13 shlokas
- 1
ईश्वर उवाच
अन्यामपि प्रवक्ष्यामि नाम्ना तु फलसप्तमीम्
यामुपोष्य नरः पापाद्विमुक्तः स्वर्गभाग्भवेत्
īśvara uvāca
anyāmapi pravakṣyāmi nāmnā tu phalasaptamīm
yāmupoṣya naraḥ pāpādvimuktaḥ svargabhāgbhavet
- 2
मार्गशीर्षे शुभे मासि सप्तम्यां नियतव्रतः
तामुपोष्याथ कमलं कारयित्वा तु काञ्चनम्
mārgaśīrṣe śubhe māsi saptamyāṃ niyatavrataḥ
tāmupoṣyātha kamalaṃ kārayitvā tu kāñcanam
- 3
शर्करासंयुतं दद्याद्ब्राह्मणाय कुटुम्बिने
रविं काञ्चनकं कृत्वा पलस्यैकस्य धर्मवित्
दद्याद्द्विकालवेलायां भानुर्मे प्रीयतामिति
śarkarāsaṃyutaṃ dadyādbrāhmaṇāya kuṭumbine
raviṃ kāñcanakaṃ kṛtvā palasyaikasya dharmavit
dadyāddvikālavelāyāṃ bhānurme prīyatāmiti
- 4
भक्त्या तु विप्रान्सम्पूज्य चाष्टम्यां क्षीरभोजनम्
दत्त्वा कुर्यात्फलयुतं यावत्स्यात्कृष्णेसप्तमी
bhaktyā tu viprānsampūjya cāṣṭamyāṃ kṣīrabhojanam
dattvā kuryātphalayutaṃ yāvatsyātkṛṣṇesaptamī
- 5
तामप्युपोष्य विधिवदनेनैव क्रमेण तु
तद्वद्धैमफलं दत्त्वा सुवर्णकमलान्वितम्
tāmapyupoṣya vidhivadanenaiva krameṇa tu
tadvaddhaimaphalaṃ dattvā suvarṇakamalānvitam
- 6
शर्करापात्रसंयुक्तं वस्त्रमाल्यसमन्वितम्
संवत्सरं च तेनैव विधिनोभयसप्तमीम्
śarkarāpātrasaṃyuktaṃ vastramālyasamanvitam
saṃvatsaraṃ ca tenaiva vidhinobhayasaptamīm
- 7
उपोष्य दत्त्वा क्रमशः सूर्यमन्त्रमुदीरयेत्
भानुरर्को रविर्ब्रह्मा सूर्यः शक्रो हरिः शिवः
श्रीमान्विभावसुस्त्वष्टा वरुणः प्रीयतामिति
upoṣya dattvā kramaśaḥ sūryamantramudīrayet
bhānurarko ravirbrahmā sūryaḥ śakro hariḥ śivaḥ
śrīmānvibhāvasustvaṣṭā varuṇaḥ prīyatāmiti
- 8
प्रतिमासं च सप्तम्यामेकैकं नाम कीर्तयेत्
प्रतिपक्षं फलत्यागमेतत्कुर्वन्समाचरेत्
pratimāsaṃ ca saptamyāmekaikaṃ nāma kīrtayet
pratipakṣaṃ phalatyāgametatkurvansamācaret
- 9
व्रतान्ते विप्रमिथुनं पूजयेद्वस्त्रभूषणैः
शर्कराकलशं दद्याद्धेमपद्मदलान्वितम्
vratānte vipramithunaṃ pūjayedvastrabhūṣaṇaiḥ
śarkarākalaśaṃ dadyāddhemapadmadalānvitam
- 10
यथा न विफलाः कामास्त्वद्भक्तानां सदा रवे
तथानन्तफलावाप्तिरस्तु मे सप्तजन्मसु
yathā na viphalāḥ kāmāstvadbhaktānāṃ sadā rave
tathānantaphalāvāptirastu me saptajanmasu
- 11
इमामनन्तफलदां यः कुर्यात्फलसप्तमीम्
सर्वपापविशुद्धात्मा सूर्यलोके महीयते
imāmanantaphaladāṃ yaḥ kuryātphalasaptamīm
sarvapāpaviśuddhātmā sūryaloke mahīyate
- 12
सुरापानादिकं किंचिद्यदत्रामुत्र वा कृतम्
तत्सर्वं नाशमायाति यः कुर्यात्फलसप्तमीम्
surāpānādikaṃ kiṃcidyadatrāmutra vā kṛtam
tatsarvaṃ nāśamāyāti yaḥ kuryātphalasaptamīm
- 13
कुर्वाणः सप्तमीं चेमां सततं रोगवर्जितः
भूतान्भव्यांश्च पुरुषांस्तारयेदेकविंशतिम्
यः शृणोति पठेद्वापि सोऽपि कल्याणभाग्भवेत्
kurvāṇaḥ saptamīṃ cemāṃ satataṃ rogavarjitaḥ
bhūtānbhavyāṃśca puruṣāṃstārayedekaviṃśatim
yaḥ śṛṇoti paṭhedvāpi so'pi kalyāṇabhāgbhavet

