16 shlokas
- 1
ब्रह्मोवाच
मार्गशीर्षे सिते पक्षे व्यासानङ्गत्रयोदशी
मल्लिकाजं दन्तकाष्ठं धुत्तूरैः पूजयेच्छिवम्
brahmovāca
mārgaśīrṣe site pakṣe vyāsānaṅgatrayodaśī
mallikājaṃ dantakāṣṭhaṃ dhuttūraiḥ pūjayecchivam
- 2
अनङ्गायेति नैवेद्यं मधप्राश्याथ पौषके
योगेश्वरं पूजयेच्च बिल्वपत्रैः कदम्बजम्
दन्तकाष्ठं चन्दनादि नैवेद्यं कृसरादिकम्
anaṅgāyeti naivedyaṃ madhaprāśyātha pauṣake
yogeśvaraṃ pūjayecca bilvapatraiḥ kadambajam
dantakāṣṭhaṃ candanādi naivedyaṃ kṛsarādikam
- 3
माघे नटेश्वरायार्च्य कुन्दैर्मौक्तिकमालया
प्लक्षेण दन्तकाष्ठं च नैवेद्यं पूरिका मुने
māghe naṭeśvarāyārcya kundairmauktikamālayā
plakṣeṇa dantakāṣṭhaṃ ca naivedyaṃ pūrikā mune
- 4
वीरेश्वरं फाल्गुने तु पूजयेत्तु मरूबकैः
शर्कराशाकमण्डाश्च चूतजं दन्तधावनम्
vīreśvaraṃ phālgune tu pūjayettu marūbakaiḥ
śarkarāśākamaṇḍāśca cūtajaṃ dantadhāvanam
- 5
चैत्रे यजेत्सुरूपाय कर्पूरं प्राशयेन्निशि
दन्तधावनाटजं नैवेद्यं शष्कुलीं ददेत्
caitre yajetsurūpāya karpūraṃ prāśayenniśi
dantadhāvanāṭajaṃ naivedyaṃ śaṣkulīṃ dadet
- 6
पूजा दमनकः शम्भोर्वैशाखे ऽशोकपुष्पकैः
महारूपाय नैवेद्यं गुडभक्तं पुट्टबरम्
pūjā damanakaḥ śambhorvaiśākhe 'śokapuṣpakaiḥ
mahārūpāya naivedyaṃ guḍabhaktaṃ puṭṭabaram
- 7
दन्तकाष्ठं प्राशयेच्च ददेज्जातीफलं तथा
प्रद्युम्नं पूजयेज्ज्येष्ठे चम्पकैर्बिल्वजं दशेत्
dantakāṣṭhaṃ prāśayecca dadejjātīphalaṃ tathā
pradyumnaṃ pūjayejjyeṣṭhe campakairbilvajaṃ daśet
- 8
लवगारा तथाषढि उमामदति शासनः
अगुरुं दन्तकाष्ठं च तमपामार्गकैर्यजेत्
lavagārā tathāṣaḍhi umāmadati śāsanaḥ
aguruṃ dantakāṣṭhaṃ ca tamapāmārgakairyajet
- 9
श्रावणे करवीरं च शम्भवे शूलपाणये
गन्धाशनो घृताद्यैश्च करवीरजशोधनम्
śrāvaṇe karavīraṃ ca śambhave śūlapāṇaye
gandhāśano ghṛtādyaiśca karavīrajaśodhanam
- 10
सद्योजातं भाद्रपदे बकुलैः पूपकैर्यजेत्
गन्धर्वाशो मदनकमाश्विने च सुराधिपम्
sadyojātaṃ bhādrapade bakulaiḥ pūpakairyajet
gandharvāśo madanakamāśvine ca surādhipam
- 11
चम्पकैः स्वर्णवायादोजिन्मोदकसंप्रदः
खादिरं दन्तकाष्ठं च कार्तिके रुद्रमर्चयेत्
campakaiḥ svarṇavāyādojinmodakasaṃpradaḥ
khādiraṃ dantakāṣṭhaṃ ca kārtike rudramarcayet
- 12
बदर्या दन्तकाष्ठं च मदनो दशमाशनः
क्षीरशाकप्रदः पद्मैर् अब्दन्ते शिवमर्चयेत्
badaryā dantakāṣṭhaṃ ca madano daśamāśanaḥ
kṣīraśākapradaḥ padmair abdante śivamarcayet
- 13
रतिमुक्तमनङ्गं च स्वर्णमण्डलसंस्थितम्
गन्धाद्यैर्दशसाहस्रं तिलव्रीह्यादि होमयेत्
ratimuktamanaṅgaṃ ca svarṇamaṇḍalasaṃsthitam
gandhādyairdaśasāhasraṃ tilavrīhyādi homayet
- 14
जागरं गीतवदित्रं प्रभित ऽभ्यर्च्य वेदयेत्
द्विजाय शय्यां पात्रं च छत्रं वस्त्रमुपानहौ
jāgaraṃ gītavaditraṃ prabhita 'bhyarcya vedayet
dvijāya śayyāṃ pātraṃ ca chatraṃ vastramupānahau
- 15
गां द्विजं भोजयेद्भक्त्या कृतकृत्यो भवेन्नरः
एतदुद्यापनं सर्वं व्रतेषु ध्येयम् ईदृशम्
फलं च श्रीसुतारोग्यसौभाग्यस्वर्गतं भवेत्
gāṃ dvijaṃ bhojayedbhaktyā kṛtakṛtyo bhavennaraḥ
etadudyāpanaṃ sarvaṃ vrateṣu dhyeyam īdṛśam
phalaṃ ca śrīsutārogyasaubhāgyasvargataṃ bhavet
- 16
इति श्रीगारुडे महापुराणे पूर्वखण्डे प्रथमांशाख्ये आचारकाण्डे ऽनङ्गत्रयोदशीव्रतं नाम सप्तदशोत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe 'naṅgatrayodaśīvrataṃ nāma saptadaśottaraśatatamo 'dhyāyaḥ

