्य संतिष्ठेत्तथा भव वरप्रदा
yathā na devi bhagavānbrahmaloke pitāmahaḥ
tvāṃ parityajya saṃtiṣṭhettathā bhava varapradā
- 8
वेदाः शास्त्राणि सर्वाणि गीतनृत्यादिकं च यत्
न विहीनं त्वया देवि तथा मे सन्तु सिद्धयः
vedāḥ śāstrāṇi sarvāṇi gītanṛtyādikaṃ ca yat
na vihīnaṃ tvayā devi tathā me santu siddhayaḥ
- 9
लक्ष्मीर्मेधा धरा पुष्टिर्गौरी तुष्टिः प्रभा मतिः
एताभिः पाहि चाष्टाभिस्तनुभिर्मां सरस्वति
lakṣmīrmedhā dharā puṣṭirgaurī tuṣṭiḥ prabhā matiḥ
etābhiḥ pāhi cāṣṭābhistanubhirmāṃ sarasvati
- 10
एवं सम्पूज्य गायत्रीं वीणाक्षमणिधारिणीम्
शुक्लपुष्पाक्षतैर्भक्त्या सकमण्डलुपुस्तकाम्
मौनव्रतेन भुञ्जीत सायं प्रातस्तु धर्मवित्
evaṃ sampūjya gāyatrīṃ vīṇākṣamaṇidhāriṇīm
śuklapuṣpākṣatairbhaktyā sakamaṇḍalupustakām
maunavratena bhuñjīta sāyaṃ prātastu dharmavit
- 11
पञ्चम्यां प्रतिपक्षं च पूजयेद्ब्रह्मवासिनीम्
तथैव तण्डुलप्रस्थं घृतपात्रेण संयुतम्
क्षीरं दद्याद्धिरण्यं च गायत्री प्रीयतामिति
pañcamyāṃ pratipakṣaṃ ca pūjayedbrahmavāsinīm
tathaiva taṇḍulaprasthaṃ ghṛtapātreṇa saṃyutam
kṣīraṃ dadyāddhiraṇyaṃ ca gāyatrī prīyatāmiti
- 12
संध्यायां च तथा मौनमेतत्कुर्वन्समाचरेत्
नान्तरा भोजनं कुर्याद्यावन्मासास्त्रयोदश
saṃdhyāyāṃ ca tathā maunametatkurvansamācaret
nāntarā bhojanaṃ kuryādyāvanmāsāstrayodaśa
- 13
समाप्ते तु व्रते कुर्याद्भोजनं शुक्लतण्डुलैः
पूर्वं सवस्त्रयुग्मं च दद्याद्विप्राय भोजनम्
samāpte tu vrate kuryādbhojanaṃ śuklataṇḍulaiḥ
pūrvaṃ savastrayugmaṃ ca dadyādviprāya bhojanam
- 14
देव्या वितानं घण्टां च सितनेत्रे पयस्विनीम्
चन्दनं वस्त्रयुग्मं च दद्याच्च शिखरं पुनः
devyā vitānaṃ ghaṇṭāṃ ca sitanetre payasvinīm
candanaṃ vastrayugmaṃ ca dadyācca śikharaṃ punaḥ
- 15
तथोपदेष्टारमपि भक्त्या सम्पूजयेद्गुरुम्
वित्तशाठ्येन रहितो वस्त्रमाल्यानुलेपनैः
tathopadeṣṭāramapi bhaktyā sampūjayedgurum
vittaśāṭhyena rahito vastramālyānulepanaiḥ
- 16
अनेन विधिना यस्तु कुर्यात्सारस्वतं व्रतम्
विद्यावानर्थसंयुक्तो रक्तकण्ठश्च जायते
anena vidhinā yastu kuryātsārasvataṃ vratam
vidyāvānarthasaṃyukto raktakaṇṭhaśca jāyate
- 17
सरस्वत्याः प्रसादेन ब्रह्मलोके महीयते
नारी वा कुरुते या तु सापि तत्फलगामिनी
sarasvatyāḥ prasādena brahmaloke mahīyate
nārī vā kurute yā tu sāpi tatphalagāminī
- 18
ब्रह्मलोके वसेद्राजन्यावत्कल्पायुतत्रयम्
brahmaloke vasedrājanyāvatkalpāyutatrayam
- 19
सारस्वतं व्रतं यस्तु शृणुयादपि यः पठेत्
विद्याधरपुरे सोऽपि वसेत्कल्पायुतत्रयम्
sārasvataṃ vrataṃ yastu śṛṇuyādapi yaḥ paṭhet
vidyādharapure so'pi vasetkalpāyutatrayam

