20 shlokas
- 1
ब्रह्मोवाच
भगवन्भवसंसारसागरोत्तारकारक
किंचिद्व्रतं समाचक्ष्व स्वर्गारोग्यसुखप्रदम्
brahmovāca
bhagavanbhavasaṃsārasāgarottārakāraka
kiṃcidvrataṃ samācakṣva svargārogyasukhapradam
- 2
ईश्वर उवाच
सौरं धर्मं प्रवक्ष्यामि नाम्ना कल्याणसप्तमीम्
विशोकसप्तमीं तद्वत्फलाढ्यां पापनाशिनीम्
īśvara uvāca
sauraṃ dharmaṃ pravakṣyāmi nāmnā kalyāṇasaptamīm
viśokasaptamīṃ tadvatphalāḍhyāṃ pāpanāśinīm
- 3
शर्करासप्तमीं पुण्यां तथा कमलसप्तमीम्
मन्दारसप्तमीं तद्वच्छुभदां शुभसप्तमीम्
śarkarāsaptamīṃ puṇyāṃ tathā kamalasaptamīm
mandārasaptamīṃ tadvacchubhadāṃ śubhasaptamīm
- 4
सर्वानन्तफलाः प्रोक्ताः सर्वा देवर्षिपूजिताः
विधानमासां वक्ष्यामि यथावदनुपूर्वशः
sarvānantaphalāḥ proktāḥ sarvā devarṣipūjitāḥ
vidhānamāsāṃ vakṣyāmi yathāvadanupūrvaśaḥ
- 5
यदा तु शुक्लसप्तम्यामादित्यस्य दिनं भवेत्
सा तु कल्याणिनी नाम विजया च निगद्यते
yadā tu śuklasaptamyāmādityasya dinaṃ bhavet
sā tu kalyāṇinī nāma vijayā ca nigadyate
- 6
प्रातर्गव्येन पयसा स्नानमस्यां समाचरेत्
ततः शुक्लाम्बरः पद्ममक्षताभिः प्रकल्पयेत्
prātargavyena payasā snānamasyāṃ samācaret
tataḥ śuklāmbaraḥ padmamakṣatābhiḥ prakalpayet
- 7
प्राङ्मुखो ऽष्टदलं मध्ये तद्वद्वृत्तां च कर्णिकाम्
पुष्पाक्षताभिर्देवेशं विन्यसेत्सर्वतः क्रमात्
prāṅmukho 'ṣṭadalaṃ madhye tadvadvṛttāṃ ca karṇikām
puṣpākṣatābhirdeveśaṃ vinyasetsarvataḥ kramāt
- 8
पूर्वेण तपनायेति मार्तण्डायेति चानले
याम्ये दिवाकरायेति विधात्र इति नैरृते
pūrveṇa tapanāyeti mārtaṇḍāyeti cānale
yāmye divākarāyeti vidhātra iti nairṛte
- 9
पश्चिमे वरुणायेति भास्करायेति चानिले
सौम्ये विकर्तनायेति रवये चाष्टमे दले
paścime varuṇāyeti bhāskarāyeti cānile
saumye vikartanāyeti ravaye cāṣṭame dale
- 10
आदावन्ते च मध्ये च नमोऽस्तु परमात्मने
मन्त्रैरेभिः समभ्यर्च्य नमस्कारान्तदीपितैः
ādāvante ca madhye ca namo'stu paramātmane
mantrairebhiḥ samabhyarcya namaskārāntadīpitaiḥ
- 11
शुक्लवस्त्रैः फलैर्भक्ष्यैर्धूपमाल्यानुलेपनैः
स्थण्डिले पूजयेद्भक्त्या गुडेन लवणेन च
śuklavastraiḥ phalairbhakṣyairdhūpamālyānulepanaiḥ
sthaṇḍile pūjayedbhaktyā guḍena lavaṇena ca
- 12
ततो व्याहृतिमन्त्रेण विसृजेद्द्विजपुंगवान्
शक्तितः पूजयेद्भक्त्या गुडक्षीरघृतादिभिः
तिलपात्रं हिरण्यं च ब्राह्मणाय निवेदयेत्
tato vyāhṛtimantreṇa visṛjeddvijapuṃgavān
śaktitaḥ pūjayedbhaktyā guḍakṣīraghṛtādibhiḥ
tilapātraṃ hiraṇyaṃ ca brāhmaṇāya nivedayet
- 13
एवं नियमकृत्सुप्त्वा प्रातरुत्थाय मानवः
कृतस्नानजपो विप्रैः सहैव घृतपायसम्
evaṃ niyamakṛtsuptvā prātarutthāya mānavaḥ
kṛtasnānajapo vipraiḥ sahaiva ghṛtapāyasam
- 14
भुक्त्वा च वेदविदुषे बिडालव्रतवर्जिते
घृतपात्रं सकनकं सोदकुम्भं निवेदयेत्
bhuktvā ca vedaviduṣe biḍālavratavarjite
ghṛtapātraṃ sakanakaṃ sodakumbhaṃ nivedayet
- 15
प्रीयतामत्र भगवान्परमात्मा दिवाकरः
अनेन विधिना सर्वं मासि मासि व्रतं चरेत्
prīyatāmatra bhagavānparamātmā divākaraḥ
anena vidhinā sarvaṃ māsi māsi vrataṃ caret
- 16
ततस्त्रयोदशे मासि गा वै दद्यात्त्रयोदश
वस्त्रालंकारसंयुक्ताः सुवर्णास्याः पयस्विनीः
tatastrayodaśe māsi gā vai dadyāttrayodaśa
vastrālaṃkārasaṃyuktāḥ suvarṇāsyāḥ payasvinīḥ
- 17
एकामपि प्रदद्याद्वा वित्तहीनो विमत्सरः
न वित्तशाठ्यं कुर्वीत यतो मोहात्पतत्यधः
ekāmapi pradadyādvā vittahīno vimatsaraḥ
na vittaśāṭhyaṃ kurvīta yato mohātpatatyadhaḥ
- 18
अनेन विधिना यस्तु कुर्यात्कल्याणसप्तमीम्
सर्वपापविनिर्मुक्तः सूर्यलोके महीयते
आयुरारोग्यमैश्वर्यमनन्तमिह जायते
anena vidhinā yastu kuryātkalyāṇasaptamīm
sarvapāpavinirmuktaḥ sūryaloke mahīyate
āyurārogyamaiśvaryamanantamiha jāyate
- 19
सर्वपापहरा नित्यं सर्वदैवतपूजिता
सर्वदुष्टोपशमनी सदा कल्याणसप्तमी
sarvapāpaharā nityaṃ sarvadaivatapūjitā
sarvaduṣṭopaśamanī sadā kalyāṇasaptamī
- 20
इमामनन्तफलदां यस्तु कल्याणसप्तमीम्
शृणोति पठते चेह सर्वपापैः प्रमुच्यते
imāmanantaphaladāṃ yastu kalyāṇasaptamīm
śṛṇoti paṭhate ceha sarvapāpaiḥ pramucyate

