15 shlokas
- 1
भीष्म उवाच
यमस्तु यानि श्राद्धानि प्रोवाच शशबिन्दवे
तानि मे शृणु काम्यानि नक्षत्रेषु पृथक्पृथक्
bhīṣma uvāca
yamastu yāni śrāddhāni provāca śaśabindave
tāni me śṛṇu kāmyāni nakṣatreṣu pṛthakpṛthak
- 2
श्राद्धं यः कृत्तिकायोगे कुर्वीत सततं नरः
अग्नीन् आधाय सापत्यो यजेत विगतज्वरः
śrāddhaṃ yaḥ kṛttikāyoge kurvīta satataṃ naraḥ
agnīn ādhāya sāpatyo yajeta vigatajvaraḥ
- 3
अपत्यकामो रोहिण्याम् ओजस्कामो मृगोत्तमे
क्रूरकर्मा ददच्छ्राद्धम् आर्द्रायां मानवो भवेत्
apatyakāmo rohiṇyām ojaskāmo mṛgottame
krūrakarmā dadacchrāddham ārdrāyāṃ mānavo bhavet
- 4
कृषिभागी भवेन्मर्त्यः कुर्वञ्श्राद्धं पुनर्वसौ
पुष्टिकामो ऽथ पुष्येण श्राद्धम् ईहेत मानवः
kṛṣibhāgī bhavenmartyaḥ kurvañśrāddhaṃ punarvasau
puṣṭikāmo 'tha puṣyeṇa śrāddham īheta mānavaḥ
- 5
आश्लेषायां ददच्छ्राद्धं वीरान्पुत्रान्प्रजायते
ज्ञातीनां तु भवेच्छ्रेष्ठो मघासु श्राद्धम् आवपन्
āśleṣāyāṃ dadacchrāddhaṃ vīrānputrānprajāyate
jñātīnāṃ tu bhavecchreṣṭho maghāsu śrāddham āvapan
- 6
फल्गुनीषु ददच्छ्राद्धं सुभगः श्राद्धदो भवेत्
अपत्यभाग् उत्तरासु हस्तेन फलभाग्भवेत्
phalgunīṣu dadacchrāddhaṃ subhagaḥ śrāddhado bhavet
apatyabhāg uttarāsu hastena phalabhāgbhavet
- 7
चित्रायां तु ददच्छ्राद्धं लभेद्रूपवतः सुतान्
स्वातियोगे पितॄन् अर्च्य वाणिज्यम् उपजीवति
citrāyāṃ tu dadacchrāddhaṃ labhedrūpavataḥ sutān
svātiyoge pitṝn arcya vāṇijyam upajīvati
- 8
बहुपुत्रो विशाखासु पित्र्यम् ईहन्भवेन्नरः
अनुराधासु कुर्वाणो राजचक्रं प्रवर्तयेत्
bahuputro viśākhāsu pitryam īhanbhavennaraḥ
anurādhāsu kurvāṇo rājacakraṃ pravartayet
- 9
आदिपत्यं व्रजेन्मर्त्यो ज्येष्ठायाम् अपवर्जयन्
नरः कुरुकुलश्रेष्ठ श्रद्धादमपुरःसरः
ādipatyaṃ vrajenmartyo jyeṣṭhāyām apavarjayan
naraḥ kurukulaśreṣṭha śraddhādamapuraḥsaraḥ
- 10
मूले त्वारोग्यम् अर्छेत यशो ऽषाढास्वनुत्तमम्
उत्तरासु त्वषाढासु वीतशोकश्चरेन्महीम्
mūle tvārogyam archeta yaśo 'ṣāḍhāsvanuttamam
uttarāsu tvaṣāḍhāsu vītaśokaścarenmahīm
- 11
श्राद्धं त्वभिजिता कुर्वन्विद्यां श्रेष्ठाम् अवाप्नुयात्
श्रवणे तु ददच्छ्राद्धं प्रेत्य गच्छेत्परां गतिम्
śrāddhaṃ tvabhijitā kurvanvidyāṃ śreṣṭhām avāpnuyāt
śravaṇe tu dadacchrāddhaṃ pretya gacchetparāṃ gatim
- 12
राज्यभागी धनिष्ठायां प्राप्नुयान्नापदं नरः
नक्षत्रे वारुणे कुर्वन्भिषक्सिद्धिम् अवाप्नुयात्
rājyabhāgī dhaniṣṭhāyāṃ prāpnuyānnāpadaṃ naraḥ
nakṣatre vāruṇe kurvanbhiṣaksiddhim avāpnuyāt
- 13
पूर्वप्रोष्ठपदाः कुर्वन्बहु विन्देद् अजाविकम्
उत्तरास्वथ कुर्वाणो विन्दते गाः सहस्रशः
pūrvaproṣṭhapadāḥ kurvanbahu vinded ajāvikam
uttarāsvatha kurvāṇo vindate gāḥ sahasraśaḥ
- 14
बहुरूप्यकृतं वित्तं विन्दते रेवतीं श्रितः
अश्वांश्चाश्वयुजे वेत्ति भरणीष्वायुर् उत्तमम्
bahurūpyakṛtaṃ vittaṃ vindate revatīṃ śritaḥ
aśvāṃścāśvayuje vetti bharaṇīṣvāyur uttamam
- 15
इमं श्राद्धविधिं श्रुत्वा शशबिन्दुस्तथाकरोत्
अक्लेशेनाजयच्चापि महीं सो ऽनुशशास ह
imaṃ śrāddhavidhiṃ śrutvā śaśabindustathākarot
akleśenājayaccāpi mahīṃ so 'nuśaśāsa ha

