11 shlokas
- 1
याज्ञवल्क्य उवाच
द्रव्यशुद्धिं प्रवक्ष्यामि तन्निबोधत सत्तमाः
सौवर्णराजताब्जानां शङ्खरज्ज्वादिचर्मणाम्
yājñavalkya uvāca
dravyaśuddhiṃ pravakṣyāmi tannibodhata sattamāḥ
sauvarṇarājatābjānāṃ śaṅkharajjvādicarmaṇām
- 2
पात्राणां चासनानां च वारिणा शुद्धिरिष्यते
उष्णवाभः स्रुक्स्रुवयोर्धान्यादेः प्रोक्षणेन च
pātrāṇāṃ cāsanānāṃ ca vāriṇā śuddhiriṣyate
uṣṇavābhaḥ sruksruvayordhānyādeḥ prokṣaṇena ca
- 3
तक्षणाद्दारुशृङ्गादेर्यज्ञपात्रस्य मार्जनात्
सोष्णैर् उदकगोमूत्रैः शुध्यत्याविककौशिकम्
takṣaṇāddāruśṛṅgāderyajñapātrasya mārjanāt
soṣṇair udakagomūtraiḥ śudhyatyāvikakauśikam
- 4
भैक्ष्यं योषिन्मुखं पश्यन्पुनः पाकान्महीमयम्
गोघ्राते ऽन्ने तथा केशमक्षिकाकीटदूषिते
bhaikṣyaṃ yoṣinmukhaṃ paśyanpunaḥ pākānmahīmayam
goghrāte 'nne tathā keśamakṣikākīṭadūṣite
- 5
भस्मक्षेपाद्विशुद्धिः स्याद्भूशुद्धिर्मार्जनादिना
त्रपुसीसकताम्राणां क्षाराम्लोदकवारिभिः
bhasmakṣepādviśuddhiḥ syādbhūśuddhirmārjanādinā
trapusīsakatāmrāṇāṃ kṣārāmlodakavāribhiḥ
- 6
भस्माद्भिर्लोहकांस्यानामज्ञातं च सदा शुचि
अमेध्याक्तस्य मृत्तोयैर्गन्धलेपापकर्षणात्
bhasmādbhirlohakāṃsyānāmajñātaṃ ca sadā śuci
amedhyāktasya mṛttoyairgandhalepāpakarṣaṇāt
- 7
शुचि गोतृप्तिदं तोयं प्रकृतिस्थं महीगतम्
तथा मांसं श्वचाण्डालक्रव्यादादिनिपातितम्
śuci gotṛptidaṃ toyaṃ prakṛtisthaṃ mahīgatam
tathā māṃsaṃ śvacāṇḍālakravyādādinipātitam
- 8
रश्मिरग्नी रजश्छाया गौरश्वो वसुधानिलाः
अश्वाजविप्रुषो मेध्यास्तथाचमनबिन्दवः
raśmiragnī rajaśchāyā gauraśvo vasudhānilāḥ
aśvājavipruṣo medhyāstathācamanabindavaḥ
- 9
स्नात्वा पीत्वा क्षुते सुप्ते भुक्त्वा रथ्याप्रसर्पणे
आचान्तः पुनराचामेद्वासो ऽन्यत्परिधाय च
snātvā pītvā kṣute supte bhuktvā rathyāprasarpaṇe
ācāntaḥ punarācāmedvāso 'nyatparidhāya ca
- 10
क्षुते निष्ठीविते स्वापे परिधाने ऽश्रुपातने
पञ्चस्वेतेषु नाचामेद्दक्षिणं श्रवणं स्पृशेत्
तिष्ठन्त्यग्न्यादयो देवा विप्रकर्णे तु दक्षिणे
kṣute niṣṭhīvite svāpe paridhāne 'śrupātane
pañcasveteṣu nācāmeddakṣiṇaṃ śravaṇaṃ spṛśet
tiṣṭhantyagnyādayo devā viprakarṇe tu dakṣiṇe
- 11
इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तद्रव्यशुद्धिनिरूपणं नाम सप्तनवतितमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yājñavalkyoktadravyaśuddhinirūpaṇaṃ nāma saptanavatitamo 'dhyāyaḥ

