15 shlokas
- 1
इन्द्र उवाच
जानन्यो गाम् अपहरेद्विक्रीयाद्वार्थकारणात्
एतद्विज्ञातुम् इच्छामि का नु तस्य गतिर्भवेत्
indra uvāca
jānanyo gām apaharedvikrīyādvārthakāraṇāt
etadvijñātum icchāmi kā nu tasya gatirbhavet
- 2
ब्रह्मोवाच
भक्षार्थं विक्रयार्थं वा ये ऽपहारं हि कुर्वते
दानार्थं वा ब्राह्मणाय तत्रेदं श्रूयतां फलम्
brahmovāca
bhakṣārthaṃ vikrayārthaṃ vā ye 'pahāraṃ hi kurvate
dānārthaṃ vā brāhmaṇāya tatredaṃ śrūyatāṃ phalam
- 3
विक्रयार्थं हि यो हिंस्याद्भक्षयेद्वा निरङ्कुशः
घातयानं हि पुरुषं ये ऽनुमन्येयुर् अर्थिनः
vikrayārthaṃ hi yo hiṃsyādbhakṣayedvā niraṅkuśaḥ
ghātayānaṃ hi puruṣaṃ ye 'numanyeyur arthinaḥ
- 4
घातकः खादको वापि तथा यश्चानुमन्यते
यावन्ति तस्या लोमानि तावद्वर्षाणि मज्जति
ghātakaḥ khādako vāpi tathā yaścānumanyate
yāvanti tasyā lomāni tāvadvarṣāṇi majjati
- 5
ये दोषा यादृशाश्चैव द्विजयज्ञोपघातके
विक्रये चापहारे च ते दोषा वै स्मृताः प्रभो
ye doṣā yādṛśāścaiva dvijayajñopaghātake
vikraye cāpahāre ca te doṣā vai smṛtāḥ prabho
- 6
अपहृत्य तु यो गां वै ब्राह्मणाय प्रयच्छति
यावद्दाने फलं तस्यास्तावन्निरयम् ऋच्छति
apahṛtya tu yo gāṃ vai brāhmaṇāya prayacchati
yāvaddāne phalaṃ tasyāstāvannirayam ṛcchati
- 7
सुवर्णं दक्षिणाम् आहुर्गोप्रदाने महाद्युते
सुवर्णं परमं ह्युक्तं दक्षिणार्थम् असंशयम्
suvarṇaṃ dakṣiṇām āhurgopradāne mahādyute
suvarṇaṃ paramaṃ hyuktaṃ dakṣiṇārtham asaṃśayam
- 8
गोप्रदानं तारयते सप्त पूर्वांस्तथा परान्
सुवर्णं दक्षिणां दत्त्वा तावद्द्विगुणम् उच्यते
gopradānaṃ tārayate sapta pūrvāṃstathā parān
suvarṇaṃ dakṣiṇāṃ dattvā tāvaddviguṇam ucyate
- 9
सुवर्णं परमं दानं सुवर्णं दक्षिणा परा
सुवर्णं पावनं शक्र पावनानां परं स्मृतम्
suvarṇaṃ paramaṃ dānaṃ suvarṇaṃ dakṣiṇā parā
suvarṇaṃ pāvanaṃ śakra pāvanānāṃ paraṃ smṛtam
- 10
कुलानां पावनं प्राहुर्जातरूपं शतक्रतो
एषा मे दक्षिणा प्रोक्ता समासेन महाद्युते
kulānāṃ pāvanaṃ prāhurjātarūpaṃ śatakrato
eṣā me dakṣiṇā proktā samāsena mahādyute
- 11
भीष्म उवाच
एतत्पितामहेनोक्तम् इन्द्राय भरतर्षभ
इन्द्रो दशरथायाह रामायाह पिता तथा
bhīṣma uvāca
etatpitāmahenoktam indrāya bharatarṣabha
indro daśarathāyāha rāmāyāha pitā tathā
- 12
राघवो ऽपि प्रियभ्रात्रे लक्ष्मणाय यशस्विने
ऋषिभ्यो लक्ष्मणेनोक्तम् अरण्ये वसता विभो
rāghavo 'pi priyabhrātre lakṣmaṇāya yaśasvine
ṛṣibhyo lakṣmaṇenoktam araṇye vasatā vibho
- 13
पारंपर्यागतं चेदम् ऋषयः संशितव्रताः
दुर्धरं धारयामासू राजानश्चैव धार्मिकाः
उपाध्यायेन गदितं मम चेदं युधिष्ठिर
pāraṃparyāgataṃ cedam ṛṣayaḥ saṃśitavratāḥ
durdharaṃ dhārayāmāsū rājānaścaiva dhārmikāḥ
upādhyāyena gaditaṃ mama cedaṃ yudhiṣṭhira
- 14
य इदं ब्राह्मणो नित्यं वदेद्ब्राह्मणसंसदि
यज्ञेषु गोप्रदानेषु द्वयोर् अपि समागमे
ya idaṃ brāhmaṇo nityaṃ vadedbrāhmaṇasaṃsadi
yajñeṣu gopradāneṣu dvayor api samāgame
- 15
तस्य लोकाः किलाक्षय्या दैवतैः सह नित्यदा
इति ब्रह्मा स भगवान् उवाच परमेश्वरः
tasya lokāḥ kilākṣayyā daivataiḥ saha nityadā
iti brahmā sa bhagavān uvāca parameśvaraḥ

