27 shlokas
- 1
वसिष्ठ उवाच
शतं वर्षसहस्राणां तपस्तप्तं सुदुश्चरम्
गोभिः पूर्वविसृष्टाभिर्गच्छेम श्रेष्ठताम् इति
vasiṣṭha uvāca
śataṃ varṣasahasrāṇāṃ tapastaptaṃ suduścaram
gobhiḥ pūrvavisṛṣṭābhirgacchema śreṣṭhatām iti
- 2
लोके ऽस्मिन्दक्षिणानां च सर्वासां वयम् उत्तमाः
भवेम न च लिप्येम दोषेणेति परंतप
loke 'smindakṣiṇānāṃ ca sarvāsāṃ vayam uttamāḥ
bhavema na ca lipyema doṣeṇeti paraṃtapa
- 3
स एव चेतसा तेन हतो लिप्येत सर्वदा
शकृता च पवित्रार्थं कुर्वीरन्देवमानुषाः
sa eva cetasā tena hato lipyeta sarvadā
śakṛtā ca pavitrārthaṃ kurvīrandevamānuṣāḥ
- 4
तथा सर्वाणि भूतानि स्थावराणि चराणि च
प्रदातारश्च गोलोकान्गच्छेयुर् इति मानद
tathā sarvāṇi bhūtāni sthāvarāṇi carāṇi ca
pradātāraśca golokāngaccheyur iti mānada
- 5
ताभ्यो वरं ददौ ब्रह्मा तपसो ऽन्ते स्वयं प्रभुः
एवं भवत्विति विभुर्लोकांस्तारयतेति च
tābhyo varaṃ dadau brahmā tapaso 'nte svayaṃ prabhuḥ
evaṃ bhavatviti vibhurlokāṃstārayateti ca
- 6
उत्तस्थुः सिद्धिकामास्ता भूतभव्यस्य मातरः
तपसो ऽन्ते महाराज गावो लोकपरायणाः
uttasthuḥ siddhikāmāstā bhūtabhavyasya mātaraḥ
tapaso 'nte mahārāja gāvo lokaparāyaṇāḥ
- 7
तस्माद्गावो महाभागाः पवित्रं परम् उच्यते
तथैव सर्वभूतानां गावस्तिष्ठन्ति मूर्धनि
tasmādgāvo mahābhāgāḥ pavitraṃ param ucyate
tathaiva sarvabhūtānāṃ gāvastiṣṭhanti mūrdhani
- 8
समानवत्सां कपिलां धेनुं दत्त्वा पयस्विनीम्
सुव्रतां वस्त्रसंवीतां ब्रह्मलोके महीयते
samānavatsāṃ kapilāṃ dhenuṃ dattvā payasvinīm
suvratāṃ vastrasaṃvītāṃ brahmaloke mahīyate
- 9
रोहिणीं तुल्यवत्सां तु धेनुं दत्त्वा पयस्विनीम्
सुव्रतां वस्त्रसंवीतां सूर्यलोके महीयते
rohiṇīṃ tulyavatsāṃ tu dhenuṃ dattvā payasvinīm
suvratāṃ vastrasaṃvītāṃ sūryaloke mahīyate
- 10
समानवत्सां शबलां धेनुं दत्त्वा पयस्विनीम्
सुव्रतां वस्त्रसंवीतां सोमलोके महीयते
samānavatsāṃ śabalāṃ dhenuṃ dattvā payasvinīm
suvratāṃ vastrasaṃvītāṃ somaloke mahīyate
- 11
समानवत्सां श्वेतां तु धेनुं दत्त्वा पयस्विनीम्
सुव्रतां वस्त्रसंवीताम् इन्द्रलोके महीयते
samānavatsāṃ śvetāṃ tu dhenuṃ dattvā payasvinīm
suvratāṃ vastrasaṃvītām indraloke mahīyate
- 12
समानवत्सां कृष्णां तु धेनुं दत्त्वा पयस्विनीम्
सुव्रतां वस्त्रसंवीताम् अग्निलोके महीयते
samānavatsāṃ kṛṣṇāṃ tu dhenuṃ dattvā payasvinīm
suvratāṃ vastrasaṃvītām agniloke mahīyate
- 13
समानवत्सां धूम्रां तु धेनुं दत्त्वा पयस्विनीम्
सुव्रतां वस्त्रसंवीतां याम्यलोके महीयते
samānavatsāṃ dhūmrāṃ tu dhenuṃ dattvā payasvinīm
suvratāṃ vastrasaṃvītāṃ yāmyaloke mahīyate
- 14
अपां फेनसवर्णां तु सवत्सां कांस्यदोहनाम्
प्रदाय वस्त्रसंवीतां वारुणं लोकम् अश्नुते
apāṃ phenasavarṇāṃ tu savatsāṃ kāṃsyadohanām
