19 shlokas
- 1
युधिष्ठिर उवाच
न बिभेति कथं सा स्त्री शापस्य परमद्युतेः
कथं निवृत्तो भगवांस्तद्भवान्प्रब्रवीतु मे
yudhiṣṭhira uvāca
na bibheti kathaṃ sā strī śāpasya paramadyuteḥ
kathaṃ nivṛtto bhagavāṃstadbhavānprabravītu me
- 2
भीष्म उवाच
अष्टावक्रो ऽन्वपृच्छत्तां रूपं विकुरुषे कथम्
न चानृतं ते वक्तव्यं ब्रूहि ब्राह्मणकाम्यया
bhīṣma uvāca
aṣṭāvakro 'nvapṛcchattāṃ rūpaṃ vikuruṣe katham
na cānṛtaṃ te vaktavyaṃ brūhi brāhmaṇakāmyayā
- 3
स्त्र्युवाच
द्यावापृथिवीमात्रैषा काम्या ब्राह्मणसत्तम
शृणुष्वावहितः सर्वं यद् इदं सत्यविक्रम
stryuvāca
dyāvāpṛthivīmātraiṣā kāmyā brāhmaṇasattama
śṛṇuṣvāvahitaḥ sarvaṃ yad idaṃ satyavikrama
- 4
उत्तरां मां दिशं विद्धि दृष्टं स्त्रीचापलं च ते
अव्युत्थानेन ते लोका जिताः सत्यपराक्रम
uttarāṃ māṃ diśaṃ viddhi dṛṣṭaṃ strīcāpalaṃ ca te
avyutthānena te lokā jitāḥ satyaparākrama
- 5
जिज्ञासेयं प्रयुक्ता मे स्थिरीकर्तुं तवानघ
स्थविराणाम् अपि स्त्रीणां बाधते मैथुनज्वरः
jijñāseyaṃ prayuktā me sthirīkartuṃ tavānagha
sthavirāṇām api strīṇāṃ bādhate maithunajvaraḥ
- 6
तुष्टः पितामहस्ते ऽद्य तथा देवाः सवासवाः
स त्वं येन च कार्येण सम्प्राप्तो भगवान् इह
tuṣṭaḥ pitāmahaste 'dya tathā devāḥ savāsavāḥ
sa tvaṃ yena ca kāryeṇa samprāpto bhagavān iha
- 7
प्रेषितस्तेन विप्रेण कन्यापित्रा द्विजर्षभ
तवोपदेशं कर्तुं वै तच्च सर्वं कृतं मया
preṣitastena vipreṇa kanyāpitrā dvijarṣabha
tavopadeśaṃ kartuṃ vai tacca sarvaṃ kṛtaṃ mayā
- 8
क्षेमी गमिष्यसि गृहाञ्श्रमश्च न भविष्यति
कन्यां प्राप्स्यसि तां विप्र पुत्रिणी च भविष्यति
kṣemī gamiṣyasi gṛhāñśramaśca na bhaviṣyati
kanyāṃ prāpsyasi tāṃ vipra putriṇī ca bhaviṣyati
- 9
काम्यया पृष्टवांस्त्वं मां ततो व्याहृतम् उत्तरम्
अनतिक्रमणीयैषा कृत्स्नैर्लोकैस्त्रिभिः सदा
kāmyayā pṛṣṭavāṃstvaṃ māṃ tato vyāhṛtam uttaram
anatikramaṇīyaiṣā kṛtsnairlokaistribhiḥ sadā
- 10
गच्छस्व सुकृतं कृत्वा किं वान्यच्छ्रोतुम् इच्छसि
यावद्ब्रवीमि विप्रर्षे अष्टावक्र यथातथम्
gacchasva sukṛtaṃ kṛtvā kiṃ vānyacchrotum icchasi
yāvadbravīmi viprarṣe aṣṭāvakra yathātatham
- 11
ऋषिणा प्रसादिता चास्मि तव हेतोर्द्विजर्षभ
तस्य संमाननार्थं मे त्वयि वाक्यं प्रभाषितम्
ṛṣiṇā prasāditā cāsmi tava hetordvijarṣabha
tasya saṃmānanārthaṃ me tvayi vākyaṃ prabhāṣitam
- 12
श्रुत्वा तु वचनं तस्याः स विप्रः प्राञ्जलिः स्थितः
अनुज्ञातस्तया चापि स्वगृहं पुनर् आव्रजत्
śrutvā tu vacanaṃ tasyāḥ sa vipraḥ prāñjaliḥ sthitaḥ
anujñātastayā cāpi svagṛhaṃ punar āvrajat
- 13
गृहम् आगम्य विश्रान्तः स्वजनं प्रतिपूज्य च
अभ्यगच्छत तं विप्रं न्यायतः कुरुनन्दन
gṛham āgamya viśrāntaḥ svajanaṃ pratipūjya ca
abhyagacchata taṃ vipraṃ nyāyataḥ kurunandana
- 14
पृष्टश्च तेन विप्रेण दृष्टं त्वेतन्निदर्शनम्
प्राह विप्रं तदा विप्रः सुप्रीतेनान्तरात्मना
pṛṣṭaśca tena vipreṇa dṛṣṭaṃ tvetannidarśanam
prāha vipraṃ tadā vipraḥ suprītenāntarātmanā
- 15
भवताहम् अनुज्ञातः प्रस्थितो गन्धमादनम्
तस्य चोत्तरतो देशे दृष्टं तद्दैवतं महत्
bhavatāham anujñātaḥ prasthito gandhamādanam
tasya cottarato deśe dṛṣṭaṃ taddaivataṃ mahat
- 16
तया चाहम् अनुज्ञातो भवांश्चापि प्रकीर्तितः
श्रावितश्चापि तद्वाक्यं गृहम् अभ्यागतः प्रभो
tayā cāham anujñāto bhavāṃścāpi prakīrtitaḥ
śrāvitaścāpi tadvākyaṃ gṛham abhyāgataḥ prabho
- 17
तम् उवाच ततो विप्रः प्रतिगृह्णीष्व मे सुताम्
नक्षत्रतिथिसंयोगे पात्रं हि परमं भवान्
tam uvāca tato vipraḥ pratigṛhṇīṣva me sutām
nakṣatratithisaṃyoge pātraṃ hi paramaṃ bhavān
- 18
भीष्म उवाच
अष्टावक्रस्तथेत्युक्त्वा प्रतिगृह्य च तां प्रभो
कन्यां परमधर्मात्मा प्रीतिमांश्चाभवत्तदा
bhīṣma uvāca
aṣṭāvakrastathetyuktvā pratigṛhya ca tāṃ prabho
kanyāṃ paramadharmātmā prītimāṃścābhavattadā
- 19
कन्यां तां प्रतिगृह्यैव भार्यां परमशोभनाम्
उवास मुदितस्तत्र आश्रमे स्वे गतज्वरः
kanyāṃ tāṃ pratigṛhyaiva bhāryāṃ paramaśobhanām
uvāsa muditastatra āśrame sve gatajvaraḥ

