38 shlokas
- 1
सूत उवाच
ततो दृष्ट्वा महात्मानं कालचक्रमिवागतम्
नरसिंहवपुश्छन्नं भस्मच्छन्नमिवानलम्
sūta uvāca
tato dṛṣṭvā mahātmānaṃ kālacakramivāgatam
narasiṃhavapuśchannaṃ bhasmacchannamivānalam
- 2
हिरण्यकशिपोः पुत्रः प्रह्लादो नाम वीर्यवान्
दिव्येन चक्षुषा सिंहमपश्यद्देवमागतम्
hiraṇyakaśipoḥ putraḥ prahlādo nāma vīryavān
divyena cakṣuṣā siṃhamapaśyaddevamāgatam
- 3
ते दृष्ट्वा रुक्मशैलाभमपूर्वां तनुमाश्रितम्
विस्मिता दानवाः सर्वे हिरण्यकशिपुश्च सः
te dṛṣṭvā rukmaśailābhamapūrvāṃ tanumāśritam
vismitā dānavāḥ sarve hiraṇyakaśipuśca saḥ
- 4
प्रह्लाद उवाच
महाबाहो महाराज दैत्यानामादिसंभव
न श्रुतं न च नो दृष्टं नारसिंहमिदं वपुः
prahlāda uvāca
mahābāho mahārāja daityānāmādisaṃbhava
na śrutaṃ na ca no dṛṣṭaṃ nārasiṃhamidaṃ vapuḥ
- 5
अव्यक्तप्रभवं दिव्यं किमिदं रूपमागतम्
दैत्यान्तकरणं घोरं संशतीव मनो मम
avyaktaprabhavaṃ divyaṃ kimidaṃ rūpamāgatam
daityāntakaraṇaṃ ghoraṃ saṃśatīva mano mama
- 6
अस्य देवाः शरीरस्थाः सागराः सरितश्च याः
हिमवान्पारियात्रश्च ये चान्ये कुलपर्वताः
asya devāḥ śarīrasthāḥ sāgarāḥ saritaśca yāḥ
himavānpāriyātraśca ye cānye kulaparvatāḥ
- 7
चन्द्रमाश्च सनक्षत्रैरादित्यैर्वसुभिः सह
धनदो वरुणश्चैव यमः शक्रः शचीपतिः
candramāśca sanakṣatrairādityairvasubhiḥ saha
dhanado varuṇaścaiva yamaḥ śakraḥ śacīpatiḥ
- 8
मरुतो देवगन्धर्वा ऋषयश्च तपोधनाः
नागा यक्षाः पिशाचाश्च राक्षसा भीमविक्रमाः
maruto devagandharvā ṛṣayaśca tapodhanāḥ
nāgā yakṣāḥ piśācāśca rākṣasā bhīmavikramāḥ
- 9
ब्रह्मा देवः पशुपतिर्ललाटस्था भ्रमन्ति वै
स्थावराणि च सर्वाणि जङ्गमानि तथैव च
brahmā devaḥ paśupatirlalāṭasthā bhramanti vai
sthāvarāṇi ca sarvāṇi jaṅgamāni tathaiva ca
- 10
भवांश्च सहितोऽस्माभिः सर्वैर्दैत्यगणैर्वृतः
विमानशतसंकीर्णा तथैव भवतः सभा
bhavāṃśca sahito'smābhiḥ sarvairdaityagaṇairvṛtaḥ
vimānaśatasaṃkīrṇā tathaiva bhavataḥ sabhā
- 11
सर्वं त्रिभुवनं राजꣳल्लोकधर्माश्च शाश्वताः
दृश्यन्ते नारसिंहेऽस्मिंस्तथेदमखिलं जगत्
sarvaṃ tribhuvanaṃ rājam̐llokadharmāśca śāśvatāḥ
dṛśyante nārasiṃhe'smiṃstathedamakhilaṃ jagat
- 12
प्रजापतिश्चात्र मनुर्महात्मा ग्रहाश्च योगाश्च महीरुहाश्च
उत्पातकालश्च धृतिर्मतिश्च रतिश्च सत्यं च तपो दमश्च
prajāpatiścātra manurmahātmā grahāśca yogāśca mahīruhāśca
utpātakālaśca dhṛtirmatiśca ratiśca satyaṃ ca tapo damaśca
- 13
सनत्कुमारश्च महानुभावो विश्वे च देवा ऋषयश्च सर्वे
क्रोधश्च कामश्च तथैव हर्षो धर्मश्च मोहः पितरश्च सर्वे
sanatkumāraśca mahānubhāvo viśve ca devā ṛṣayaśca sarve
krodhaśca kāmaśca tathaiva harṣo dharmaśca mohaḥ pitaraśca sarve
- 14
प्रह्लादस्य वचः श्रुत्वा हिरण्यकशिपुः प्रभुः
उवाच दानवान्सर्वान्गणांश्च स गणाधिपः
prahlādasya vacaḥ śrutvā hiraṇyakaśipuḥ prabhuḥ
uvāca dānavānsarvāngaṇāṃśca sa gaṇādhipaḥ
- 15
मृगेन्द्रो गृह्यतामेष अपूर्वां तनुमास्थितः
यदि वा संशयः कश्चिद्वध्यतां वनगोचरः
mṛgendro gṛhyatāmeṣa apūrvāṃ tanumāsthitaḥ
