26 shlokas
- 1
हरिरुवाच
पवित्रारोपणं वक्ष्ये शिवस्याशिवनाशनम्
आचार्यः साधकः कुर्यात्पुत्रकः समयी हर
hariruvāca
pavitrāropaṇaṃ vakṣye śivasyāśivanāśanam
ācāryaḥ sādhakaḥ kuryātputrakaḥ samayī hara
- 2
संवत्सरकृतां पूजां विघ्नेशो हरते ऽन्यथा
आषाढे श्रावणे माघे कुर्याद्भाद्रपदे ऽपि वा
saṃvatsarakṛtāṃ pūjāṃ vighneśo harate 'nyathā
āṣāḍhe śrāvaṇe māghe kuryādbhādrapade 'pi vā
- 3
सौवर्णरौप्यताम्रं च सूत्रं कार्पासिकं क्रमात्
ज्ञेयं कुजादौ संग्राह्यं कन्यया कर्तितं च यत्
sauvarṇaraupyatāmraṃ ca sūtraṃ kārpāsikaṃ kramāt
jñeyaṃ kujādau saṃgrāhyaṃ kanyayā kartitaṃ ca yat
- 4
त्रिगुणं त्रिगुणीकृत्य ततः कुर्यात्पवित्रकम्
ग्रन्थयो वामदेवेन सत्येन क्षालयेच्छिव
triguṇaṃ triguṇīkṛtya tataḥ kuryātpavitrakam
granthayo vāmadevena satyena kṣālayecchiva
- 5
अघोरेण तु संशोध्य बद्धस्तत्पुरुषाद्भवेत्
धूपयेदीशमन्त्रेण तन्तुदेवा इति स्मृताः
aghoreṇa tu saṃśodhya baddhastatpuruṣādbhavet
dhūpayedīśamantreṇa tantudevā iti smṛtāḥ
- 6
ॐकारश्चन्द्रमा वह्निर्ब्रह्मा नागः शिखिध्वजः
रविर्विष्णुः शिवः प्रोक्तः क्रमात्तन्तुषु देवताः
oṃkāraścandramā vahnirbrahmā nāgaḥ śikhidhvajaḥ
ravirviṣṇuḥ śivaḥ proktaḥ kramāttantuṣu devatāḥ
- 7
अष्टोत्तरशतं कुर्यात्पञ्चाशत्पञ्चविंशतिम्
रुद्रो ऽत्तमादि विज्ञेयं मानं च ग्रन्थयो दश
aṣṭottaraśataṃ kuryātpañcāśatpañcaviṃśatim
rudro 'ttamādi vijñeyaṃ mānaṃ ca granthayo daśa
- 8
चतुरङ्गुलान्तराः स्युर्ग्रन्थिनामानि च क्रमात्
प्रकृतिः पौरुषी वीरा चतुर्थी चापराजिता
caturaṅgulāntarāḥ syurgranthināmāni ca kramāt
prakṛtiḥ pauruṣī vīrā caturthī cāparājitā
- 9
जया च विजया रुद्रा अजिता च सदाशिवा
मनोन्मनी सर्वमुखी द्व्यङ्गुलाङ्गुलतो ऽथवा
jayā ca vijayā rudrā ajitā ca sadāśivā
manonmanī sarvamukhī dvyaṅgulāṅgulato 'thavā
- 10
रञ्जयेत्कुङ्कुमाद्यैस्तु कुर्याद्रन्धैः पवित्रकम्
सप्तम्यां वा त्रयोदश्यां शुक्लपक्षे तथेतरे
rañjayetkuṅkumādyaistu kuryādrandhaiḥ pavitrakam
saptamyāṃ vā trayodaśyāṃ śuklapakṣe tathetare
- 11
क्षीरादिभिश्च संस्नाप्य लिङ्गं गन्धादिभिर्यजेत्
दद्याद्रन्धपवित्रं तु आत्मने ब्रह्मणे हर
kṣīrādibhiśca saṃsnāpya liṅgaṃ gandhādibhiryajet
dadyādrandhapavitraṃ tu ātmane brahmaṇe hara
- 12
पुष्पं गन्धयुतं दद्यान्मूलेनेशानगोचरे
पूर्वे च दण्डकाष्ठं तु उत्तरे चामलकीफलम्
puṣpaṃ gandhayutaṃ dadyānmūleneśānagocare
pūrve ca daṇḍakāṣṭhaṃ tu uttare cāmalakīphalam
- 13
मृत्तिकां पश्चिमे दद्याद्दक्षिणे भस्मभूतयः
नैरृते ह्यगुरुं दद्याच्छिखामन्त्रेण मन्त्रवित्
mṛttikāṃ paścime dadyāddakṣiṇe bhasmabhūtayaḥ
nairṛte hyaguruṃ dadyācchikhāmantreṇa mantravit
- 14
वायव्यां सर्षपं दद्यात्कवचेन वृषध्वज
