51 shlokas
- 1
युधिष्ठिर उवाच
किं श्रेयः पुरुषस्येह किं कुर्वन्सुखम् एधते
विपाप्मा च भवेत्केन किं वा कल्मषनाशनम्
yudhiṣṭhira uvāca
kiṃ śreyaḥ puruṣasyeha kiṃ kurvansukham edhate
vipāpmā ca bhavetkena kiṃ vā kalmaṣanāśanam
- 2
भीष्म उवाच
अयं दैवतवंशो वै ऋषिवंशसमन्वितः
द्विसंध्यं पठितः पुत्र कल्मषापहरः परः
bhīṣma uvāca
ayaṃ daivatavaṃśo vai ṛṣivaṃśasamanvitaḥ
dvisaṃdhyaṃ paṭhitaḥ putra kalmaṣāpaharaḥ paraḥ
- 3
देवासुरगुरुर्देवः सर्वभूतनमस्कृतः
अचिन्त्यो ऽथाप्य् अनिर्देश्यः सर्वप्राणो ह्ययोनिजः
devāsuragururdevaḥ sarvabhūtanamaskṛtaḥ
acintyo 'thāpy anirdeśyaḥ sarvaprāṇo hyayonijaḥ
- 4
पितामहो जगन्नाथः सावित्री ब्रह्मणः सती
वेदभूर् अथ कर्ता च विष्णुर्नारायणः प्रभुः
pitāmaho jagannāthaḥ sāvitrī brahmaṇaḥ satī
vedabhūr atha kartā ca viṣṇurnārāyaṇaḥ prabhuḥ
- 5
उमापतिर्विरूपाक्षः स्कन्दः सेनापतिस्तथा
विशाखो हुतभुग्वायुश्चन्द्रादित्यौ प्रभाकरौ
umāpatirvirūpākṣaḥ skandaḥ senāpatistathā
viśākho hutabhugvāyuścandrādityau prabhākarau
- 6
शक्रः शचीपतिर्देवो यमो धूमोर्णया सह
वरुणः सह गौर्या च सह ऋद्ध्या धनेश्वरः
śakraḥ śacīpatirdevo yamo dhūmorṇayā saha
varuṇaḥ saha gauryā ca saha ṛddhyā dhaneśvaraḥ
- 7
सौम्या गौः सुरभिर्देवी विश्रवाश्च महान् ऋषिः
षट्कालः सागरो गङ्गा स्रवन्त्यो ऽथ मरुद्गणाः
saumyā gauḥ surabhirdevī viśravāśca mahān ṛṣiḥ
ṣaṭkālaḥ sāgaro gaṅgā sravantyo 'tha marudgaṇāḥ
- 8
वालखिल्यास्तपःसिद्धाः कृष्णद्वैपायनस्तथा
नारदः पर्वतश्चैव विश्वावसुर्हहाहुहूः
vālakhilyāstapaḥsiddhāḥ kṛṣṇadvaipāyanastathā
nāradaḥ parvataścaiva viśvāvasurhahāhuhūḥ
- 9
तुम्बरुश्चित्रसेनश्च देवदूतश्च विश्रुतः
देवकन्या महाभागा दिव्याश्चाप्सरसां गणाः
tumbaruścitrasenaśca devadūtaśca viśrutaḥ
devakanyā mahābhāgā divyāścāpsarasāṃ gaṇāḥ
- 10
उर्वशी मेनका रम्भा मिश्रकेशी अलम्बुषा
विश्वाची च घृताची च पञ्चचूडा तिलोत्तमा
urvaśī menakā rambhā miśrakeśī alambuṣā
viśvācī ca ghṛtācī ca pañcacūḍā tilottamā
- 11
आदित्या वसवो रुद्राः साश्विनः पितरो ऽपि च
धर्मः सत्यं तपो दीक्षा व्यवसायः पितामहः
ādityā vasavo rudrāḥ sāśvinaḥ pitaro 'pi ca
dharmaḥ satyaṃ tapo dīkṣā vyavasāyaḥ pitāmahaḥ
- 12
शर्वर्यो दिवसाश्चैव मारीचः कश्यपस्तथा
शुक्रो बृहस्पतिर्भौमो बुधो राहुः शनैश्चरः
śarvaryo divasāścaiva mārīcaḥ kaśyapastathā
śukro bṛhaspatirbhaumo budho rāhuḥ śanaiścaraḥ
- 13
नक्षत्राण्य् ऋतवश्चैव मासाः संध्याः सवत्सराः
वैनतेयाः समुद्राश्च कद्रुजाः पन्नगास्तथा
nakṣatrāṇy ṛtavaścaiva māsāḥ saṃdhyāḥ savatsarāḥ
vainateyāḥ samudrāśca kadrujāḥ pannagāstathā
- 14
शतद्रूश्च विपाशा च चन्द्रभागा सरस्वती
सिन्धुश्च देविका चैव पुष्करं तीर्थम् एव च
śatadrūśca vipāśā ca candrabhāgā sarasvatī
sindhuśca devikā caiva puṣkaraṃ tīrtham eva ca
- 15
गङ्गा महानदी चैव कपिला नर्मदा तथा
कम्पुना च विशल्या च करतोयाम्बुवाहिनी
gaṅgā mahānadī caiva kapilā narmadā tathā
kampunā ca viśalyā ca karatoyāmbuvāhinī
- 16
सरयूर्गण्डकी चैव लोहित्यश्च महानदः
ताम्रारुणा वेत्रवती पर्णाशा गौतमी तथा
