12 shlokas
- 1
युधिष्ठिर उवाच
इदं मे तत्त्वतो राजन्वक्तुम् अर्हसि भारत
अहिंसयित्वा केनेह ब्रह्महत्या विधीयते
yudhiṣṭhira uvāca
idaṃ me tattvato rājanvaktum arhasi bhārata
ahiṃsayitvā keneha brahmahatyā vidhīyate
- 2
भीष्म उवाच
व्यासम् आमन्त्र्य राजेन्द्र पुरा यत्पृष्टवान् अहम्
तत्ते ऽहं सम्प्रवक्ष्यामि तद् इहैकमनाः शृणु
bhīṣma uvāca
vyāsam āmantrya rājendra purā yatpṛṣṭavān aham
tatte 'haṃ sampravakṣyāmi tad ihaikamanāḥ śṛṇu
- 3
चतुर्थस्त्वं वसिष्ठस्य तत्त्वम् आख्याहि मे मुने
अहिंसयित्वा केनेह ब्रह्महत्या विधीयते
caturthastvaṃ vasiṣṭhasya tattvam ākhyāhi me mune
ahiṃsayitvā keneha brahmahatyā vidhīyate
- 4
इति पृष्टो महाराज पराशरशरीरजः
अब्रवीन्निपुणो धर्मे निःसंशयम् अनुत्तमम्
iti pṛṣṭo mahārāja parāśaraśarīrajaḥ
abravīnnipuṇo dharme niḥsaṃśayam anuttamam
- 5
ब्राह्मणं स्वयम् आहूय भिक्षार्थे कृशवृत्तिनम्
ब्रूयान्नास्तीति यः पश्चात्तं विद्याद्ब्रह्मघातिनम्
brāhmaṇaṃ svayam āhūya bhikṣārthe kṛśavṛttinam
brūyānnāstīti yaḥ paścāttaṃ vidyādbrahmaghātinam
- 6
मध्यस्थस्येह विप्रस्य यो ऽनूचानस्य भारत
वृत्तिं हरति दुर्बुद्धिस्तं विद्याद्ब्रह्मघातिनम्
madhyasthasyeha viprasya yo 'nūcānasya bhārata
vṛttiṃ harati durbuddhistaṃ vidyādbrahmaghātinam
- 7
गोकुलस्य तृषार्तस्य जलार्थे वसुधाधिप
उत्पादयति यो विघ्नं तं विद्याद्ब्रह्मघातिनम्
gokulasya tṛṣārtasya jalārthe vasudhādhipa
utpādayati yo vighnaṃ taṃ vidyādbrahmaghātinam
- 8
यः प्रवृत्तां श्रुतिं सम्यक्शास्त्रं वा मुनिभिः कृतम्
दूषयत्य् अनभिज्ञाय तं विद्याद्ब्रह्मघातिनम्
yaḥ pravṛttāṃ śrutiṃ samyakśāstraṃ vā munibhiḥ kṛtam
dūṣayaty anabhijñāya taṃ vidyādbrahmaghātinam
- 9
आत्मजां रूपसम्पन्नां महतीं सदृशे वरे
न प्रयच्छति यः कन्यां तं विद्याद्ब्रह्मघातिनम्
ātmajāṃ rūpasampannāṃ mahatīṃ sadṛśe vare
na prayacchati yaḥ kanyāṃ taṃ vidyādbrahmaghātinam
- 10
अधर्मनिरतो मूढो मिथ्या यो वै द्विजातिषु
दद्यान्मर्मातिगं शोकं तं विद्याद्ब्रह्मघातिनम्
adharmanirato mūḍho mithyā yo vai dvijātiṣu
dadyānmarmātigaṃ śokaṃ taṃ vidyādbrahmaghātinam
- 11
चक्षुषा विप्रहीनस्य पङ्गुलस्य जडस्य वा
हरेत यो वै सर्वस्वं तं विद्याद्ब्रह्मघातिनम्
cakṣuṣā viprahīnasya paṅgulasya jaḍasya vā
hareta yo vai sarvasvaṃ taṃ vidyādbrahmaghātinam
- 12
आश्रमे वा वने वा यो ग्रामे वा यदि वा पुरे
अग्निं समुत्सृजेन्मोहात्तं विद्याद्ब्रह्मघातिनम्
āśrame vā vane vā yo grāme vā yadi vā pure
agniṃ samutsṛjenmohāttaṃ vidyādbrahmaghātinam

