13 shlokas
- 1
याज्ञवल्क्य उवाच
श्रीकामः शान्तिकामो वा ग्रहदृष्ट्यभिचारवान्
ग्रहयज्ञं समं कुर्याद्ग्रहाश्चैते बुधैः स्मृताः
yājñavalkya uvāca
śrīkāmaḥ śāntikāmo vā grahadṛṣṭyabhicāravān
grahayajñaṃ samaṃ kuryādgrahāścaite budhaiḥ smṛtāḥ
- 2
सूर्यः सोमो मङ्गलश्च बुधश्चैव बृहस्पतिः
शुक्रः शनैश्चरो राहुः केतुर्ग्रहगणाः स्मृताः
sūryaḥ somo maṅgalaśca budhaścaiva bṛhaspatiḥ
śukraḥ śanaiścaro rāhuḥ keturgrahagaṇāḥ smṛtāḥ
- 3
ताम्रकात्स्फाटिकाद्रक्तचन्दनात्स्वर्णकादुभौ
रजतादयसः सीसात्कांस्याद्वर्णान्निबोधत
tāmrakātsphāṭikādraktacandanātsvarṇakādubhau
rajatādayasaḥ sīsātkāṃsyādvarṇānnibodhata
- 4
रक्तः शुक्लस्तथा रक्तः पीतः पीतः सितोऽसितः
कृष्णः कृष्णः क्रमाद्वर्णा द्रव्याणि मुनयस्ततः
raktaḥ śuklastathā raktaḥ pītaḥ pītaḥ sito'sitaḥ
kṛṣṇaḥ kṛṣṇaḥ kramādvarṇā dravyāṇi munayastataḥ
- 5
स्थापयेद्ग्रहवर्णानि होमार्थं प्रलिखेत्पटे
स्नापयेद्धोमयेच्चैव ग्रहद्रव्यैर्विधानतः
सुवर्णानि प्रदेयानि वासांसि सुसुमानि च
sthāpayedgrahavarṇāni homārthaṃ pralikhetpaṭe
snāpayeddhomayeccaiva grahadravyairvidhānataḥ
suvarṇāni pradeyāni vāsāṃsi susumāni ca
- 6
गन्धाश्च बलयश्चैव धूपो देयश्चगुग्गुलुः
कर्तव्यास्तत्र मन्त्रैश्च चरवः प्रतिदैवतम्
gandhāśca balayaścaiva dhūpo deyaścagugguluḥ
kartavyāstatra mantraiśca caravaḥ pratidaivatam
- 7
आकृष्णेन इमन्देवा अग्निर्मूर्धा दिवः ककुत्
उद्बुध्यस्वेति जुहुयादेभिरेव यथाक्रमम्
ākṛṣṇena imandevā agnirmūrdhā divaḥ kakut
udbudhyasveti juhuyādebhireva yathākramam
- 8
बृहस्पतेर्परिदीयेति सर्वे अन्नात्परिसुतम्
शं नो देवी कयानश्च केतुं क्रण्वन्निति क्रमात्
bṛhaspaterparidīyeti sarve annātparisutam
śaṃ no devī kayānaśca ketuṃ kraṇvanniti kramāt
- 9
अर्कः पलाशः खदिरस्त्वपामार्गो ऽथ पिप्पलः
औदुम्बरः शमी दूर्वा कुशाश्च समिधः क्रमात्
arkaḥ palāśaḥ khadirastvapāmārgo 'tha pippalaḥ
audumbaraḥ śamī dūrvā kuśāśca samidhaḥ kramāt
- 10
होतव्या मधुसर्पिर्भ्यां दध्ना चैव समन्वितः
गुडौदनं पायसं च हविष्यं क्षीरषाष्टिकम्
hotavyā madhusarpirbhyāṃ dadhnā caiva samanvitaḥ
guḍaudanaṃ pāyasaṃ ca haviṣyaṃ kṣīraṣāṣṭikam
- 11
दध्योदनं हविः पूपान्मांसं चित्रान्नमेव च
दद्याद्ग्रहक्रमाद् एतान्ग्रहेभ्यो भाजनं ततः
dadhyodanaṃ haviḥ pūpānmāṃsaṃ citrānnameva ca
dadyādgrahakramād etāngrahebhyo bhājanaṃ tataḥ
- 12
धेनुः शङ्खस्तथानड्वान्हेमवासो हयस्तथा
कृष्णा गौरायसं छाग एता वै दक्षिणाः क्रमात्
ग्रहाः पूज्याः सदा यस्माद्राज्यादि प्राप्यते फलम्
dhenuḥ śaṅkhastathānaḍvānhemavāso hayastathā
kṛṣṇā gaurāyasaṃ chāga etā vai dakṣiṇāḥ kramāt
grahāḥ pūjyāḥ sadā yasmādrājyādi prāpyate phalam
- 13
इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तग्रहशान्तिनिरूपणं नामैकोत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yājñavalkyoktagrahaśāntinirūpaṇaṃ nāmaikottaraśatatamo 'dhyāyaḥ

