25 shlokas
- 1
चन्द्रादित्योपरागे तु यत्स्नानमभिधीयते
तदहं श्रोतुमिच्छामि द्रव्यमन्त्रविधानवित्
candrādityoparāge tu yatsnānamabhidhīyate
tadahaṃ śrotumicchāmi dravyamantravidhānavit
- 2
मत्स्य उवाच
यस्य राशिं समासाद्य भवेद्ग्रहणसम्प्लवः
तस्य स्नानं प्रवक्ष्यामि मन्त्रौषधविधानतः
matsya uvāca
yasya rāśiṃ samāsādya bhavedgrahaṇasamplavaḥ
tasya snānaṃ pravakṣyāmi mantrauṣadhavidhānataḥ
- 3
चन्द्रोपरागं सम्प्राप्य कृत्वा ब्राह्मणवाचनम्
सम्पूज्य चतुरो विप्राञ्शुक्लमाल्यानुलेपनैः
candroparāgaṃ samprāpya kṛtvā brāhmaṇavācanam
sampūjya caturo viprāñśuklamālyānulepanaiḥ
- 4
पूर्वमेवोपरागस्य समासाद्यौषधादिकम्
स्थापयेच्चतुरः कुम्भानव्रणान्सागरानिति
pūrvamevoparāgasya samāsādyauṣadhādikam
sthāpayeccaturaḥ kumbhānavraṇānsāgarāniti
- 5
गजाश्वरथ्यावल्मीकसंगमाद्ध्रदगोकुलात्
राजद्वारप्रदेशाच्च मृदमानीय चाक्षिपेत्
gajāśvarathyāvalmīkasaṃgamāddhradagokulāt
rājadvārapradeśācca mṛdamānīya cākṣipet
- 6
पञ्चगव्यं च कुम्भेषु शुद्धमुक्ताफलानि च
रोचनां पद्मशङ्खौ च पञ्चरत्नसमन्वितम्
pañcagavyaṃ ca kumbheṣu śuddhamuktāphalāni ca
rocanāṃ padmaśaṅkhau ca pañcaratnasamanvitam
- 7
स्फटिकं चन्दनं श्वेतं तीर्थवारि ससर्षपम्
राजदन्तं सकुमुदं तथैवोशीरगुग्गुलम्
एतत्सर्वं विनिक्षिप्य कुम्भेष्वावाहयेत्सुरान्
sphaṭikaṃ candanaṃ śvetaṃ tīrthavāri sasarṣapam
rājadantaṃ sakumudaṃ tathaivośīraguggulam
etatsarvaṃ vinikṣipya kumbheṣvāvāhayetsurān
- 8
सर्वे समुद्राः सरितस्तीर्थानि जलदा नदाः
आयान्तु यजमानस्य दुरितक्षयकारकाः
sarve samudrāḥ saritastīrthāni jaladā nadāḥ
āyāntu yajamānasya duritakṣayakārakāḥ
- 9
योऽसौ वज्रधरो देव आदित्यानां प्रभुर्मतः
सहस्रनयनश्चेन्द्रो ग्रहपीडां व्यपोहतु
yo'sau vajradharo deva ādityānāṃ prabhurmataḥ
sahasranayanaścendro grahapīḍāṃ vyapohatu
- 10
मुखं यः सर्वदेवानां सप्तार्चिरमितद्युतिः
चन्द्रोपरागसम्भूतामग्निः पीडां व्यपोहतु
mukhaṃ yaḥ sarvadevānāṃ saptārciramitadyutiḥ
candroparāgasambhūtāmagniḥ pīḍāṃ vyapohatu
- 11
यः कर्मसाक्षी भूतानां धर्मो महिषवाहनः
यमश्चन्द्रोपरागोत्थां मम पीडां व्यपोहतु
yaḥ karmasākṣī bhūtānāṃ dharmo mahiṣavāhanaḥ
yamaścandroparāgotthāṃ mama pīḍāṃ vyapohatu
- 12
स रक्षोगणाधिपः साक्षात्प्रलयानलसंनिभः
खड्गव्यग्रो ऽतिभीमश्च रक्षःपीडां व्यपोहतु
sa rakṣogaṇādhipaḥ sākṣātpralayānalasaṃnibhaḥ
khaḍgavyagro 'tibhīmaśca rakṣaḥpīḍāṃ vyapohatu
- 13
नागपाशधरो देवः साक्षान्मकरवाहनः
स जलाधिपतिश्चन्द्रग्रहपीडां व्यपोहतु
nāgapāśadharo devaḥ sākṣānmakaravāhanaḥ
