22 shlokas
- 1
सूत उवाच
वक्ष्ये तत्परमं गुह्यं शिवोक्तं मन्त्रवृन्दकम्
पाशं धनुश्च चक्रं च मुद्ररं शूलपट्टिशम्
sūta uvāca
vakṣye tatparamaṃ guhyaṃ śivoktaṃ mantravṛndakam
pāśaṃ dhanuśca cakraṃ ca mudraraṃ śūlapaṭṭiśam
- 2
एतैरेवायुधैर्युद्धे मन्त्रैः शत्रूञ्जयेन्नृपः
मन्त्रोद्धारः पद्मपात्रे आदिपूर्वादिके लिखेत्
etairevāyudhairyuddhe mantraiḥ śatrūñjayennṛpaḥ
mantroddhāraḥ padmapātre ādipūrvādike likhet
- 3
अष्टवर्गं चाष्टमं च ख्यातमीशानपत्रके
ॐकारो ब्रह्मबीजं स्याद्ध्रीङ्कारो विष्णुरेव च
aṣṭavargaṃ cāṣṭamaṃ ca khyātamīśānapatrake
oṃkāro brahmabījaṃ syāddhrīṅkāro viṣṇureva ca
- 4
ह्रीङ्कारश्च शिवः शूले त्रिशाखे तु क्रमान्न्यसेत्
ॐ ह्रीं ह्रीं
hrīṅkāraśca śivaḥ śūle triśākhe tu kramānnyaset
oṃ hrīṃ hrīṃ
- 5
शूलं गृहीत्वा हस्तेनाभ्राम्य चाकाशसंमुखम्
तद्दर्शनान्द्रहा नागा दृष्ट्वा वा नाशमाप्नुयुः
śūlaṃ gṛhītvā hastenābhrāmya cākāśasaṃmukham
taddarśanāndrahā nāgā dṛṣṭvā vā nāśamāpnuyuḥ
- 6
धूमारक्ते करं मध्ये ध्यात्वा खे चिन्तयेन्नरः
दुष्टा नागा ग्रहा मेघा विनश्यन्ति च राक्षसाः
dhūmārakte karaṃ madhye dhyātvā khe cintayennaraḥ
duṣṭā nāgā grahā meghā vinaśyanti ca rākṣasāḥ
- 7
त्रिलोकान्रक्षयेन्मन्त्रो मर्त्यलोकस्य का कथा
ॐ जूं सूं हूं फट्
trilokānrakṣayenmantro martyalokasya kā kathā
oṃ jūṃ sūṃ hūṃ phaṭ
- 8
खादिरान्कीलकानष्टौ क्षेत्रे संमन्त्र्य विन्यसेत्
न तत्र वज्रपातस्य स्फूर्जथ्वादेरुपद्रवः
khādirānkīlakānaṣṭau kṣetre saṃmantrya vinyaset
na tatra vajrapātasya sphūrjathvāderupadravaḥ
- 9
गरुडोक्तैर्महामन्त्रैः कीलकानष्ट मन्त्रयेत्
एकविंशतिवाराणि क्षेत्रे तु निखनेन्निशि
garuḍoktairmahāmantraiḥ kīlakānaṣṭa mantrayet
ekaviṃśativārāṇi kṣetre tu nikhanenniśi
- 10
विद्युन्मूषकवज्रादिसमुपद्रव एव च
हरक्षमलवरयू बिन्दुयुक्तः सदाशिवः
vidyunmūṣakavajrādisamupadrava eva ca
harakṣamalavarayū binduyuktaḥ sadāśivaḥ
- 11
ॐ ह्रां सदाशिवाय नमः
तर्जन्या विन्यसेत्पिण्डं दाडिमीकुसुमप्रभम्
oṃ hrāṃ sadāśivāya namaḥ
tarjanyā vinyasetpiṇḍaṃ dāḍimīkusumaprabham
- 12
तस्यैव दर्शनाद्दुष्टा मेघविद्युद्दीपादयः
राक्षसा भूतडाकिन्यः प्रद्रवन्ति दिशो दश
tasyaiva darśanādduṣṭā meghavidyuddīpādayaḥ
