12 shlokas
- 1
युधिष्ठिर उवाच
उक्तं वै गोप्रदानं ते नाचिकेतम् ऋषिं प्रति
माहात्म्यम् अपि चैवोक्तम् उद्देशेन गवां प्रभो
yudhiṣṭhira uvāca
uktaṃ vai gopradānaṃ te nāciketam ṛṣiṃ prati
māhātmyam api caivoktam uddeśena gavāṃ prabho
- 2
नृगेण च यथा दुःखम् अनुभूतं महात्मना
एकापराधाद् अज्ञानात्पितामह महामते
nṛgeṇa ca yathā duḥkham anubhūtaṃ mahātmanā
ekāparādhād ajñānātpitāmaha mahāmate
- 3
द्वारवत्यां यथा चासौ निविशन्त्यां समुद्धृतः
मोक्षहेतुर् अभूत्कृष्णस्तद् अप्यवधृतं मया
dvāravatyāṃ yathā cāsau niviśantyāṃ samuddhṛtaḥ
mokṣahetur abhūtkṛṣṇastad apyavadhṛtaṃ mayā
- 4
किं त्वस्ति मम संदेहो गवां लोकं प्रति प्रभो
तत्त्वतः श्रोतुम् इच्छामि गोदा यत्र विशन्त्युत
kiṃ tvasti mama saṃdeho gavāṃ lokaṃ prati prabho
tattvataḥ śrotum icchāmi godā yatra viśantyuta
- 5
भीष्म उवाच
अत्राप्युदाहरन्तीमम् इतिहासं पुरातनम्
यथापृच्छत्पद्मयोनिम् एतद् एव शतक्रतुः
bhīṣma uvāca
atrāpyudāharantīmam itihāsaṃ purātanam
yathāpṛcchatpadmayonim etad eva śatakratuḥ
- 6
शक्र उवाच
स्वर्लोकवासिनां लक्ष्मीम् अभिभूय स्वया त्विषा
गोलोकवासिनः पश्ये व्रजतः संशयो ऽत्र मे
śakra uvāca
svarlokavāsināṃ lakṣmīm abhibhūya svayā tviṣā
golokavāsinaḥ paśye vrajataḥ saṃśayo 'tra me
- 7
कीदृशा भगवंल्लोका गवां तद्ब्रूहि मे ऽनघ
यान् आवसन्ति दातार एतद् इच्छामि वेदितुम्
kīdṛśā bhagavaṃllokā gavāṃ tadbrūhi me 'nagha
yān āvasanti dātāra etad icchāmi veditum
- 8
कीदृशाः किंफलाः कः स्वित्परमस्तत्र वै गुणः
कथं च पुरुषास्तत्र गच्छन्ति विगतज्वराः
kīdṛśāḥ kiṃphalāḥ kaḥ svitparamastatra vai guṇaḥ
kathaṃ ca puruṣāstatra gacchanti vigatajvarāḥ
- 9
कियत्कालं प्रदानस्य दाता च फलम् अश्नुते
कथं बहुविधं दानं स्याद् अल्पम् अपि वा कथम्
kiyatkālaṃ pradānasya dātā ca phalam aśnute
kathaṃ bahuvidhaṃ dānaṃ syād alpam api vā katham
- 10
बह्वीनां कीदृशं दानम् अल्पानां वापि कीदृशम्
अदत्त्वा गोप्रदाः सन्ति केन वा तच्च शंस मे
bahvīnāṃ kīdṛśaṃ dānam alpānāṃ vāpi kīdṛśam
adattvā gopradāḥ santi kena vā tacca śaṃsa me
- 11
कथं च बहुदाता स्याद् अल्पदात्रा समः प्रभो
अल्पप्रदाता बहुदः कथं च स्याद् इहेश्वर
kathaṃ ca bahudātā syād alpadātrā samaḥ prabho
alpapradātā bahudaḥ kathaṃ ca syād iheśvara
- 12
कीदृशी दक्षिणा चैव गोप्रदाने विशिष्यते
एतत्तथ्येन भगवन्मम शंसितुम् अर्हसि
kīdṛśī dakṣiṇā caiva gopradāne viśiṣyate
etattathyena bhagavanmama śaṃsitum arhasi

