9 shlokas
- 1
सूत उवाच
हिमवत्युत्तरदेशे वीर्यं पतितं सुरद्विषस्तस्य
सम्प्राप्तम् उत्तमानाम् आकरतां भीष्मरत्नानाम्
sūta uvāca
himavatyuttaradeśe vīryaṃ patitaṃ suradviṣastasya
samprāptam uttamānām ākaratāṃ bhīṣmaratnānām
- 2
शुक्लाः शङ्खाब्जनिभाः स्योनाकसन्निभा प्रभावन्तः
प्रभवन्ति ततस्तरुणा वज्रनिभा भीष्मपाषाणाः
śuklāḥ śaṅkhābjanibhāḥ syonākasannibhā prabhāvantaḥ
prabhavanti tatastaruṇā vajranibhā bhīṣmapāṣāṇāḥ
- 3
हेमादिप्रतिबद्धाः शुद्धमपि श्रद्धया विधत्ते यः
भीष्ममणिं ग्रीवादिषु सुसम्पदं स सर्वदा लभते
hemādipratibaddhāḥ śuddhamapi śraddhayā vidhatte yaḥ
bhīṣmamaṇiṃ grīvādiṣu susampadaṃ sa sarvadā labhate
- 4
निरीक्ष्य पलायन्ते यं तमरण्यनिवासिनः समीपेऽपि
द्वीपिवृकशरभकुञ्जरसिंहव्याघ्रादयो हिंस्राः
nirīkṣya palāyante yaṃ tamaraṇyanivāsinaḥ samīpe'pi
dvīpivṛkaśarabhakuñjarasiṃhavyāghrādayo hiṃsrāḥ
- 5
तस्योत्कलतष्टतरोर्भवति भयं न चास्तीशमुपहसन्ति
भीष्ममणिर्गुणयुक्तः सम्यक्प्राप्ताङ्गुलीकलत्रत्वः
tasyotkalataṣṭatarorbhavati bhayaṃ na cāstīśamupahasanti
bhīṣmamaṇirguṇayuktaḥ samyakprāptāṅgulīkalatratvaḥ
- 6
पितृतर्पणे पितॄणां तृप्तिर्बहुवार्षिकी भवति
शाम्यन्त्यद्भुतान्यपि सर्पाण्डजाखुवृश्चिकविषाणि
सलिलाग्निवैरितस्करभयानि भीमानि नश्यन्ति
pitṛtarpaṇe pitṝṇāṃ tṛptirbahuvārṣikī bhavati
śāmyantyadbhutānyapi sarpāṇḍajākhuvṛścikaviṣāṇi
salilāgnivairitaskarabhayāni bhīmāni naśyanti
- 7
शैवलबलाहकाभं पुरुषं पीतप्रभं प्रभाहीनम्
मलिनद्युति च विवर्णं दूरात्परिवर्जयेत्प्राज्ञः
śaivalabalāhakābhaṃ puruṣaṃ pītaprabhaṃ prabhāhīnam
malinadyuti ca vivarṇaṃ dūrātparivarjayetprājñaḥ
- 8
मूल्यं प्रकल्प्यमेषां विबुधवरैर्देशकालविज्ञानात्
दूरे भूतानां बहु किंचिन्निकटप्रसूतानाम्
mūlyaṃ prakalpyameṣāṃ vibudhavarairdeśakālavijñānāt
dūre bhūtānāṃ bahu kiṃcinnikaṭaprasūtānām
- 9
इति श्रीगारुडे महापुराणे पूर्वखण्डे प्रथमांशाख्ये आचारकाण्डे वैदूर्यपरीक्षणं नाम षट्सप्ततितमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe vaidūryaparīkṣaṇaṃ nāma ṣaṭsaptatitamo 'dhyāyaḥ