yadi vā saṃśayaḥ kaścidvadhyatāṃ vanagocaraḥ
- 16
ते दानवगणा सर्वे मृगेन्द्रं भीमविक्रमम्
परिक्षिपन्तो मुदितास्त्रासयामासुरोजसा
te dānavagaṇā sarve mṛgendraṃ bhīmavikramam
parikṣipanto muditāstrāsayāmāsurojasā
- 17
सिंहनादं विमुच्याथ नरसिंहो महाबलः
बभञ्ज तां सभां दिव्यां व्यादितास्य इवान्तकः
siṃhanādaṃ vimucyātha narasiṃho mahābalaḥ
babhañja tāṃ sabhāṃ divyāṃ vyāditāsya ivāntakaḥ
- 18
सभायां भज्यमानायां हिरण्यकशिपुः स्वयम्
चिक्षेपास्त्राणि सिंहस्य रोषाद्व्याकुललोचनः
sabhāyāṃ bhajyamānāyāṃ hiraṇyakaśipuḥ svayam
cikṣepāstrāṇi siṃhasya roṣādvyākulalocanaḥ
- 19
सर्वास्त्राणामथ ज्येष्ठं दण्डमन्त्रं सुदारुणम्
कालचक्रं तथाघोरं विष्णुचक्रं तथा परम्
sarvāstrāṇāmatha jyeṣṭhaṃ daṇḍamantraṃ sudāruṇam
kālacakraṃ tathāghoraṃ viṣṇucakraṃ tathā param
- 20
पैतामहं तथात्युग्रं त्रैलोक्यदहनं महत्
विचित्रामशनीं चैव शुष्कार्द्रं चाशनिद्वयम्
paitāmahaṃ tathātyugraṃ trailokyadahanaṃ mahat
vicitrāmaśanīṃ caiva śuṣkārdraṃ cāśanidvayam
- 21
रौद्रं तथोग्रं शूलं च कङ्कालं मुसलं तथा
मोहनं शोषणं चैव संतापनविलापनम्
raudraṃ tathograṃ śūlaṃ ca kaṅkālaṃ musalaṃ tathā
mohanaṃ śoṣaṇaṃ caiva saṃtāpanavilāpanam
- 22
वायव्यं मथनं चैव कापालमथ कैङ्करम्
तथाप्रतिहतां शक्तिं क्रौञ्चमस्त्रं तथैव च
vāyavyaṃ mathanaṃ caiva kāpālamatha kaiṅkaram
tathāpratihatāṃ śaktiṃ krauñcamastraṃ tathaiva ca
- 23
अस्त्रं ब्रह्मशिरश्चैव सोमास्त्रं शिशिरं तथा
कम्पनं शातनं चैव त्वाष्ट्रं चैव सुभैरवम्
astraṃ brahmaśiraścaiva somāstraṃ śiśiraṃ tathā
kampanaṃ śātanaṃ caiva tvāṣṭraṃ caiva subhairavam
- 24
कालमुद्गरम् अक्षोभ्यं तपनं च महाबलम्
संवर्तनं मोहनं च तथा मायाधरं परम्
kālamudgaram akṣobhyaṃ tapanaṃ ca mahābalam
saṃvartanaṃ mohanaṃ ca tathā māyādharaṃ param
- 25
गान्धर्वमस्त्रं दयितमसिरत्नं च नन्दकम्
प्रस्वापनं प्रमथनं वारुणं चास्त्रमुत्तमम्
अस्त्रं पाशुपतं चैव यस्याप्रतिहता गतिः
gāndharvamastraṃ dayitamasiratnaṃ ca nandakam
prasvāpanaṃ pramathanaṃ vāruṇaṃ cāstramuttamam
astraṃ pāśupataṃ caiva yasyāpratihatā gatiḥ
- 26
अस्त्रं हयशिरश्चैव ब्राह्ममस्त्रं तथैव च
नारायणास्त्रमैन्द्रं च सार्पमस्त्रं तथाद्भुतम्
astraṃ hayaśiraścaiva brāhmamastraṃ tathaiva ca
nārāyaṇāstramaindraṃ ca sārpamastraṃ tathādbhutam
- 27
पैशाचमस्त्रमजितं शोषदं शामनं तथा
महाबलं भावनं च प्रस्थापनविकम्पने
paiśācamastramajitaṃ śoṣadaṃ śāmanaṃ tathā
mahābalaṃ bhāvanaṃ ca prasthāpanavikampane
- 28
एतान्यस्त्राणि दिव्यानि हिरण्यकशिपुस्तदा
असृजन्नरसिंहस्य दीप्तस्याग्नेरिवाहुतिम्
etānyastrāṇi divyāni hiraṇyakaśipustadā
asṛjannarasiṃhasya dīptasyāgnerivāhutim
- 29
अस्त्रैः प्रज्वलितैः सिंहमावृणोदसुरोत्तमः
विवस्वान्घर्मसमये हिमवन्तमिवांशुभिः
astraiḥ prajvalitaiḥ siṃhamāvṛṇodasurottamaḥ
vivasvāngharmasamaye himavantamivāṃśubhiḥ
- 30
स ह्यमर्षानिलोद्भूतो दैत्यानां सैन्यसागरः
क्षणेन प्लावयामास मैनाकमिव सागरः
sa hyamarṣānilodbhūto daityānāṃ sainyasāgaraḥ
kṣaṇena plāvayāmāsa mainākamiva sāgaraḥ

