10 shlokas
- 1
हरिरुवाच
गायत्त्री परमा देवी भुक्तिमुक्तिप्रदा च ताम्
यो जपेत्तस्य पापानि विनश्यन्ति महान्त्यपि
hariruvāca
gāyattrī paramā devī bhuktimuktipradā ca tām
yo japettasya pāpāni vinaśyanti mahāntyapi
- 2
गायत्त्रीकल्पमाख्यास्ये भुक्तिमुक्तिप्रदं च तत्
अष्टोत्तरं सहस्रं वा अथवाष्टशतं जपेत्
gāyattrīkalpamākhyāsye bhuktimuktipradaṃ ca tat
aṣṭottaraṃ sahasraṃ vā athavāṣṭaśataṃ japet
- 3
त्रिसन्ध्यं ब्रह्मलोकी स्याच्छतं जप्त्वा जलं पिबेत्
संध्यायां सर्वपापघ्नीं देवीमावाह्य पूजयेत्
trisandhyaṃ brahmalokī syācchataṃ japtvā jalaṃ pibet
saṃdhyāyāṃ sarvapāpaghnīṃ devīmāvāhya pūjayet
- 4
भूर्भुवः स्वः स्वमन्त्रेण युतां द्वादशनामभिः
गायत्र्यै नमः
सावित्र्यै सरस्वत्यै नमोनमः
bhūrbhuvaḥ svaḥ svamantreṇa yutāṃ dvādaśanāmabhiḥ
gāyatryai namaḥ
sāvitryai sarasvatyai namonamaḥ
- 5
वेदमात्रे च सांकृत्यै ब्रह्माणी कौशिकी क्रमात्
साध्व्यै सर्वार्थसाधिन्यै सहस्राक्ष्यै च भूर्भुवः
vedamātre ca sāṃkṛtyai brahmāṇī kauśikī kramāt
sādhvyai sarvārthasādhinyai sahasrākṣyai ca bhūrbhuvaḥ
- 6
स्वरेवं जुहुयाद् अग्नौ समिदाज्यं हविष्यकम्
अष्टोत्तरसहस्रं वाप्यथवाष्टशतं घृतम्
svarevaṃ juhuyād agnau samidājyaṃ haviṣyakam
aṣṭottarasahasraṃ vāpyathavāṣṭaśataṃ ghṛtam
- 7
धर्मकामादिसिद्ध्यर्थं जुहुयात्सर्वकर्मसु
प्रतिमां चन्दनस्वर्णनिर्मितां प्रतिपूज्य च
dharmakāmādisiddhyarthaṃ juhuyātsarvakarmasu
pratimāṃ candanasvarṇanirmitāṃ pratipūjya ca
- 8
यथा लक्षं तु जप्तव्यं पयोमूलफलार्शनैः
अयुतद्वयहोमेन सर्वकामानवाप्नुयात्
yathā lakṣaṃ tu japtavyaṃ payomūlaphalārśanaiḥ
ayutadvayahomena sarvakāmānavāpnuyāt
- 9
उत्तरे शिखरे जाता भूम्यां पर्वतवासिनी
ब्रह्मणा समनुज्ञाता गच्छ देवि यथासुखम्
uttare śikhare jātā bhūmyāṃ parvatavāsinī
brahmaṇā samanujñātā gaccha devi yathāsukham
- 10
इति श्रीगारुडे महापुराणे पूर्वखण्डे प्रथमांशाख्ये आचारकाण्डे गायत्रीकल्पनिरूपणं नाम सप्तत्रिंशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe gāyatrīkalpanirūpaṇaṃ nāma saptatriṃśo 'dhyāyaḥ

