16 shlokas
- 1
भीष्म उवाच
एवम् उक्तो मतङ्गस्तु संशितात्मा यतव्रतः
अतिष्ठद् एकपादेन वर्षाणां शतम् अच्युत
bhīṣma uvāca
evam ukto mataṅgastu saṃśitātmā yatavrataḥ
atiṣṭhad ekapādena varṣāṇāṃ śatam acyuta
- 2
तम् उवाच ततः शक्रः पुनर् एव महायशाः
मतङ्ग परमं स्थानं प्रार्थयन्न् अतिदुर्लभम्
tam uvāca tataḥ śakraḥ punar eva mahāyaśāḥ
mataṅga paramaṃ sthānaṃ prārthayann atidurlabham
- 3
मा कृथाः साहसं पुत्र नैष धर्मपथस्तव
अप्राप्यं प्रार्थयानो हि नचिराद्विनशिष्यसि
mā kṛthāḥ sāhasaṃ putra naiṣa dharmapathastava
aprāpyaṃ prārthayāno hi nacirādvinaśiṣyasi
- 4
मतङ्ग परमं स्थानं वार्यमाणो मया सकृत्
चिकीर्षस्येव तपसा सर्वथा न भविष्यसि
mataṅga paramaṃ sthānaṃ vāryamāṇo mayā sakṛt
cikīrṣasyeva tapasā sarvathā na bhaviṣyasi
- 5
तिर्यग्योनिगतः सर्वो मानुष्यं यदि गच्छति
स जायते पुल्कसो वा चण्डालो वा कदाचन
tiryagyonigataḥ sarvo mānuṣyaṃ yadi gacchati
sa jāyate pulkaso vā caṇḍālo vā kadācana
- 6
पुंश्चलः पापयोनिर्वा यः कश्चिद् इह लक्ष्यते
स तस्याम् एव सुचिरं मतङ्ग परिवर्तते
puṃścalaḥ pāpayonirvā yaḥ kaścid iha lakṣyate
sa tasyām eva suciraṃ mataṅga parivartate
- 7
ततो दशगुणे काले लभते शूद्रताम् अपि
शूद्रयोनावपि ततो बहुशः परिवर्तते
tato daśaguṇe kāle labhate śūdratām api
śūdrayonāvapi tato bahuśaḥ parivartate
- 8
ततस्त्रिंशद्गुणे काले लभते वैश्यताम् अपि
वैश्यतायां चिरं कालं तत्रैव परिवर्तते
tatastriṃśadguṇe kāle labhate vaiśyatām api
vaiśyatāyāṃ ciraṃ kālaṃ tatraiva parivartate
- 9
ततः षष्टिगुणे काले राजन्यो नाम जायते
राजन्यत्वे चिरं कालं तत्रैव परिवर्तते
tataḥ ṣaṣṭiguṇe kāle rājanyo nāma jāyate
rājanyatve ciraṃ kālaṃ tatraiva parivartate
- 10
ततः षष्टिगुणे काले लभते ब्रह्मबन्धुताम्
ब्रह्मबन्धुश्चिरं कालं तत्रैव परिवर्तते
tataḥ ṣaṣṭiguṇe kāle labhate brahmabandhutām
brahmabandhuściraṃ kālaṃ tatraiva parivartate
- 11
ततस्तु द्विशते काले लभते काण्डपृष्ठताम्
काण्डपृष्ठश्चिरं कालं तत्रैव परिवर्तते
tatastu dviśate kāle labhate kāṇḍapṛṣṭhatām
kāṇḍapṛṣṭhaściraṃ kālaṃ tatraiva parivartate
- 12
ततस्तु त्रिशते काले लभते द्विजताम् अपि
तां च प्राप्य चिरं कालं तत्रैव परिवर्तते
tatastu triśate kāle labhate dvijatām api
tāṃ ca prāpya ciraṃ kālaṃ tatraiva parivartate
- 13
ततश्चतुःशते काले श्रोत्रियो नाम जायते
श्रोत्रियत्वे चिरं कालं तत्रैव परिवर्तते
tataścatuḥśate kāle śrotriyo nāma jāyate
śrotriyatve ciraṃ kālaṃ tatraiva parivartate
- 14
तदैव क्रोधहर्षौ च कामद्वेषौ च पुत्रक
अतिमानातिवादौ तम् आविशन्ति द्विजाधमम्
tadaiva krodhaharṣau ca kāmadveṣau ca putraka
atimānātivādau tam āviśanti dvijādhamam
- 15
तांश्चेज्जयति शत्रून्स तदा प्राप्नोति सद्गतिम्
अथ ते वै जयन्त्येनं तालाग्राद् इव पात्यते
tāṃścejjayati śatrūnsa tadā prāpnoti sadgatim
atha te vai jayantyenaṃ tālāgrād iva pātyate
- 16
मतङ्ग सम्प्रधार्यैतद्यद् अहं त्वाम् अचूचुदम्
वृणीष्व कामम् अन्यं त्वं ब्राह्मण्यं हि सुदुर्लभम्
mataṅga sampradhāryaitadyad ahaṃ tvām acūcudam
vṛṇīṣva kāmam anyaṃ tvaṃ brāhmaṇyaṃ hi sudurlabham