sa jalādhipatiścandragrahapīḍāṃ vyapohatu
- 14
प्राणरूपेण यो लोकान्पाति कृष्णमृगप्रियः
वायुश्चन्द्रोपरागोत्थां पीडामत्र व्यपोहतु
prāṇarūpeṇa yo lokānpāti kṛṣṇamṛgapriyaḥ
vāyuścandroparāgotthāṃ pīḍāmatra vyapohatu
- 15
योऽसौ निधिपतिर्देवः खड्गशूलगदाधरः
चन्द्रोपरागकलुषं धनदो मे व्यपोहतु
yo'sau nidhipatirdevaḥ khaḍgaśūlagadādharaḥ
candroparāgakaluṣaṃ dhanado me vyapohatu
- 16
योऽसाविन्दुधरो देवः पिनाकी वृषवाहनः
चन्द्रोपरागजां पीडां विनाशयतु शंकरः
yo'sāvindudharo devaḥ pinākī vṛṣavāhanaḥ
candroparāgajāṃ pīḍāṃ vināśayatu śaṃkaraḥ
- 17
त्रैलोक्ये यानि भूतानि स्थावराणि चराणि च
ब्रह्मविष्ण्वर्कयुक्तानि तानि पापं दहन्तु वै
trailokye yāni bhūtāni sthāvarāṇi carāṇi ca
brahmaviṣṇvarkayuktāni tāni pāpaṃ dahantu vai
- 18
एवमामन्त्र्य तैः कुम्भैरभिषिक्तो गुणान्वितैः
ऋग्यजुःसाममन्त्रैश्च शुक्लमाल्यानुलेपनैः
पूजयेद्वस्त्रगोदानैर्ब्राह्मणानिष्टदेवताः
evamāmantrya taiḥ kumbhairabhiṣikto guṇānvitaiḥ
ṛgyajuḥsāmamantraiśca śuklamālyānulepanaiḥ
pūjayedvastragodānairbrāhmaṇāniṣṭadevatāḥ
- 19
एतानेव ततो मन्त्रान्विलिखेत्करकान्वितान्
वस्त्रपट्टेऽथवा पद्मे पञ्चरत्नसमन्वितान्
etāneva tato mantrānvilikhetkarakānvitān
vastrapaṭṭe'thavā padme pañcaratnasamanvitān
- 20
यजमानस्य शिरसि निदध्युस्ते द्विजोत्तमाः
ततोऽतिवाहयेद्वेलामुपरागानुगामिनीम्
yajamānasya śirasi nidadhyuste dvijottamāḥ
tato'tivāhayedvelāmuparāgānugāminīm
- 21
प्राङ्मुखः पूजयित्वा तु नमस्यन्निष्टदेवताम्
चन्द्रग्रहे विनिर्वृत्ते कृतगोदानमङ्गलः
कृतस्नानाय तं पट्टं ब्राह्मणाय निवेदयेत्
prāṅmukhaḥ pūjayitvā tu namasyanniṣṭadevatām
candragrahe vinirvṛtte kṛtagodānamaṅgalaḥ
kṛtasnānāya taṃ paṭṭaṃ brāhmaṇāya nivedayet
- 22
अनेन विधिना यस्तु ग्रहस्नानं समाचरेत्
न तस्य ग्रहपीडा स्यान्न च बन्धुजनक्षयः
anena vidhinā yastu grahasnānaṃ samācaret
na tasya grahapīḍā syānna ca bandhujanakṣayaḥ
- 23
परमां सिद्धिमाप्नोति पुनरावृत्तिदुर्लभाम्
सूर्यग्रहे सूर्यनाम सदा मन्त्रेषु कीर्तयेत्
paramāṃ siddhimāpnoti punarāvṛttidurlabhām
sūryagrahe sūryanāma sadā mantreṣu kīrtayet
- 24
अधिकाः पद्मरागाः स्युः कपिलां च सुशोभनाम्
प्रयच्छेच्च निशां पत्ये चन्द्रसूर्योपरागयोः
adhikāḥ padmarāgāḥ syuḥ kapilāṃ ca suśobhanām
prayacchecca niśāṃ patye candrasūryoparāgayoḥ
- 25
य इदं शृणुयान्नित्यं श्रावयेद्वापि मानवः
सर्वपापविनिर्मुक्तः शक्रलोके महीयते
ya idaṃ śṛṇuyānnityaṃ śrāvayedvāpi mānavaḥ
sarvapāpavinirmuktaḥ śakraloke mahīyate