sarayūrgaṇḍakī caiva lohityaśca mahānadaḥ
tāmrāruṇā vetravatī parṇāśā gautamī tathā
- 17
गोदावरी च वेण्णा च कृष्णवेणा तथाद्रिजा
दृषद्वती च कावेरी वंक्षुर्मन्दाकिनी तथा
godāvarī ca veṇṇā ca kṛṣṇaveṇā tathādrijā
dṛṣadvatī ca kāverī vaṃkṣurmandākinī tathā
- 18
प्रयागं च प्रभासं च पुण्यं नैमिषम् एव च
तच्च विश्वेश्वरस्थानं यत्र तद्विमलं सरः
prayāgaṃ ca prabhāsaṃ ca puṇyaṃ naimiṣam eva ca
tacca viśveśvarasthānaṃ yatra tadvimalaṃ saraḥ
- 19
पुण्यतीर्थैश्च कलिलं कुरुक्षेत्रं प्रकीर्तितम्
सिन्धूत्तमं तपोदानं जम्बूमार्गम् अथापि च
puṇyatīrthaiśca kalilaṃ kurukṣetraṃ prakīrtitam
sindhūttamaṃ tapodānaṃ jambūmārgam athāpi ca
- 20
हिरण्वती वितस्ता च तथैवेक्षुमती नदी
वेदस्मृतिर्वैदसिनी मलवासाश्च नद्यपि
hiraṇvatī vitastā ca tathaivekṣumatī nadī
vedasmṛtirvaidasinī malavāsāśca nadyapi
- 21
भूमिभागास्तथा पुण्या गङ्गाद्वारम् अथापि च
ऋषिकुल्यास्तथा मेध्या नदी चित्रपथा तथा
bhūmibhāgāstathā puṇyā gaṅgādvāram athāpi ca
ṛṣikulyāstathā medhyā nadī citrapathā tathā
- 22
कौशिकी यमुना सीता तथा चर्मण्वती नदी
नदी भीमरथी चैव बाहुदा च महानदी
महेन्द्रवाणी त्रिदिवा नीलिका च सरस्वती
kauśikī yamunā sītā tathā carmaṇvatī nadī
nadī bhīmarathī caiva bāhudā ca mahānadī
mahendravāṇī tridivā nīlikā ca sarasvatī
- 23
नन्दा चापरनन्दा च तथा तीर्थं महाह्रदम्
गयाथ फल्गुतीर्थं च धर्मारण्यं सुरैर्वृतम्
nandā cāparanandā ca tathā tīrthaṃ mahāhradam
gayātha phalgutīrthaṃ ca dharmāraṇyaṃ surairvṛtam
- 24
तथा देवनदी पुण्या सरश्च ब्रह्मनिर्मितम्
पुण्यं त्रिलोकविख्यातं सर्वपापहरं शिवम्
tathā devanadī puṇyā saraśca brahmanirmitam
puṇyaṃ trilokavikhyātaṃ sarvapāpaharaṃ śivam
- 25
हिमवान्पर्वतश्चैव दिव्यौषधिसमन्वितः
विन्ध्यो धातुविचित्राङ्गस्तीर्थवान् औषधान्वितः
himavānparvataścaiva divyauṣadhisamanvitaḥ
vindhyo dhātuvicitrāṅgastīrthavān auṣadhānvitaḥ
- 26
मेरुर्महेन्द्रो मलयः श्वेतश्च रजताचितः
शृङ्गवान्मन्दरो नीलो निषधो दर्दुरस्तथा
merurmahendro malayaḥ śvetaśca rajatācitaḥ
śṛṅgavānmandaro nīlo niṣadho dardurastathā
- 27
चित्रकूटो ऽञ्जनाभश्च पर्वतो गन्धमादनः
पुण्यः सोमगिरिश्चैव तथैवान्ये महीधराः
दिशश्च विदिशश्चैव क्षितिः सर्वे महीरुहाः
citrakūṭo 'ñjanābhaśca parvato gandhamādanaḥ
puṇyaḥ somagiriścaiva tathaivānye mahīdharāḥ
diśaśca vidiśaścaiva kṣitiḥ sarve mahīruhāḥ
- 28
विश्वेदेवा नभश्चैव नक्षत्राणि ग्रहास्तथा
पान्तु वः सततं देवाः कीर्तिताकीर्तिता मया
viśvedevā nabhaścaiva nakṣatrāṇi grahāstathā
pāntu vaḥ satataṃ devāḥ kīrtitākīrtitā mayā
- 29
कीर्तयानो नरो ह्येतान्मुच्यते सर्वकिल्बिषैः
स्तुवंश्च प्रतिनन्दंश्च मुच्यते सर्वतो भयात्
सर्वसंकरपापेभ्यो देवतास्तवनन्दकः
kīrtayāno naro hyetānmucyate sarvakilbiṣaiḥ
stuvaṃśca pratinandaṃśca mucyate sarvato bhayāt
sarvasaṃkarapāpebhyo devatāstavanandakaḥ
- 30
देवतानन्तरं विप्रांस्तपःसिद्धांस्तपोऽधिकान्
कीर्तितान्कीर्तयिष्यामि सर्वपापप्रमोचनान्
devatānantaraṃ viprāṃstapaḥsiddhāṃstapo'dhikān
kīrtitānkīrtayiṣyāmi sarvapāpapramocanān