rākṣasā bhūtaḍākinyaḥ pradravanti diśo daśa
- 13
ॐ ह्रीं गणेशाय नमः
स्तम्भनादिचक्राय नमः
ॐ ऐं ब्रहयैन्त्रै लोक्यडामराय नमः
oṃ hrīṃ gaṇeśāya namaḥ
stambhanādicakrāya namaḥ
oṃ aiṃ brahayaintrai lokyaḍāmarāya namaḥ
- 14
भैरवं पिण्डमाख्यातं विषपापग्रहापहम्
क्षेत्रस्य रक्षणं भूतराक्षसादेः प्रमर्दनम्
bhairavaṃ piṇḍamākhyātaṃ viṣapāpagrahāpaham
kṣetrasya rakṣaṇaṃ bhūtarākṣasādeḥ pramardanam
- 15
ॐ नमः
इन्द्रवज्रं करे ध्यात्वा दुष्टमेघादिवारणम्
विषशत्रुगणा भूता नश्यन्ते वज्रमुद्रया
oṃ namaḥ
indravajraṃ kare dhyātvā duṣṭameghādivāraṇam
viṣaśatrugaṇā bhūtā naśyante vajramudrayā
- 16
ॐ क्षुं नमः
स्मरेत्पाशं वामहस्ते विषभूतादि नश्यति
ॐ ह्रां नमः
हरेदुच्चारणान्मन्त्रो विषमेघग्रहादिकान्
oṃ kṣuṃ namaḥ
smaretpāśaṃ vāmahaste viṣabhūtādi naśyati
oṃ hrāṃ namaḥ
hareduccāraṇānmantro viṣameghagrahādikān
- 17
ध्यात्वा कृतान्तं च दहेच्छेदकास्त्रेण वै जगत्
ॐ क्ष्णं नमः
ध्यात्वा तु भैरवं कुर्यान्द्रहभूतविषापहम्
dhyātvā kṛtāntaṃ ca dahecchedakāstreṇa vai jagat
oṃ kṣṇaṃ namaḥ
dhyātvā tu bhairavaṃ kuryāndrahabhūtaviṣāpaham
- 18
ॐ लसद्दिजिह्वाक्ष स्वाहा
क्षेत्रादौ ग्रहभूतादिविषपक्षिनिवारणम्
oṃ lasaddijihvākṣa svāhā
kṣetrādau grahabhūtādiviṣapakṣinivāraṇam
- 19
ॐ क्ष्व नमः
रक्तेन पटहे लिख्य शब्दात्त्रेसुर्ग्रहादयः
ॐ मर मर मारय मारय स्वाहा
ॐ हुं फट्स्वाहा
oṃ kṣva namaḥ
raktena paṭahe likhya śabdāttresurgrahādayaḥ
oṃ mara mara māraya māraya svāhā
oṃ huṃ phaṭsvāhā
- 20
शूलं चाष्टशतैर्मन्त्र्य भ्रामणाच्छत्रुवृन्दहृत्
ऊर्ध्वशक्तिनिपातेन अधः शक्तिं निकुञ्चयेत्
śūlaṃ cāṣṭaśatairmantrya bhrāmaṇācchatruvṛndahṛt
ūrdhvaśaktinipātena adhaḥ śaktiṃ nikuñcayet
- 21
पूरके पूरिता मन्त्राः कुम्भकेन सुमन्त्रिताः
प्रणवेनाप्यायितास्ते मनवस्तदुदीरिताः
एवमाप्यायिता मन्त्रा भृत्यवत्फलदायकाः
pūrake pūritā mantrāḥ kumbhakena sumantritāḥ
praṇavenāpyāyitāste manavastadudīritāḥ
evamāpyāyitā mantrā bhṛtyavatphaladāyakāḥ
- 22
इति श्रीगारुडे महापुराणे पूर्वखण्डे प्रथमांशाख्ये आचारकाण्डे विषादिहरमन्त्रवृन्दनिरूपणं नाम विंशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe viṣādiharamantravṛndanirūpaṇaṃ nāma viṃśo 'dhyāyaḥ

