11 shlokas
- 1
श्रीभगवानुवाच
कृष्णाष्टमीमथो वक्ष्ये सर्वपापप्रणाशिनीम्
शान्तिर्मुक्तिश्च भवति जयः पुंसां विशेषतः
śrībhagavānuvāca
kṛṣṇāṣṭamīmatho vakṣye sarvapāpapraṇāśinīm
śāntirmuktiśca bhavati jayaḥ puṃsāṃ viśeṣataḥ
- 2
शंकरं मार्गशिरसि शम्भुं पौषेऽभिपूजयेत्
माघे महेश्वरं देवं महादेवं च फाल्गुने
śaṃkaraṃ mārgaśirasi śambhuṃ pauṣe'bhipūjayet
māghe maheśvaraṃ devaṃ mahādevaṃ ca phālgune
- 3
स्थाणुं चैत्रे शिवं तद्वद्वैशाखे त्वर्चयेन्नरः
ज्येष्ठे पशुपतिं चार्चेदाषाढे उग्रमर्चयेत्
sthāṇuṃ caitre śivaṃ tadvadvaiśākhe tvarcayennaraḥ
jyeṣṭhe paśupatiṃ cārcedāṣāḍhe ugramarcayet
- 4
पूजयेच्छ्रावणे शर्वं नभस्ये त्र्यम्बकं तथा
हरमाश्वयुजे मासि तथेशानं च कार्त्तिके
pūjayecchrāvaṇe śarvaṃ nabhasye tryambakaṃ tathā
haramāśvayuje māsi tatheśānaṃ ca kārttike
- 5
कृष्णाष्टमीषु सर्वासु शक्तः सम्पूजयेद्द्विजान्
गोभूहिरण्यवासोभिः शिवभक्तानुपोषितः
kṛṣṇāṣṭamīṣu sarvāsu śaktaḥ sampūjayeddvijān
gobhūhiraṇyavāsobhiḥ śivabhaktānupoṣitaḥ
- 6
गोमूत्रघृतगोक्षीरतिलान्यवकुशोदकम्
गोशृङ्गोदशिरीषार्कबिल्वपत्त्रदधीनि च
पञ्चगव्यं च संप्राश्य शंकरं पूजयेन्निशि
gomūtraghṛtagokṣīratilānyavakuśodakam
gośṛṅgodaśirīṣārkabilvapattradadhīni ca
pañcagavyaṃ ca saṃprāśya śaṃkaraṃ pūjayenniśi
- 7
अश्वत्थं च वटं चैवोदुम्बरं प्लक्षमेव च
पलाशं जम्बुवृक्षं च विदुः षष्ठं महर्षयः
aśvatthaṃ ca vaṭaṃ caivodumbaraṃ plakṣameva ca
palāśaṃ jambuvṛkṣaṃ ca viduḥ ṣaṣṭhaṃ maharṣayaḥ
- 8
मार्गशीर्षाषाढमासाभ्यां द्वाभ्यां द्वाभ्यामिति क्रमात्
एकैकं दन्तपवनं वृक्षेष्वेतेषु भक्षयेत्
mārgaśīrṣāṣāḍhamāsābhyāṃ dvābhyāṃ dvābhyāmiti kramāt
ekaikaṃ dantapavanaṃ vṛkṣeṣveteṣu bhakṣayet
- 9
देवाय दद्यादर्घ्यं च कृष्णां गां कृष्णवाससम्
दद्यात्समाप्ते दध्यन्नं वितानध्वजचामरम्
devāya dadyādarghyaṃ ca kṛṣṇāṃ gāṃ kṛṣṇavāsasam
dadyātsamāpte dadhyannaṃ vitānadhvajacāmaram
- 10
द्विजानामुदकुम्भांश्च पञ्चरत्नसमन्वितान्
गावः कृष्णाः सुवर्णं च वासांसि विविधानि च
अशक्तस्तु पुनर्दद्याद्गामेकामपि शक्तितः
dvijānāmudakumbhāṃśca pañcaratnasamanvitān
gāvaḥ kṛṣṇāḥ suvarṇaṃ ca vāsāṃsi vividhāni ca
aśaktastu punardadyādgāmekāmapi śaktitaḥ
- 11
न वित्तशाठ्यं कुर्वीत कुर्वन्दोषमवाप्नुयात्
कृष्णाष्टमीमुपोष्यैव सप्तकल्पशतत्रयम्
पुमान्सम्पूजितो देवैः शिवलोके महीयते
na vittaśāṭhyaṃ kurvīta kurvandoṣamavāpnuyāt
kṛṣṇāṣṭamīmupoṣyaiva saptakalpaśatatrayam
pumānsampūjito devaiḥ śivaloke mahīyate

