19 shlokas
- 1
सूत उवाच
स्वायम्भुवाद्या मुनयो हरिं ध्यायन्ति कर्मणा
व्रताचारार्चनाध्यानस्तुतिजप्यपरायणाः
sūta uvāca
svāyambhuvādyā munayo hariṃ dhyāyanti karmaṇā
vratācārārcanādhyānastutijapyaparāyaṇāḥ
- 2
देहेन्द्रियमनोबुद्धिप्राणाहङ्कारवर्जितम्
आकाशेन विहीनं वै तेजसा परिवर्जितम्
dehendriyamanobuddhiprāṇāhaṅkāravarjitam
ākāśena vihīnaṃ vai tejasā parivarjitam
- 3
उदकेन विहीनं वै तद्धर्मपरिवर्जितम्
पृथिवीरहितं चैव सर्वभतविवर्जितम्
udakena vihīnaṃ vai taddharmaparivarjitam
pṛthivīrahitaṃ caiva sarvabhatavivarjitam
- 4
भूताध्यक्षं तथा बद्धनियन्तारं प्रभुं विभुम्
चैतन्यरूपतारूपं सर्वाध्यक्षं निरञ्जनम्
bhūtādhyakṣaṃ tathā baddhaniyantāraṃ prabhuṃ vibhum
caitanyarūpatārūpaṃ sarvādhyakṣaṃ nirañjanam
- 5
मुक्तसङ्गं महेशानं सर्वदेवप्रपूजितम्
तेजोरूपमसत्त्वं च तपसा परिवर्जितम्
muktasaṅgaṃ maheśānaṃ sarvadevaprapūjitam
tejorūpamasattvaṃ ca tapasā parivarjitam
- 6
रहितं रजसा नित्यं व्यतिरिक्तं गुणैस्त्रिभिः
सर्वरूपविहीनं वै कर्तृत्वादिविवर्जितम्
rahitaṃ rajasā nityaṃ vyatiriktaṃ guṇaistribhiḥ
sarvarūpavihīnaṃ vai kartṛtvādivivarjitam
- 7
वासनारहितं शुद्धं सर्वदोषविवर्जितम्
पिपासावर्जितं तत्तच्छोकमोहविवर्जितम्
vāsanārahitaṃ śuddhaṃ sarvadoṣavivarjitam
pipāsāvarjitaṃ tattacchokamohavivarjitam
- 8
जरामरणहीनं वै कूटस्थं मोहवर्जितम्
उत्पत्तिरहितं चैव प्रलयेन विवर्जितम्
jarāmaraṇahīnaṃ vai kūṭasthaṃ mohavarjitam
utpattirahitaṃ caiva pralayena vivarjitam
- 9
सत्यं सर्वाचारहीनं निष्कलं परमेश्वरम्
जाग्रत्स्वप्नसुषुप्त्यादिवर्जितं नामवर्जितम्
satyaṃ sarvācārahīnaṃ niṣkalaṃ parameśvaram
jāgratsvapnasuṣuptyādivarjitaṃ nāmavarjitam
- 10
अध्यक्षं जाग्रदादीनां शान्तरूपं सुरेश्वरम्
जाग्रदादिस्थितं नित्यं कार्यकारणवर्जितम्
adhyakṣaṃ jāgradādīnāṃ śāntarūpaṃ sureśvaram
jāgradādisthitaṃ nityaṃ kāryakāraṇavarjitam
- 11
सर्वदृष्टं तथा मूर्तं सूक्ष्मं सूक्ष्मतरं परम्
ज्ञानदृक्श्रोत्रविज्ञानं परमानन्दरूपकम्
sarvadṛṣṭaṃ tathā mūrtaṃ sūkṣmaṃ sūkṣmataraṃ param
jñānadṛkśrotravijñānaṃ paramānandarūpakam
- 12
विश्वेन रहितं तद्वत्तैजसेन विवर्जितम्
प्राज्ञेन रहितं चैव तुरीयं परमाक्षरम्
viśvena rahitaṃ tadvattaijasena vivarjitam
prājñena rahitaṃ caiva turīyaṃ paramākṣaram
- 13
सर्वगोप्तृ सर्वहन्तृ सर्वभूतात्मरूपि च
बुद्धिधर्मविहीनं वै निराधारं शिवं हरिम्
sarvagoptṛ sarvahantṛ sarvabhūtātmarūpi ca
buddhidharmavihīnaṃ vai nirādhāraṃ śivaṃ harim
- 14
विक्रियारहितं चैव वेदान्तैर्वेद्यमेव च
वेदरूपं परं भूतमिन्द्रियेभ्यः परं शुभम्
vikriyārahitaṃ caiva vedāntairvedyameva ca
vedarūpaṃ paraṃ bhūtamindriyebhyaḥ paraṃ śubham
- 15
शब्देन वर्जितं चैव रसेन च विवर्जितम्
स्पर्शेन रहितं देवं रूपमात्रविवर्जितम्
śabdena varjitaṃ caiva rasena ca vivarjitam
sparśena rahitaṃ devaṃ rūpamātravivarjitam
- 16
रूपेण रहितं चैव गन्धेन परिवर्जितम्
अनादि ब्रह्म रन्ध्रान्तमहं ब्रह्मास्मि केवलम्
rūpeṇa rahitaṃ caiva gandhena parivarjitam
anādi brahma randhrāntamahaṃ brahmāsmi kevalam
- 17
एवं ज्ञात्वा महादेवध्यानं कुर्याज्जितेन्द्रियः
ध्यानं यः कुरुते ह्येवं स भवेद्बह्म मानवः
evaṃ jñātvā mahādevadhyānaṃ kuryājjitendriyaḥ
dhyānaṃ yaḥ kurute hyevaṃ sa bhavedbahma mānavaḥ
- 18
इति ध्यानं समाख्यातम् अश्विरस्य मया तव
अधुना कथयाम्यन्यत्किं तद्ब्रूहि वृषध्वज
iti dhyānaṃ samākhyātam aśvirasya mayā tava
adhunā kathayāmyanyatkiṃ tadbrūhi vṛṣadhvaja
- 19
इति श्रीगारुडे महापुराणे प्रथमांशाख्ये आचारकाण्डे हरिध्यानं नामैकनवतितमो ऽध्यायः
iti śrīgāruḍe mahāpurāṇe prathamāṃśākhye ācārakāṇḍe haridhyānaṃ nāmaikanavatitamo 'dhyāyaḥ

