18 shlokas
- 1
मत्स्य उवाच
अथ योगवतां श्रेष्ठमसृजद्भूरितेजसम्
स्रष्टारं सर्वलोकानां ब्रह्माणं सर्वतोमुखम्
matsya uvāca
atha yogavatāṃ śreṣṭhamasṛjadbhūritejasam
sraṣṭāraṃ sarvalokānāṃ brahmāṇaṃ sarvatomukham
- 2
यस्मिन्हिरण्मये पद्मे बहुयोजनविस्तृतम्
सर्वतेजोगुणमयं पार्थिवैर्लक्षणैर्वृतम्
yasminhiraṇmaye padme bahuyojanavistṛtam
sarvatejoguṇamayaṃ pārthivairlakṣaṇairvṛtam
- 3
तच्च पद्मं पुराणज्ञाः पृथिवीरूपमुत्तमम्
नारायणसमुद्भूतं प्रवदन्ति महर्षयः
tacca padmaṃ purāṇajñāḥ pṛthivīrūpamuttamam
nārāyaṇasamudbhūtaṃ pravadanti maharṣayaḥ
- 4
या पद्मा सा रसा देवी पृथिवी परिचक्ष्यते
ये पद्मसारगुरवस्तान्दिव्यान्पर्वतान्विदुः
yā padmā sā rasā devī pṛthivī paricakṣyate
ye padmasāraguravastāndivyānparvatānviduḥ
- 5
हिमवन्तं च मेरुं च नीलं निषधमेव च
कैलासं मुञ्जवन्तं च तथान्यं गन्धमादनम्
himavantaṃ ca meruṃ ca nīlaṃ niṣadhameva ca
kailāsaṃ muñjavantaṃ ca tathānyaṃ gandhamādanam
- 6
पुण्यं त्रिशिखरं चैव कान्तं मन्दरमेव च
उदयं पिञ्जरं चैव विन्ध्यवन्तं च पर्वतम्
puṇyaṃ triśikharaṃ caiva kāntaṃ mandarameva ca
udayaṃ piñjaraṃ caiva vindhyavantaṃ ca parvatam
- 7
एते देवगणानां च सिद्धानां च महात्मनाम्
आश्रयाः पुण्यशीलानां सर्वकामफलप्रदाः
ete devagaṇānāṃ ca siddhānāṃ ca mahātmanām
āśrayāḥ puṇyaśīlānāṃ sarvakāmaphalapradāḥ
- 8
एतेषामन्तरे देशो जम्बूद्वीप इति स्मृतः
जम्बूद्वीपस्य संस्थानं यज्ञिया यत्र वै क्रियाः
eteṣāmantare deśo jambūdvīpa iti smṛtaḥ
jambūdvīpasya saṃsthānaṃ yajñiyā yatra vai kriyāḥ
- 9
एभ्यो यत्स्रवते तोयं दिव्यामृतरसोपमम्
दिव्यास्तीर्थशताधाराः सुरम्याः सरितः स्मृताः
ebhyo yatsravate toyaṃ divyāmṛtarasopamam
divyāstīrthaśatādhārāḥ suramyāḥ saritaḥ smṛtāḥ
- 10
स्मृतानि यानि पद्मस्य केसराणि समन्ततः
असंख्येयाः पृथिव्यास्ते विश्वे वै धातुपर्वताः
smṛtāni yāni padmasya kesarāṇi samantataḥ
asaṃkhyeyāḥ pṛthivyāste viśve vai dhātuparvatāḥ
- 11
यानि पद्मस्य पर्णानि भूरीणि तु नराधिप
ते दुर्गमाः शैलचिता म्लेच्छदेशा विकल्पिताः
yāni padmasya parṇāni bhūrīṇi tu narādhipa
te durgamāḥ śailacitā mlecchadeśā vikalpitāḥ
- 12
यान्यधोभागपर्णानि ते निवासास्तु भागशः
दैत्यानामुरगाणां च पतङ्गानां च पार्थिव
yānyadhobhāgaparṇāni te nivāsāstu bhāgaśaḥ
daityānāmuragāṇāṃ ca pataṅgānāṃ ca pārthiva
- 13
तेषां महार्णवो यत्र तद्रसेत्यभिसंज्ञितम्
महापातककर्माणो मज्जन्ते यत्र मानवाः
teṣāṃ mahārṇavo yatra tadrasetyabhisaṃjñitam
mahāpātakakarmāṇo majjante yatra mānavāḥ
- 14
पद्मस्यान्तरतो यत्तदेकार्णवगता मही
प्रोक्ताथ दिक्षु सर्वासु चत्वारः सलिलाकराः
padmasyāntarato yattadekārṇavagatā mahī
proktātha dikṣu sarvāsu catvāraḥ salilākarāḥ
- 15
एवं नारायणस्यार्थे मही पुष्करसंभवा
प्रादुर्भावोऽप्ययं तस्मान्नाम्ना पुष्करसंज्ञितः
evaṃ nārāyaṇasyārthe mahī puṣkarasaṃbhavā
prādurbhāvo'pyayaṃ tasmānnāmnā puṣkarasaṃjñitaḥ
- 16
एतस्मात्कारणात्तज्ज्ञैः पुराणैः परमर्षिभिः
याज्ञिकैर्वेददृष्टान्तैर्यज्ञे पद्मविधिः स्मृतः
etasmātkāraṇāttajjñaiḥ purāṇaiḥ paramarṣibhiḥ
yājñikairvedadṛṣṭāntairyajñe padmavidhiḥ smṛtaḥ
- 17
एवं भगवता तेन विश्वेषां धारणाविधिः
पर्वतानां नदीनां च ह्रदानां चैव निर्मितः
evaṃ bhagavatā tena viśveṣāṃ dhāraṇāvidhiḥ
parvatānāṃ nadīnāṃ ca hradānāṃ caiva nirmitaḥ
- 18
विभुस्तथैवाप्रतिमप्रभावः प्रभाकराभो वरुणः सितद्युतिः
शनैः स्वयंभूः शयनं सृजत्तदा जगन्मयं पद्मविधिं महार्णवे
vibhustathaivāpratimaprabhāvaḥ prabhākarābho varuṇaḥ sitadyutiḥ
śanaiḥ svayaṃbhūḥ śayanaṃ sṛjattadā jaganmayaṃ padmavidhiṃ mahārṇave

