9 shlokas
- 1
भीष्म उवाच
कार्यते यच्च क्रियते सच्चासच्च कृतं ततः
तत्राश्वसीत सत्कृत्वा असत्कृत्वा न विश्वसेत्
bhīṣma uvāca
kāryate yacca kriyate saccāsacca kṛtaṃ tataḥ
tatrāśvasīta satkṛtvā asatkṛtvā na viśvaset
- 2
काल एवात्र कालेन निग्रहानुग्रहौ ददत्
बुद्धिम् आविश्य भूतानां धर्मार्थेषु प्रवर्तते
kāla evātra kālena nigrahānugrahau dadat
buddhim āviśya bhūtānāṃ dharmārtheṣu pravartate
- 3
यदा त्वस्य भवेद्बुद्धिर्धर्म्या चार्थप्रदर्शिनी
तदाश्वसीत धर्मात्मादृढबुद्धिर्न विश्वसेत्
yadā tvasya bhavedbuddhirdharmyā cārthapradarśinī
tadāśvasīta dharmātmādṛḍhabuddhirna viśvaset
- 4
एतावन्मात्रम् एतद्धि भूतानां प्राज्ञलक्षणम्
कालयुक्तो ऽप्युभयविच्छेषम् अर्थं समाचरेत्
etāvanmātram etaddhi bhūtānāṃ prājñalakṣaṇam
kālayukto 'pyubhayaviccheṣam arthaṃ samācaret
- 5
यथा ह्युपस्थितैश्वर्याः पूजयन्ते नरा नरान्
एवम् एवात्मनात्मानं पूजयन्तीह धार्मिकाः
yathā hyupasthitaiśvaryāḥ pūjayante narā narān
evam evātmanātmānaṃ pūjayantīha dhārmikāḥ
- 6
न ह्यधर्मतया धर्मं दद्यात्कालः कथंचन
तस्माद्विशुद्धम् आत्मानं जानीयाद्धर्मचारिणम्
na hyadharmatayā dharmaṃ dadyātkālaḥ kathaṃcana
tasmādviśuddham ātmānaṃ jānīyāddharmacāriṇam
- 7
स्प्रष्टुम् अप्यसमर्थो हि ज्वलन्तम् इव पावकम्
अधर्मः सततो धर्मं कालेन परिरक्षितम्
spraṣṭum apyasamartho hi jvalantam iva pāvakam
adharmaḥ satato dharmaṃ kālena parirakṣitam
- 8
कार्यावेतौ हि कालेन धर्मो हि विजयावहः
त्रयाणाम् अपि लोकानाम् आलोककरणो भवेत्
kāryāvetau hi kālena dharmo hi vijayāvahaḥ
trayāṇām api lokānām ālokakaraṇo bhavet
- 9
तत्र कश्चिन्नयेत्प्राज्ञो गृहीत्वैव करे नरम्
उह्यमानः स धर्मेण धर्मे बहुभयच्छले
tatra kaścinnayetprājño gṛhītvaiva kare naram
uhyamānaḥ sa dharmeṇa dharme bahubhayacchale