pradāya vastrasaṃvītāṃ vāruṇaṃ lokam aśnute
- 15
वातरेणुसवर्णां तु सवत्सां कांस्यदोहनाम्
प्रदाय वस्त्रसंवीतां वायुलोके महीयते
vātareṇusavarṇāṃ tu savatsāṃ kāṃsyadohanām
pradāya vastrasaṃvītāṃ vāyuloke mahīyate
- 16
हिरण्यवर्णां पिङ्गाक्षीं सवत्सां कांस्यदोहनाम्
प्रदाय वस्त्रसंवीतां कौबेरं लोकम् अश्नुते
hiraṇyavarṇāṃ piṅgākṣīṃ savatsāṃ kāṃsyadohanām
pradāya vastrasaṃvītāṃ kauberaṃ lokam aśnute
- 17
पलालधूम्रवर्णां तु सवत्सां कांस्यदोहनाम्
प्रदाय वस्त्रसंवीतां पितृलोके महीयते
palāladhūmravarṇāṃ tu savatsāṃ kāṃsyadohanām
pradāya vastrasaṃvītāṃ pitṛloke mahīyate
- 18
सवत्सां पीवरीं दत्त्वा शितिकण्ठाम् अलंकृताम्
वैश्वदेवम् असंबाधं स्थानं श्रेष्ठं प्रपद्यते
savatsāṃ pīvarīṃ dattvā śitikaṇṭhām alaṃkṛtām
vaiśvadevam asaṃbādhaṃ sthānaṃ śreṣṭhaṃ prapadyate
- 19
समानवत्सां गौरीं तु धेनुं दत्त्वा पयस्विनीम्
सुव्रतां वस्त्रसंवीतां वसूनां लोकम् अश्नुते
samānavatsāṃ gaurīṃ tu dhenuṃ dattvā payasvinīm
suvratāṃ vastrasaṃvītāṃ vasūnāṃ lokam aśnute
- 20
पाण्डुकम्बलवर्णां तु सवत्सां कांस्यदोहनाम्
प्रदाय वस्त्रसंवीतां साध्यानां लोकम् अश्नुते
pāṇḍukambalavarṇāṃ tu savatsāṃ kāṃsyadohanām
pradāya vastrasaṃvītāṃ sādhyānāṃ lokam aśnute
- 21
वैराटपृष्ठम् उक्षाणं सर्वरत्नैर् अलंकृतम्
प्रदाय मरुतां लोकान् अजरान्प्रतिपद्यते
vairāṭapṛṣṭham ukṣāṇaṃ sarvaratnair alaṃkṛtam
pradāya marutāṃ lokān ajarānpratipadyate
- 22
वत्सोपपन्नां नीलाङ्गां सर्वरत्नसमन्विताम्
गन्धर्वाप्सरसां लोकान्दत्त्वा प्राप्नोति मानवः
vatsopapannāṃ nīlāṅgāṃ sarvaratnasamanvitām
gandharvāpsarasāṃ lokāndattvā prāpnoti mānavaḥ
- 23
शितिकण्ठम् अनड्वाहं सर्वरत्नैर् अलंकृतम्
दत्त्वा प्रजापतेर्लोकान्विशोकः प्रतिपद्यते
śitikaṇṭham anaḍvāhaṃ sarvaratnair alaṃkṛtam
dattvā prajāpaterlokānviśokaḥ pratipadyate
- 24
गोप्रदानरतो याति भित्त्वा जलदसंचयान्
विमानेनार्कवर्णेन दिवि राजन्विराजता
gopradānarato yāti bhittvā jaladasaṃcayān
vimānenārkavarṇena divi rājanvirājatā
- 25
तं चारुवेषाः सुश्रोण्यः सहस्रं वरयोषितः
रमयन्ति नरश्रेष्ठ गोप्रदानरतं नरम्
taṃ cāruveṣāḥ suśroṇyaḥ sahasraṃ varayoṣitaḥ
ramayanti naraśreṣṭha gopradānarataṃ naram
- 26
वीणानां वल्लकीनां च नूपुराणां च शिञ्जितैः
हासैश्च हरिणाक्षीणां प्रसुप्तः प्रतिबोध्यते
vīṇānāṃ vallakīnāṃ ca nūpurāṇāṃ ca śiñjitaiḥ
hāsaiśca hariṇākṣīṇāṃ prasuptaḥ pratibodhyate
- 27
यावन्ति लोमानि भवन्ति धेन्वास्तावन्ति वर्षाणि महीयते सः
स्वर्गाच्च्युतश्चापि ततो नृलोके कुले समुत्पत्स्यति गोमिनां सः
yāvanti lomāni bhavanti dhenvāstāvanti varṣāṇi mahīyate saḥ
svargāccyutaścāpi tato nṛloke kule samutpatsyati gomināṃ saḥ

