61 shlokas
- 1
हरिरुवाच
राज्ञां वंशान्प्रवक्ष्यामि वंशानुचरितानि च
विष्णुनाभ्यब्जतो ब्रह्मा दक्षो ऽङ्गुष्ठाच्च तस्य वै
hariruvāca
rājñāṃ vaṃśānpravakṣyāmi vaṃśānucaritāni ca
viṣṇunābhyabjato brahmā dakṣo 'ṅguṣṭhācca tasya vai
- 2
ततो ऽपितर्विवस्वांश्च ततः सूनुर्विवस्वतः
मनुरिक्ष्वाकुशर्याती नृगो धृष्टः प्रषध्रकः
tato 'pitarvivasvāṃśca tataḥ sūnurvivasvataḥ
manurikṣvākuśaryātī nṛgo dhṛṣṭaḥ praṣadhrakaḥ
- 3
नरिष्यन्तश्च नाभागो दिष्टः शशक एव च
मनोरासीदिला कन्या सुद्युम्नो ऽस्य सुतो ऽभवत्
nariṣyantaśca nābhāgo diṣṭaḥ śaśaka eva ca
manorāsīdilā kanyā sudyumno 'sya suto 'bhavat
- 4
इलायां तु बुधाज्जातो राजा रुद्र पुरूरवाः
सुतास्त्रयश्च सुद्युम्नादुत्कलो विनतो गयः
ilāyāṃ tu budhājjāto rājā rudra purūravāḥ
sutāstrayaśca sudyumnādutkalo vinato gayaḥ
- 5
अभृच्छ्रद्रो गोवधात्तु पृषध्रस्तु मनोः सुतः
करूषात्क्षत्त्रिया जाताः कारूषा इति विश्रुताः
abhṛcchradro govadhāttu pṛṣadhrastu manoḥ sutaḥ
karūṣātkṣattriyā jātāḥ kārūṣā iti viśrutāḥ
- 6
दिष्टपुत्रस्तु नाभागो वैश्यातामगमत्स च
तस्माद्भलन्दनः पुत्रो वत्सप्रीतिर्भलन्दनात्
diṣṭaputrastu nābhāgo vaiśyātāmagamatsa ca
tasmādbhalandanaḥ putro vatsaprītirbhalandanāt
- 7
ततः पांशुः खनित्रो ऽभूद्भूपस्तस्मात्ततः क्षुपः
क्षुपाद्विंशो ऽभवत्पुत्रो विंशाज्जातो विविंशकः
tataḥ pāṃśuḥ khanitro 'bhūdbhūpastasmāttataḥ kṣupaḥ
kṣupādviṃśo 'bhavatputro viṃśājjāto viviṃśakaḥ
- 8
विविंशाच्च खनीनेत्रो विभूतिस्तत्सुतः स्मृतः
करन्धमो विभूतेस्तु ततो जातो ऽप्यविक्षितः
viviṃśācca khanīnetro vibhūtistatsutaḥ smṛtaḥ
karandhamo vibhūtestu tato jāto 'pyavikṣitaḥ
- 9
मरुत्तो ऽविक्षितस्यापि नरिष्यन्तस्ततः स्मृतः
नरिष्यन्तात्तमो जातस्ततो ऽभूद्राजवर्धनः
marutto 'vikṣitasyāpi nariṣyantastataḥ smṛtaḥ
nariṣyantāttamo jātastato 'bhūdrājavardhanaḥ
- 10
राजवर्धात्सुधृतिश्च नरो ऽभूत्सुधृतेः सुतः
नराच्च केवलः पुत्रः केवलाद्धुन्धुमानपि
rājavardhātsudhṛtiśca naro 'bhūtsudhṛteḥ sutaḥ
narācca kevalaḥ putraḥ kevalāddhundhumānapi
- 11
धुन्धुमतो वेगवांश्च बुधो वेगवतः सुतः
तृणबिन्दुर्बुधाज्जातः कान्या चैलविला तथा
dhundhumato vegavāṃśca budho vegavataḥ sutaḥ
tṛṇabindurbudhājjātaḥ kānyā cailavilā tathā
- 12
विशालं जनयामास तृणबिन्दोस्त्वलम्बुसा
विशालाद्धेमचन्द्रो ऽभूद्धेमचन्द्राच्च चन्द्रकः
viśālaṃ janayāmāsa tṛṇabindostvalambusā
viśālāddhemacandro 'bhūddhemacandrācca candrakaḥ
- 13
धूम्राश्वश्चैव चन्द्रात्तु धूम्राश्वात्सृञ्जयस्तथा
सञ्जयात्सहदेवो ऽभूत्कृशाश्वस्तत्सुतो ऽभवत्
dhūmrāśvaścaiva candrāttu dhūmrāśvātsṛñjayastathā
sañjayātsahadevo 'bhūtkṛśāśvastatsuto 'bhavat
- 14
कृशाश्वात्सोमदत्तस्तुततो ऽभूज्जनमेजयः
तत्पुत्रश्च सुमन्तिश्च एते वैशालका नृपाः
kṛśāśvātsomadattastutato 'bhūjjanamejayaḥ
tatputraśca sumantiśca ete vaiśālakā nṛpāḥ
- 15
शर्यातेस्तु सुकन्याभूत्सा भार्या च्यवनस्य तु
अनन्तो नाम शर्यातेर् अनन्ताद्रेवतो ऽभवत्
śaryātestu sukanyābhūtsā bhāryā cyavanasya tu
ananto nāma śaryāter anantādrevato 'bhavat
