14 shlokas
- 1
मत्स्य उवाच
एवमस्त्विति संहृष्टः शक्रस्त्रिदशवर्धनः
संदिदेशाग्रतः सोमं युद्धाय शिशिरायुधम्
matsya uvāca
evamastviti saṃhṛṣṭaḥ śakrastridaśavardhanaḥ
saṃdideśāgrataḥ somaṃ yuddhāya śiśirāyudham
- 2
गच्छ सोम सहायत्वं कुरु पाशधरस्य वै
असुराणां विनाशाय जयार्थं च दिवौकसाम्
gaccha soma sahāyatvaṃ kuru pāśadharasya vai
asurāṇāṃ vināśāya jayārthaṃ ca divaukasām
- 3
त्वं मत्तः प्रतिवीर्यश्च ज्योतिषां चेश्वरेश्वरः
त्वन्मयं सर्वलोकेषु रसं रसविदो विदुः
tvaṃ mattaḥ prativīryaśca jyotiṣāṃ ceśvareśvaraḥ
tvanmayaṃ sarvalokeṣu rasaṃ rasavido viduḥ
- 4
क्षयवृद्धी तव व्यक्ते सागरस्येव मण्डले
परिवर्तस्यहोरात्रं कालं जगति योजयन्
kṣayavṛddhī tava vyakte sāgarasyeva maṇḍale
parivartasyahorātraṃ kālaṃ jagati yojayan
- 5
लोकच्छायामयं लक्ष्म तवाङ्कः शशसंनिभः
न विदुः सोम देवापि ये च नक्षत्रयोनयः
lokacchāyāmayaṃ lakṣma tavāṅkaḥ śaśasaṃnibhaḥ
na viduḥ soma devāpi ye ca nakṣatrayonayaḥ
- 6
त्वम् आदित्यपथाद् ऊर्ध्वं ज्योतिषां चोपरि स्थितः
तमः प्रोत्सार्य महसा भासयस्यखिलं जगत्
tvam ādityapathād ūrdhvaṃ jyotiṣāṃ copari sthitaḥ
tamaḥ protsārya mahasā bhāsayasyakhilaṃ jagat
- 7
श्वेतभानुर्हिमतनुर्ज्योतिषाम् अधिपः शशी
अधिकृत्कालयोगात्मा इष्टो यज्ञरसोऽव्ययः
śvetabhānurhimatanurjyotiṣām adhipaḥ śaśī
adhikṛtkālayogātmā iṣṭo yajñaraso'vyayaḥ
- 8
ओषधीशः क्रियायोनिर्हरशेखरभाक्तथा
शीतांशुरमृताधारश्चपलः श्वेतवाहनः
oṣadhīśaḥ kriyāyonirharaśekharabhāktathā
śītāṃśuramṛtādhāraścapalaḥ śvetavāhanaḥ
- 9
त्वं कान्तिः कान्तिवपुषां त्वं सोमः सोमपायिनाम्
सौम्यस्त्वं सर्वभूतानां तिमिरघ्नस्त्वम् ऋक्षराट्
tvaṃ kāntiḥ kāntivapuṣāṃ tvaṃ somaḥ somapāyinām
saumyastvaṃ sarvabhūtānāṃ timiraghnastvam ṛkṣarāṭ
- 10
तद्गच्छ त्वं महासेन वरुणेन वरूथिना
शमय त्वासुरीं मायां यया दह्याम संयुगे
tadgaccha tvaṃ mahāsena varuṇena varūthinā
śamaya tvāsurīṃ māyāṃ yayā dahyāma saṃyuge
- 11
सोम उवाच
यन्मां वदसि युद्धार्थे देवराज वरप्रद
एष वर्षामि शिशिरं दैत्यमायापकर्षणम्
soma uvāca
yanmāṃ vadasi yuddhārthe devarāja varaprada
eṣa varṣāmi śiśiraṃ daityamāyāpakarṣaṇam
- 12
एतान्मच्छीतनिर्दग्धान्पश्य त्वं हिमवेष्टितान्
विमायान्विमदांश्चैव दैत्यसिंहान्महाहवे
etānmacchītanirdagdhānpaśya tvaṃ himaveṣṭitān
vimāyānvimadāṃścaiva daityasiṃhānmahāhave
- 13
इत्युक्त्वा तारकाधीशः सजलेशः शिवोदकैः
प्लावयामास सैन्यानि सुराणां शान्तिवृद्धये
ityuktvā tārakādhīśaḥ sajaleśaḥ śivodakaiḥ
plāvayāmāsa sainyāni surāṇāṃ śāntivṛddhaye
- 14
तेषां हिमकरोत्सृष्टाः सपाशा हिमवृष्टयः
वेष्टयन्ति स्म तान्घोरान्दैत्यान्मेघगणा इव
teṣāṃ himakarotsṛṣṭāḥ sapāśā himavṛṣṭayaḥ
veṣṭayanti sma tānghorāndaityānmeghagaṇā iva

