21 shlokas
- 1
सूत उवाच
गरुडोक्तं कश्यपाय वक्ष्ये मृत्युञ्जयार्चनम्
उद्धारपूर्वकं पुण्यं सर्वदेवमयं मतम्
sūta uvāca
garuḍoktaṃ kaśyapāya vakṣye mṛtyuñjayārcanam
uddhārapūrvakaṃ puṇyaṃ sarvadevamayaṃ matam
- 2
ओङ्कारं पूर्वमुद्धृत्य जुंकारं तदनन्तरम्
सविसर्गं तृतीयं स्यान्मृत्युदारिद्र्यमर्दनम्
oṅkāraṃ pūrvamuddhṛtya juṃkāraṃ tadanantaram
savisargaṃ tṛtīyaṃ syānmṛtyudāridryamardanam
- 3
ईशविष्ण्वर्कदेव्यादिकवचं सर्वसाधकम्
अमृतेशं महामन्त्रन्त्र्यक्षरं पूजनं समम्
जपनान्मृत्युहीनाः स्युः सर्वपापविवर्जिताः
īśaviṣṇvarkadevyādikavacaṃ sarvasādhakam
amṛteśaṃ mahāmantrantryakṣaraṃ pūjanaṃ samam
japanānmṛtyuhīnāḥ syuḥ sarvapāpavivarjitāḥ
- 4
शतजप्याद्वेदफलं यज्ञतीर्थफलं लभेत्
अष्टोत्तरशताज्जाप्यात्त्रिसन्ध्यं मृत्युशत्रुजित
śatajapyādvedaphalaṃ yajñatīrthaphalaṃ labhet
aṣṭottaraśatājjāpyāttrisandhyaṃ mṛtyuśatrujita
- 5
ध्यायेच्च सितपद्मस्थं वरदं चाभयंकरे
द्वाभ्यां चामृतकुम्भं तु चिन्तयेदमृतेश्वरम्
dhyāyecca sitapadmasthaṃ varadaṃ cābhayaṃkare
dvābhyāṃ cāmṛtakumbhaṃ tu cintayedamṛteśvaram
- 6
तस्यैवाङ्गगतां देवीममृतामृतभाषिणीम्
कलशं दक्षिणे हस्ते वामहस्ते सरोरुहम्
tasyaivāṅgagatāṃ devīmamṛtāmṛtabhāṣiṇīm
kalaśaṃ dakṣiṇe haste vāmahaste saroruham
- 7
जपेदष्टसहस्रं वै त्रिसन्ध्यं मासमेकतः
japedaṣṭasahasraṃ vai trisandhyaṃ māsamekataḥ
- 8
आह्वानं स्थापनं रोधं सन्निधानं निवेशनम्
पाद्यम् आचमनं स्नानमर्घ्यं स्रगनुलेपनम्
āhvānaṃ sthāpanaṃ rodhaṃ sannidhānaṃ niveśanam
pādyam ācamanaṃ snānamarghyaṃ sraganulepanam
- 9
दीपांबरं भूषणं च नैवेद्यं पानवीजनम्
मात्रामुद्राजपध्यानं दक्षिणा चाहुतिः स्तुतिः
dīpāṃbaraṃ bhūṣaṇaṃ ca naivedyaṃ pānavījanam
mātrāmudrājapadhyānaṃ dakṣiṇā cāhutiḥ stutiḥ
- 10
वाद्यं गतिं च नृत्यं च न्यासयोगं प्रदक्षिणम्
प्रणतिर्मन्त्रशय्या च वन्दनं च विसर्जनम्
vādyaṃ gatiṃ ca nṛtyaṃ ca nyāsayogaṃ pradakṣiṇam
praṇatirmantraśayyā ca vandanaṃ ca visarjanam
- 11
षडङ्गादिप्रकारेण पूजनं तु क्रमोदितम्
परमेशमुखोदीरितं यो जानाति स पूजकः
ṣaḍaṅgādiprakāreṇa pūjanaṃ tu kramoditam
parameśamukhodīritaṃ yo jānāti sa pūjakaḥ
- 12
अर्घ्यपात्रार्चनं चादावस्त्रेणैव तु ताडनम्
शोधनं कवचेनैव अमृतीकरणं ततः
arghyapātrārcanaṃ cādāvastreṇaiva tu tāḍanam
śodhanaṃ kavacenaiva amṛtīkaraṇaṃ tataḥ
- 13
पूजा चाधारशक्त्यादेः प्राणायामं तथासने
पीठशुद्धिं ततः कुर्याच्छोषणाद्यैस्ततः स्मरेत्
pūjā cādhāraśaktyādeḥ prāṇāyāmaṃ tathāsane
pīṭhaśuddhiṃ tataḥ kuryācchoṣaṇādyaistataḥ smaret
- 14
आत्मानं देवरूपं च कराङ्गन्यासकं चरेत्
आत्मानं पूजयेत्पश्चाज्ज्योतीरूपं हृदब्जतः
ātmānaṃ devarūpaṃ ca karāṅganyāsakaṃ caret
ātmānaṃ pūjayetpaścājjyotīrūpaṃ hṛdabjataḥ
- 15
मूर्तौ वा स्थण्डिले वापि क्षिपेत्पुष्पं तु भास्वरम्
आह्वानद्वारपूजार्थं पूजा चाधारशक्तितः
mūrtau vā sthaṇḍile vāpi kṣipetpuṣpaṃ tu bhāsvaram
āhvānadvārapūjārthaṃ pūjā cādhāraśaktitaḥ
- 16
सान्निध्यकरणं देवे परिवारस्य पूजनम्
अङ्गषट्कस्य पूजा वै कर्तव्या च विपश्चितैः
sānnidhyakaraṇaṃ deve parivārasya pūjanam
aṅgaṣaṭkasya pūjā vai kartavyā ca vipaścitaiḥ
- 17
धर्मादयश्च शक्राद्याः सायुधाः परिवारकाः
युगवेदमुहूर्ताश्च पूजेयं भुक्तिमुक्तिकृत्
dharmādayaśca śakrādyāḥ sāyudhāḥ parivārakāḥ
yugavedamuhūrtāśca pūjeyaṃ bhuktimuktikṛt
- 18
मातृकाश्च गणांश्चादौ नन्दिगङ्गे च पूजयेत्
महाकालं च यमनां देहल्यां पूजयेत्पुरा
mātṛkāśca gaṇāṃścādau nandigaṅge ca pūjayet
mahākālaṃ ca yamanāṃ dehalyāṃ pūjayetpurā
- 19
ॐ अमृतेश्वर ॐ भैरवाय नमः
एवं ॐ जुं हंसः सूर्याय नमः
oṃ amṛteśvara oṃ bhairavāya namaḥ
evaṃ oṃ juṃ haṃsaḥ sūryāya namaḥ
- 20
एवं शिवाय कृष्णाय ब्रह्मणे च गणाय च
चण्डिकायै सरस्वत्यै महालक्ष्मादि पूजयेत्
evaṃ śivāya kṛṣṇāya brahmaṇe ca gaṇāya ca
caṇḍikāyai sarasvatyai mahālakṣmādi pūjayet
- 21
इति श्रीगारुडे महापुराणे पूर्वखण्डे प्रथमांशाख्ये आचारकाण्डे ऽमृतेशमृत्युञ्जयपूजनं नामाष्टादशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe 'mṛteśamṛtyuñjayapūjanaṃ nāmāṣṭādaśo 'dhyāyaḥ