गृहं संवेष्ट्य सूत्रेण दद्याद्रन्धपवित्रकम्
vāyavyāṃ sarṣapaṃ dadyātkavacena vṛṣadhvaja
gṛhaṃ saṃveṣṭya sūtreṇa dadyādrandhapavitrakam
- 15
होमं कृत्वा ग्नेय दत्त्वा दद्याद्भूतबलिं तथा
आमन्त्रितो ऽसि देवेश गणैः सार्धं महेश्वर
homaṃ kṛtvā gneya dattvā dadyādbhūtabaliṃ tathā
āmantrito 'si deveśa gaṇaiḥ sārdhaṃ maheśvara
- 16
प्रातस्त्वां पूजयिष्यामि अत्र संनिहितो भव
निमन्त्र्यानेन तिष्ठेत्तु कुर्वन्गीतादिकं निशि
prātastvāṃ pūjayiṣyāmi atra saṃnihito bhava
nimantryānena tiṣṭhettu kurvangītādikaṃ niśi
- 17
मन्त्रितानि पवित्राणि स्थापयेद्देवपार्श्वतः
स्नात्वादित्यं चतुर्दश्यां प्राग्रुद्रं च प्रपूजयेत्
mantritāni pavitrāṇi sthāpayeddevapārśvataḥ
snātvādityaṃ caturdaśyāṃ prāgrudraṃ ca prapūjayet
- 18
ललाटस्थं विश्वरूपं ध्यात्वात्मानं प्रपूजयेत्
अस्त्रेण प्रोक्षितान्येवं हृदयेनार्चितान्यथ
lalāṭasthaṃ viśvarūpaṃ dhyātvātmānaṃ prapūjayet
astreṇa prokṣitānyevaṃ hṛdayenārcitānyatha
- 19
संहितामन्त्रितान्येव धूपितानि समर्पयेत्
शिवतत्त्वात्मकं चादौ विद्यातत्त्वात्मकं ततः
saṃhitāmantritānyeva dhūpitāni samarpayet
śivatattvātmakaṃ cādau vidyātattvātmakaṃ tataḥ
- 20
आत्मतत्त्वात्मकं पश्चाद्देवकाख्यं ततो ऽर्चयेत्
ॐ हौं हौं शिवतत्त्वाय नमः
ॐ हीं विद्यातत्त्वाय नमः
ātmatattvātmakaṃ paścāddevakākhyaṃ tato 'rcayet
oṃ hauṃ hauṃ śivatattvāya namaḥ
oṃ hīṃ vidyātattvāya namaḥ
- 21
ॐ हां आत्मतत्त्वाय नमः
ॐ हां हीं हूं क्षैं सर्वतत्त्वाय नमः
कालात्मना त्वया देव यद्दृष्टं मामके विधौ
oṃ hāṃ ātmatattvāya namaḥ
oṃ hāṃ hīṃ hūṃ kṣaiṃ sarvatattvāya namaḥ
kālātmanā tvayā deva yaddṛṣṭaṃ māmake vidhau
- 22
कृतं क्लिष्टं समुत्सृष्टं हुतं गुप्तं च यत्कृतम्
सर्वात्मनात्मना शम्भो पवित्रेण त्वदिच्छया
kṛtaṃ kliṣṭaṃ samutsṛṣṭaṃ hutaṃ guptaṃ ca yatkṛtam
sarvātmanātmanā śambho pavitreṇa tvadicchayā
- 23
पूरय पूरय मखव्रतं तन्नियमेश्वराय सर्वतत्त्वात्मकाय सर्वकारणपालिताय ॐ हां हीं हूं हैं हौं शिवाय नमः
pūraya pūraya makhavrataṃ tanniyameśvarāya sarvatattvātmakāya sarvakāraṇapālitāya oṃ hāṃ hīṃ hūṃ haiṃ hauṃ śivāya namaḥ
- 24
पूर्वैरनेन यो दद्यात्पवित्राणां चतुष्टयम्
दत्त्वा वह्नेः पवित्रं च गुरवे दक्षिणां दिशेत्
pūrvairanena yo dadyātpavitrāṇāṃ catuṣṭayam
dattvā vahneḥ pavitraṃ ca gurave dakṣiṇāṃ diśet
- 25
बलिं दत्त्वा द्विजान्भोज्य चण्डं प्राच्यै विसर्जयेत्
baliṃ dattvā dvijānbhojya caṇḍaṃ prācyai visarjayet
- 26
इति श्रीगारुडे महापुराणे पूर्वखण्डे प्रथमांशाख्ये आचारकाण्डे शिवपवित्रारोपणं नाम द्विचत्वारिंशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe śivapavitrāropaṇaṃ nāma dvicatvāriṃśo 'dhyāyaḥ

