20 shlokas
- 1
ब्रह्मोवाच
मोहाद्वापि मदाद्वापि यः परस्त्रीं समाश्रयेत्
तस्यापि निष्कृतिं देव वद सर्वकृपाकर
brahmovāca
mohādvāpi madādvāpi yaḥ parastrīṃ samāśrayet
tasyāpi niṣkṛtiṃ deva vada sarvakṛpākara
- 2
भगवन्पुरुषस्येह स्त्रियाश्च विरहादिकम्
शोकव्याधिभयं दुःखं न भवेद्येन तद्वद
bhagavanpuruṣasyeha striyāśca virahādikam
śokavyādhibhayaṃ duḥkhaṃ na bhavedyena tadvada
- 3
श्रीभगवानुवाच
श्रावणस्य द्वितीयायां कृष्णायां मधुसूदनः
क्षीरार्णवे सपत्नीकः सदा वसति केशवः
śrībhagavānuvāca
śrāvaṇasya dvitīyāyāṃ kṛṣṇāyāṃ madhusūdanaḥ
kṣīrārṇave sapatnīkaḥ sadā vasati keśavaḥ
- 4
तस्यां सम्पूज्य गोविन्दं सर्वान्कामान्समश्नुते
गोभूहिरण्यदानादि सप्तकल्पशतानुगम्
tasyāṃ sampūjya govindaṃ sarvānkāmānsamaśnute
gobhūhiraṇyadānādi saptakalpaśatānugam
- 5
अशून्यशयनं नाम द्वितीया संप्रकीर्तिता
तस्यां सम्पूजयेद्विष्णुम् एभिर्मन्त्रैर्विधानतः
aśūnyaśayanaṃ nāma dvitīyā saṃprakīrtitā
tasyāṃ sampūjayedviṣṇum ebhirmantrairvidhānataḥ
- 6
श्रीवत्सधारिञ्छ्रीकान्त श्रीधामञ्छ्रीपतेऽव्यय
गार्हस्थ्यं मा प्रणाशं मे यातु धर्मार्थकामदम्
śrīvatsadhāriñchrīkānta śrīdhāmañchrīpate'vyaya
gārhasthyaṃ mā praṇāśaṃ me yātu dharmārthakāmadam
- 7
अग्नयो मा प्रणश्यन्तु देवताः पुरुषोत्तम
पितरो मा प्रणश्यन्तु मास्तु दाम्पत्यभेदनम्
agnayo mā praṇaśyantu devatāḥ puruṣottama
pitaro mā praṇaśyantu māstu dāmpatyabhedanam
- 8
लक्ष्म्या वियुज्यते देव न कदाचिद्यथा भवान्
तथा कलत्रसम्बन्धो देव मा मे वियुज्यताम्
lakṣmyā viyujyate deva na kadācidyathā bhavān
tathā kalatrasambandho deva mā me viyujyatām
- 9
लक्ष्म्या न शून्यो वरद शय्यां त्वं शयनं गतः
शय्या ममाप्य् अशून्यास्तु तथैव मधुसूदन
lakṣmyā na śūnyo varada śayyāṃ tvaṃ śayanaṃ gataḥ
śayyā mamāpy aśūnyāstu tathaiva madhusūdana
- 10
गीतवादित्रनिर्घोषं देवदेवस्य कीर्तयेत्
घण्टा भवेदशक्तस्य सर्ववाद्यमयी यतः
gītavāditranirghoṣaṃ devadevasya kīrtayet
ghaṇṭā bhavedaśaktasya sarvavādyamayī yataḥ
- 11
एवं सम्पूज्य गोविन्दमश्नीयात्तैलवर्जितम्
नक्तमक्षारलवणं यावत्तत्स्याच्चतुष्टयम्
evaṃ sampūjya govindamaśnīyāttailavarjitam
naktamakṣāralavaṇaṃ yāvattatsyāccatuṣṭayam
- 12
ततः प्रभाते संजाते लक्ष्मीपतिसमन्विताम्
दीपान्नभाजनैर्युक्तां शय्यां दद्याद्विलक्षणाम्
tataḥ prabhāte saṃjāte lakṣmīpatisamanvitām
dīpānnabhājanairyuktāṃ śayyāṃ dadyādvilakṣaṇām
- 13
पादुकोपानहच्छत्त्रचामरासनसंयुताम्
अभीष्टोपस्करैर्युक्तां शुक्लपुष्पाम्बरावृताम्
pādukopānahacchattracāmarāsanasaṃyutām
abhīṣṭopaskarairyuktāṃ śuklapuṣpāmbarāvṛtām
- 14
सोपधानकविश्रामां फलैर्नानाविधैर्युताम्
तथाभरणधान्यैश्च यथाशक्त्या समन्विताम्
sopadhānakaviśrāmāṃ phalairnānāvidhairyutām
tathābharaṇadhānyaiśca yathāśaktyā samanvitām
- 15
अव्यङ्गाङ्गाय विप्राय वैष्णवाय कुटुम्बिने
दातव्या वेदविदुषे भावेनापतिताय च
avyaṅgāṅgāya viprāya vaiṣṇavāya kuṭumbine
dātavyā vedaviduṣe bhāvenāpatitāya ca
- 16
तत्रोपविश्य दाम्पत्यमलंकृत्य विधानतः
पत्न्यास्तु भाजनं दद्याद्भक्ष्यभोज्यसमन्वितम्
tatropaviśya dāmpatyamalaṃkṛtya vidhānataḥ
patnyāstu bhājanaṃ dadyādbhakṣyabhojyasamanvitam
- 17
ब्राह्मणस्यापि सौवर्णीम् उपस्करसमन्विताम्
प्रतिमां देवदेवस्य सोदकुम्भां निवेदयेत्
brāhmaṇasyāpi sauvarṇīm upaskarasamanvitām
pratimāṃ devadevasya sodakumbhāṃ nivedayet
- 18
एवं यस्तु पुमान्कुर्यादशून्यशयनं हरेः
वित्तशाठ्येन रहितो नारायणपरायणः
evaṃ yastu pumānkuryādaśūnyaśayanaṃ hareḥ
vittaśāṭhyena rahito nārāyaṇaparāyaṇaḥ
- 19
न तस्य पत्न्या विरहः कदाचिदपि जायते
नारी वा विधवा ब्रह्मन्यावच्चन्द्रार्कतारकम्
न विरूपौ न शोकार्तौ दम्पती भवतः क्वचित्
na tasya patnyā virahaḥ kadācidapi jāyate
nārī vā vidhavā brahmanyāvaccandrārkatārakam
na virūpau na śokārtau dampatī bhavataḥ kvacit
- 20
न पुत्रपशुरत्नानि क्षयं यान्ति पितामह
सप्त कल्पसहस्राणि सप्त कल्पशतानि च
कुर्वन्नशून्यशयनं विष्णुलोके महीयते
na putrapaśuratnāni kṣayaṃ yānti pitāmaha
sapta kalpasahasrāṇi sapta kalpaśatāni ca
kurvannaśūnyaśayanaṃ viṣṇuloke mahīyate

