20 shlokas
- 1
ब्रह्मोवाच
कामदेवत्रयोदश्यां पूज्यो दमनकादिभिः
रतिप्रीतिसमायुक्तो ह्यशोको मणिभूषितः
brahmovāca
kāmadevatrayodaśyāṃ pūjyo damanakādibhiḥ
ratiprītisamāyukto hyaśoko maṇibhūṣitaḥ
- 2
चतुर्दश्यां तथाष्टम्यां पक्षयोः शुक्लकृष्णयोः
यो ऽब्दमेकं न भुञ्जीत मुक्तिभाक्शिवपूजनात्
caturdaśyāṃ tathāṣṭamyāṃ pakṣayoḥ śuklakṛṣṇayoḥ
yo 'bdamekaṃ na bhuñjīta muktibhākśivapūjanāt
- 3
त्रिरात्रोपोषितो दद्यात्कार्तिक्यां भवनं शुभम्
सूर्यलोकमवाप्नोति धामव्रतमिदं शुभम्
trirātropoṣito dadyātkārtikyāṃ bhavanaṃ śubham
sūryalokamavāpnoti dhāmavratamidaṃ śubham
- 4
अमावस्यां पितॄणां च दत्तं जलादि तद् अक्षयम्
नक्ताभ्याशी वारनाम्ना यजन्वाराणि सर्वभाक्
amāvasyāṃ pitṝṇāṃ ca dattaṃ jalādi tad akṣayam
naktābhyāśī vāranāmnā yajanvārāṇi sarvabhāk
- 5
द्वादशर्क्षाणि विप्रर्षे प्रतिमासं तु यानि वै
तन्नाम्नान्ते ऽतच्युतं तेषु सम्यक्सम्पूजयेन्नरः
dvādaśarkṣāṇi viprarṣe pratimāsaṃ tu yāni vai
tannāmnānte 'tacyutaṃ teṣu samyaksampūjayennaraḥ
- 6
केशवं मार्गशीर्षे तु इत्यादौ कृत्तिकादिके
घृतहोमश्चतुर्मासं कृसरं च निवेदयेत्
keśavaṃ mārgaśīrṣe tu ityādau kṛttikādike
ghṛtahomaścaturmāsaṃ kṛsaraṃ ca nivedayet
- 7
आषाढादौ पायसं तु विप्रांस्तेनैव भोजयेत्
पञ्चाव्यजलस्नाननैवेद्यैर्नक्तमाचरेत्
āṣāḍhādau pāyasaṃ tu viprāṃstenaiva bhojayet
pañcāvyajalasnānanaivedyairnaktamācaret
- 8
अर्वाग्विसर्जनाद्द्रव्यं नैवेद्यं सर्वमुच्यते
विसर्जिते जगन्नाथे निर्माल्यं भवति क्षणात्
arvāgvisarjanāddravyaṃ naivedyaṃ sarvamucyate
visarjite jagannāthe nirmālyaṃ bhavati kṣaṇāt
- 9
पाञ्चरात्रविदो मुख्या नैवेद्यं भुञ्जते स्वयम्
एवं संवत्सरस्यान्ते विशेषेण प्रपूजयेत्
pāñcarātravido mukhyā naivedyaṃ bhuñjate svayam
evaṃ saṃvatsarasyānte viśeṣeṇa prapūjayet
- 10
नमोनमस्ते ऽच्युत संक्षयो ऽस्तु पापस्य वृद्धिं समुपैतु पुण्यम्
ऐश्वर्यवित्तादि सदाक्षयं मे तथास्तु मे सन्ततिरक्षयैव
namonamaste 'cyuta saṃkṣayo 'stu pāpasya vṛddhiṃ samupaitu puṇyam
aiśvaryavittādi sadākṣayaṃ me tathāstu me santatirakṣayaiva
- 11
यथाच्युत त्वं परतः परस्मात्स ब्रह्मभूतः परतः परस्मात्
तथाच्युतं मे कुरु वाञ्छितं सदा मया कृतं पापहराप्रमेय
yathācyuta tvaṃ parataḥ parasmātsa brahmabhūtaḥ parataḥ parasmāt
tathācyutaṃ me kuru vāñchitaṃ sadā mayā kṛtaṃ pāpaharāprameya
- 12
अच्युतानन्त गोविन्द प्रसीद यदभीप्सितम्
तदक्षयममेयात्मन्कुरुष्व पुरुषोत्तम
acyutānanta govinda prasīda yadabhīpsitam
tadakṣayamameyātmankuruṣva puruṣottama
- 13
कुर्याद्वै सप्त वर्षाणि आयुः श्रीसद्गतीर्नरः
उपोष्यैकादशीब्दम् अष्टमीं च चतुर्दशीम्
kuryādvai sapta varṣāṇi āyuḥ śrīsadgatīrnaraḥ
upoṣyaikādaśībdam aṣṭamīṃ ca caturdaśīm
- 14
सप्तमीं पूजयेद्विष्णुं दुर्गां शम्भुं रविं क्रमात्
तेषां लोकं समाप्नोति सर्वकामांश्च निर्मलः
saptamīṃ pūjayedviṣṇuṃ durgāṃ śambhuṃ raviṃ kramāt
teṣāṃ lokaṃ samāpnoti sarvakāmāṃśca nirmalaḥ
- 15
एकभक्तेन नक्तेन तथैवायाचितेन च
उपवासेन शाकाद्यैः पूजयन्त सर्वदेवताः
ekabhaktena naktena tathaivāyācitena ca
upavāsena śākādyaiḥ pūjayanta sarvadevatāḥ
- 16
सर्वः सर्वासु तिथिषु भुक्तिं मुक्तिमवाप्नुयात्
धनदो ऽग्निः प्रतिपदि नासत्यो दस्त्र अर्चितः
sarvaḥ sarvāsu tithiṣu bhuktiṃ muktimavāpnuyāt
dhanado 'gniḥ pratipadi nāsatyo dastra arcitaḥ
- 17
श्रीर्यमश्च द्वितीयायां पञ्चम्या पार्वती श्रिया
नागाः षष्ठ्यां कार्तिकेयः सप्तम्यां भास्करो ऽर्थदः
śrīryamaśca dvitīyāyāṃ pañcamyā pārvatī śriyā
nāgāḥ ṣaṣṭhyāṃ kārtikeyaḥ saptamyāṃ bhāskaro 'rthadaḥ
- 18
दुर्गाष्टम्यां मातरश्च नवम्यामथ तक्षकः
इन्द्रो दशम्यां धनद एकादश्यां मुनीश्वराः
durgāṣṭamyāṃ mātaraśca navamyāmatha takṣakaḥ
indro daśamyāṃ dhanada ekādaśyāṃ munīśvarāḥ
- 19
द्वादश्यां च हरिः कामस्त्रयोदश्यां महेश्वरः
चतुर्दश्यां पञ्चदश्यां ब्रह्मा च पितरो ऽपरे
dvādaśyāṃ ca hariḥ kāmastrayodaśyāṃ maheśvaraḥ
caturdaśyāṃ pañcadaśyāṃ brahmā ca pitaro 'pare
- 20
इति श्रीगारुडे महापुराणे पूर्वखण्डे प्रथमांशाख्ये आचारकाण्डे तिथिवारनक्षत्रादिव्रतनिरूपणं नाम सप्तत्रिंशदुत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe tithivāranakṣatrādivratanirūpaṇaṃ nāma saptatriṃśaduttaraśatatamo 'dhyāyaḥ

