28 shlokas
- 1
सूत उवाच
अशीलेषु प्रदुष्टेषु दानवेषु दुरात्मसु
लोकेषूत्साद्यमानेषु तपोधनवनेषु च
sūta uvāca
aśīleṣu praduṣṭeṣu dānaveṣu durātmasu
lokeṣūtsādyamāneṣu tapodhanavaneṣu ca
- 2
सिंहनादे व्योमगानां तेषु भीतेषु जन्तुषु
त्रैलोक्ये भयसंमूढे तमोन्धन्वम् उपागते
siṃhanāde vyomagānāṃ teṣu bhīteṣu jantuṣu
trailokye bhayasaṃmūḍhe tamondhanvam upāgate
- 3
आदित्या वसवः साध्याः पितरो मरुतां गणाः
भीताः शरणमाजग्मुर्ब्रह्माणां प्रपितामहम्
ādityā vasavaḥ sādhyāḥ pitaro marutāṃ gaṇāḥ
bhītāḥ śaraṇamājagmurbrahmāṇāṃ prapitāmaham
- 4
ते तं स्वर्णोत्पलासीनं ब्रह्माणं समुपागताः
नेमुरूचुश्च सहिताः पञ्चास्यं चतुराननम्
te taṃ svarṇotpalāsīnaṃ brahmāṇaṃ samupāgatāḥ
nemurūcuśca sahitāḥ pañcāsyaṃ caturānanam
- 5
वरगुप्तास्तवैवेह दानवास्त्रिपुरालयाः
बाधन्तेऽस्मान्यथा प्रेष्याननुशाधि ततो ऽनघ
varaguptāstavaiveha dānavāstripurālayāḥ
bādhante'smānyathā preṣyānanuśādhi tato 'nagha
- 6
मेघागमे यथा हंसा मृगाः सिंहभयादिव
दानवानां भयात्तद्वद्भ्रमामो हि पितामह
meghāgame yathā haṃsā mṛgāḥ siṃhabhayādiva
dānavānāṃ bhayāttadvadbhramāmo hi pitāmaha
- 7
पुत्राणां नामधेयानि कलत्राणां तथैव च
दानवैर्भ्राम्यमाणानां विस्मृतानि ततो ऽनघ
putrāṇāṃ nāmadheyāni kalatrāṇāṃ tathaiva ca
dānavairbhrāmyamāṇānāṃ vismṛtāni tato 'nagha
- 8
देववेश्मप्रभङ्गाश्च आश्रमभ्रंशनानि च
दानवैर्लोममोहान्धैः क्रियन्ते च भ्रमन्ति च
devaveśmaprabhaṅgāśca āśramabhraṃśanāni ca
dānavairlomamohāndhaiḥ kriyante ca bhramanti ca
- 9
यदि न त्रायसे लोकं दानवैर्विद्रुतं द्रुतम्
धर्षणानेन निर्देवं निर्मनुष्याश्रमं जगत्
yadi na trāyase lokaṃ dānavairvidrutaṃ drutam
dharṣaṇānena nirdevaṃ nirmanuṣyāśramaṃ jagat
- 10
इत्येवं त्रिदशैरुक्तः पद्मयोनिः पितामहः
प्रत्याह त्रिदशान्सेन्द्रान् इन्दुतुल्याननः प्रभुः
ityevaṃ tridaśairuktaḥ padmayoniḥ pitāmahaḥ
pratyāha tridaśānsendrān indutulyānanaḥ prabhuḥ
- 11
भयस्य यो वरो दत्तो मया मतिमतां वराः
तस्यान्त एष सम्प्राप्तो यः पुरोक्तो मया सुराः
bhayasya yo varo datto mayā matimatāṃ varāḥ
tasyānta eṣa samprāpto yaḥ purokto mayā surāḥ
- 12
तच्च तेषामधिष्ठानं त्रिपुरं त्रिदशर्षभाः
एकेषुपातमोक्षेण हन्तव्यं नेषुवृष्टिभिः
tacca teṣāmadhiṣṭhānaṃ tripuraṃ tridaśarṣabhāḥ
ekeṣupātamokṣeṇa hantavyaṃ neṣuvṛṣṭibhiḥ
- 13
भवतां च न पश्यामि कमप्यत्र सुरर्षभाः
यस्तु चैकप्रहारेण पुरं हन्यात्सदानवम्
bhavatāṃ ca na paśyāmi kamapyatra surarṣabhāḥ
yastu caikaprahāreṇa puraṃ hanyātsadānavam
- 14
त्रिपुरं नाल्पवीर्येण शक्यं हन्तुं शरेण तु
एकं मुक्त्वा महादेवं महेशानं प्रजापतिम्
tripuraṃ nālpavīryeṇa śakyaṃ hantuṃ śareṇa tu
ekaṃ muktvā mahādevaṃ maheśānaṃ prajāpatim
- 15