- 16
रैवतो रेवतस्यापि रैवताद्रेवती सुता
धृष्टस्य धार्ष्टर्कं क्षेत्रं वैष्णवं तद्बभूव ह
raivato revatasyāpi raivatādrevatī sutā
dhṛṣṭasya dhārṣṭarkaṃ kṣetraṃ vaiṣṇavaṃ tadbabhūva ha
- 17
नाभागपुत्रो नेष्ठो ह्यम्बरीषो ऽपि तत्सुतः
अम्बरीषाद्विरूपो ऽभूत्पृषदश्वो विरूपतः
nābhāgaputro neṣṭho hyambarīṣo 'pi tatsutaḥ
ambarīṣādvirūpo 'bhūtpṛṣadaśvo virūpataḥ
- 18
रथीनरश्च तत्पुत्रो वासुदेवपरायणः
इक्ष्वाकोस्तु त्रयः पुत्राः विकुक्षिनिमिदण्डकाः
rathīnaraśca tatputro vāsudevaparāyaṇaḥ
ikṣvākostu trayaḥ putrāḥ vikukṣinimidaṇḍakāḥ
- 19
इक्ष्वाकुजो विकुक्षिस्तु शशादः शशभक्षणात्
पुरञ्जयः शशादाच्च ककुत्स्थाख्यो ऽभवत्सुतः
ikṣvākujo vikukṣistu śaśādaḥ śaśabhakṣaṇāt
purañjayaḥ śaśādācca kakutsthākhyo 'bhavatsutaḥ
- 20
अनेनास्तु ककुत्स्थाच्च पृथुः पुत्रस्त्व् अनेनसः
विश्वरातः पृथोः पुत्र आर्द्रे ऽभूद्विश्वराततः
anenāstu kakutsthācca pṛthuḥ putrastv anenasaḥ
viśvarātaḥ pṛthoḥ putra ārdre 'bhūdviśvarātataḥ
- 21
युवनाश्वो ऽभवच्चार्द्राच्छावस्तो युवनाश्वतः
बृहदश्वस्तु शावस्तात्तत्पुत्रः कुवलाश्वकः
yuvanāśvo 'bhavaccārdrācchāvasto yuvanāśvataḥ
bṛhadaśvastu śāvastāttatputraḥ kuvalāśvakaḥ
- 22
धुन्धुमारो हि विख्यातो दृढाश्वश्च ततो ऽभवत्
चन्द्राश्वः कपिलाश्वश्च हर्यश्वश्च दृढाश्वतः
dhundhumāro hi vikhyāto dṛḍhāśvaśca tato 'bhavat
candrāśvaḥ kapilāśvaśca haryaśvaśca dṛḍhāśvataḥ
- 23
हर्यश्वाच्च निकुम्भो ऽभूद्धिताश्वश्च निकुम्भतः
पूजाश्वश्च हिताश्वाच्च तत्सुतो युवनाश्वकः
haryaśvācca nikumbho 'bhūddhitāśvaśca nikumbhataḥ
pūjāśvaśca hitāśvācca tatsuto yuvanāśvakaḥ
- 24
युवनाश्वाच्च मान्धाता बिन्दुमत्यास्ततो ऽभवत्
मुचुकुन्दो ऽम्बरीषश्च पुरुकुत्सस्त्रयः सुताः
yuvanāśvācca māndhātā bindumatyāstato 'bhavat
mucukundo 'mbarīṣaśca purukutsastrayaḥ sutāḥ
- 25
पञ्चाशत्कन्यकाश्चैव भार्यास्ताः सौभरेर्मुनेः
युवनाश्वो ऽम्बरीषाच्च हरितो युवनाश्वतः
pañcāśatkanyakāścaiva bhāryāstāḥ saubharermuneḥ
yuvanāśvo 'mbarīṣācca harito yuvanāśvataḥ
- 26
पुरुकुत्सान्नर्मदायां त्रसदस्युर् अभूत्सुतः
अनरण्यस्ततो जातो हर्यश्वो ऽप्यनरण्यतः
purukutsānnarmadāyāṃ trasadasyur abhūtsutaḥ
anaraṇyastato jāto haryaśvo 'pyanaraṇyataḥ
- 27
तत्पुत्रो ऽभूद्वसुमनास्त्रिधन्वा तस्य चात्मजः
त्रय्यारुणस्तस्य पुत्रस्तस्त सत्यरतः सुतः
tatputro 'bhūdvasumanāstridhanvā tasya cātmajaḥ
trayyāruṇastasya putrastasta satyarataḥ sutaḥ
- 28
यस्त्रिशङ्कुः समाख्यातो हरिश्चन्द्रो ऽभवत्ततः
हरिश्चन्द्राद्रोहिताश्वो हरितो रोहिताश्वतः
yastriśaṅkuḥ samākhyāto hariścandro 'bhavattataḥ
hariścandrādrohitāśvo harito rohitāśvataḥ
- 29
हरितस्य सुतश्चञ्चुश्चञ्चोश्च विजयः सुतः
विजयाद्रुरुको जज्ञे रुरुकात्तु वृकः सुतः
haritasya sutaścañcuścañcośca vijayaḥ sutaḥ
vijayādruruko jajñe rurukāttu vṛkaḥ sutaḥ
- 30
वृकाद्बाहुर्नृपो ऽभूच्च बाहोस्तु सगरः स्मृतः
षष्टिः पुत्रसहस्राणि सुमत्यां सगराद्धर
vṛkādbāhurnṛpo 'bhūcca bāhostu sagaraḥ smṛtaḥ
ṣaṣṭiḥ putrasahasrāṇi sumatyāṃ sagarāddhara

