8 shlokas
- 1
याज्ञवल्क्य उवाच
वानप्रस्थाश्रमं वक्ष्ये तच्छृण्वन्तु महर्षयः
पुत्रेषु भार्यां निःक्षिप्य वनं गच्छेत्सहैव वा
yājñavalkya uvāca
vānaprasthāśramaṃ vakṣye tacchṛṇvantu maharṣayaḥ
putreṣu bhāryāṃ niḥkṣipya vanaṃ gacchetsahaiva vā
- 2
वानप्रस्थो ब्रह्मचारी साग्निः सोपासनः क्षमी
अफालकृष्टेनाग्नींश्च पितृदेवातिथींस्तथा
vānaprastho brahmacārī sāgniḥ sopāsanaḥ kṣamī
aphālakṛṣṭenāgnīṃśca pitṛdevātithīṃstathā
- 3
भृत्यांस्तु तर्पयेच्छ्मश्रुजटालोमभृदात्मवान्
दान्तस्त्रिषवणस्नायी निवृत्तश्च प्रतिग्रहात्
bhṛtyāṃstu tarpayecchmaśrujaṭālomabhṛdātmavān
dāntastriṣavaṇasnāyī nivṛttaśca pratigrahāt
- 4
स्वाध्यायवान्ध्यानशीलः सर्वभूतहितरतः
अह्नो मासस्य मध्ये वा कुर्याद्वार्थपरिग्रहम्
svādhyāyavāndhyānaśīlaḥ sarvabhūtahitarataḥ
ahno māsasya madhye vā kuryādvārthaparigraham
- 5
कृतं त्यजेदाश्वयुजे युञ्जेत्कालं व्रतादिना
पक्षे मासे ऽथवाश्नीयाद्दन्तोलूखलिको भवेत्
kṛtaṃ tyajedāśvayuje yuñjetkālaṃ vratādinā
pakṣe māse 'thavāśnīyāddantolūkhaliko bhavet
- 6
चान्द्रायणी स्वपेद्भूमौ कर्म कुर्यात्फलादिना
ग्रीष्मे पञ्चाग्निमध्यस्थो वर्षासु स्थण्डिलेशयः
cāndrāyaṇī svapedbhūmau karma kuryātphalādinā
grīṣme pañcāgnimadhyastho varṣāsu sthaṇḍileśayaḥ
- 7
आर्द्रवासास्तु हेमन्ते योगाभ्यासाद्दिनं नयेत्
यः कण्टकैर्वितुदति चन्दनैर्यश्च लिम्पति
अक्रुद्धः परितुष्टश्च समस्तस्य च तस्य च
ārdravāsāstu hemante yogābhyāsāddinaṃ nayet
yaḥ kaṇṭakairvitudati candanairyaśca limpati
akruddhaḥ parituṣṭaśca samastasya ca tasya ca
- 8
इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तवानप्रस्थधर्मनिरूपणं नाम द्व्युत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yājñavalkyoktavānaprasthadharmanirūpaṇaṃ nāma dvyuttaraśatatamo 'dhyāyaḥ