ते यूयं यदि अन्ये च क्रतुविध्वंसकं हरम्
याचामः सहिता देवं त्रिपुरं स हनिष्यति
te yūyaṃ yadi anye ca kratuvidhvaṃsakaṃ haram
yācāmaḥ sahitā devaṃ tripuraṃ sa haniṣyati
- 16
कृतः पुराणां विष्कम्भो योजमानां शतं शतम्
यथा चैकप्रहारेण हते वै भवेन तु
पुष्ययोगेण युक्तानि तानि चैकक्षणेन तु
kṛtaḥ purāṇāṃ viṣkambho yojamānāṃ śataṃ śatam
yathā caikaprahāreṇa hate vai bhavena tu
puṣyayogeṇa yuktāni tāni caikakṣaṇena tu
- 17
ततो देवैश्च सम्प्रोक्तो यास्याम इति दुःखितैः
पितामहश्च तैः सार्धं भवसंसदमागतः
tato devaiśca samprokto yāsyāma iti duḥkhitaiḥ
pitāmahaśca taiḥ sārdhaṃ bhavasaṃsadamāgataḥ
- 18
तं भवं भूतभव्येशं गिरिशं शूलपाणिनम्
पश्यन्ति चोमया सार्धं नन्दिना च महात्मना
taṃ bhavaṃ bhūtabhavyeśaṃ giriśaṃ śūlapāṇinam
paśyanti comayā sārdhaṃ nandinā ca mahātmanā
- 19
अग्निवर्णमजं देवमग्निकुण्डनिभेक्षणम्
अग्न्यादित्यसहस्राभम् अग्निवर्णविभूषितम्
agnivarṇamajaṃ devamagnikuṇḍanibhekṣaṇam
agnyādityasahasrābham agnivarṇavibhūṣitam
- 20
चन्द्रावयवलक्ष्माणं चन्द्रसौम्यतराननम्
आगम्य तमजं देवमथ तं नीललोहितम्
अस्तुवन्गोपतिं शम्भुं वरदं पार्वतीपतिम्
candrāvayavalakṣmāṇaṃ candrasaumyatarānanam
āgamya tamajaṃ devamatha taṃ nīlalohitam
astuvangopatiṃ śambhuṃ varadaṃ pārvatīpatim
- 21
देवा ऊचुः
नमो भवाय शर्वाय रुद्राय वरदाय च
पशूनां पतये नित्यमुग्राय च कपर्दिने
devā ūcuḥ
namo bhavāya śarvāya rudrāya varadāya ca
paśūnāṃ pataye nityamugrāya ca kapardine
- 22
महादेवाय भीमाय त्र्यम्बकाय च शान्तये
ईशानाय भयघ्नाय नमस्त्वन्धकघातिने
mahādevāya bhīmāya tryambakāya ca śāntaye
īśānāya bhayaghnāya namastvandhakaghātine
- 23
नीलग्रीवाय भीमाय वेधसे वेधसा स्तुते
कुमारशत्रुनिघ्नाय कुमारजनकाय च
nīlagrīvāya bhīmāya vedhase vedhasā stute
kumāraśatrunighnāya kumārajanakāya ca
- 24
विलोहिताय धूम्राय वराय क्रथनाय च
नित्यं नीलशिखण्डाय शूलिने दिव्यशायिने
vilohitāya dhūmrāya varāya krathanāya ca
nityaṃ nīlaśikhaṇḍāya śūline divyaśāyine
- 25
उरगाय त्रिनेत्राय हिरण्यवसुरेतसे
अचिन्त्यायाम्बिकाभर्त्रे सर्वदेवस्तुताय च
uragāya trinetrāya hiraṇyavasuretase
acintyāyāmbikābhartre sarvadevastutāya ca
- 26
वृषध्वजाय मुण्डाय जटिने ब्रह्मचारिणे
तप्यमानाय सलिले ब्रह्मण्यायाजिताय च
vṛṣadhvajāya muṇḍāya jaṭine brahmacāriṇe
tapyamānāya salile brahmaṇyāyājitāya ca
- 27
विश्वात्मने विश्वसृजे विश्वमावृत्य तिष्ठते
नमोऽस्तु दिव्यरूपाय प्रभवे दिव्यशम्भवे
viśvātmane viśvasṛje viśvamāvṛtya tiṣṭhate
namo'stu divyarūpāya prabhave divyaśambhave
- 28
अभिगम्याय काम्याय स्तुत्यायार्च्याय सर्वदा
भक्तानुकम्पिने नित्यं दिशते यन्मनोगतम्
abhigamyāya kāmyāya stutyāyārcyāya sarvadā
bhaktānukampine nityaṃ diśate yanmanogatam

