16 shlokas
- 1
ब्रह्मोवाच
व्रतानि कार्तिके वक्ष्ये स्नात्वा विष्णुं प्रपूजयेत्
एकभक्तेन नक्तेन मासं वायाचितेन वा
brahmovāca
vratāni kārtike vakṣye snātvā viṣṇuṃ prapūjayet
ekabhaktena naktena māsaṃ vāyācitena vā
- 2
दुग्धशाकफलाद्यैर्वा उपवासेन वा पुनः
सर्वपापविनिर्मुक्तः प्राप्तकामो हरिं व्रजेत्
dugdhaśākaphalādyairvā upavāsena vā punaḥ
sarvapāpavinirmuktaḥ prāptakāmo hariṃ vrajet
- 3
सदा हरेर्व्रतं श्रेष्ठं ततः स्याद्दक्षिणायने
चातुर्मास्ये ततस्तस्मात्कार्तिके भीष्मपञ्चकम्
sadā harervrataṃ śreṣṭhaṃ tataḥ syāddakṣiṇāyane
cāturmāsye tatastasmātkārtike bhīṣmapañcakam
- 4
ततः श्रेष्ठव्रतं शुक्लस्यैकादश्यां समाचरेत्
स्नात्वा त्रिकालं पित्रादीन्यवाद्यैरर्चयेद्धरिम्
tataḥ śreṣṭhavrataṃ śuklasyaikādaśyāṃ samācaret
snātvā trikālaṃ pitrādīnyavādyairarcayeddharim
- 5
यजेन्मौनी घृताद्यैश्च पञ्चगव्येन वारिभिः
स्नापयित्वाथ कर्पूरमुखैश्चैवानुलेपयेत्
yajenmaunī ghṛtādyaiśca pañcagavyena vāribhiḥ
snāpayitvātha karpūramukhaiścaivānulepayet
- 6
घृताक्तगुग्गुलैर्धूपं द्विजः पञ्चदिनं दहेत्
नैवेद्यं परमान्नं तु जपेदष्टोत्तरं शतम्
ghṛtāktaguggulairdhūpaṃ dvijaḥ pañcadinaṃ dahet
naivedyaṃ paramānnaṃ tu japedaṣṭottaraṃ śatam
- 7
ॐ नमो वासुदेवाय घृतव्रीहितिलादिकम्
अष्टाक्षरेण मन्त्रेण स्वाहान्तेन तु होमयेत्
oṃ namo vāsudevāya ghṛtavrīhitilādikam
aṣṭākṣareṇa mantreṇa svāhāntena tu homayet
- 8
प्रथमे ऽह्नि हरेः पादौ यजेत्पद्मैर्द्वितयिक
बिल्वपत्रैर्जानुदेशं नाभिं गन्धेन चापरे
prathame 'hni hareḥ pādau yajetpadmairdvitayika
bilvapatrairjānudeśaṃ nābhiṃ gandhena cāpare
- 9
स्कन्धा बिल्वजवाभिश्च पञ्चमे ऽह्नि शिरो ऽर्चयत्
मालत्या भूमिशायी स्याद्गोमयं प्राशयेत्क्रमात्
skandhā bilvajavābhiśca pañcame 'hni śiro 'rcayat
mālatyā bhūmiśāyī syādgomayaṃ prāśayetkramāt
- 10
गोमूत्रं च दधि क्षीरं पञ्चमे पञ्चगव्यकम्
नक्तं कुर्यात्पञ्चदश्यां व्रती स्याद्भुक्तिमुक्तिभाक्
gomūtraṃ ca dadhi kṣīraṃ pañcame pañcagavyakam
naktaṃ kuryātpañcadaśyāṃ vratī syādbhuktimuktibhāk
- 11
एकादशीव्रतं नित्यं तत्कुर्यात्पक्षयोर्द्वयोः
अघौघनरकं हन्यात्सर्वदं विष्णुलोकदम्
ekādaśīvrataṃ nityaṃ tatkuryātpakṣayordvayoḥ
aghaughanarakaṃ hanyātsarvadaṃ viṣṇulokadam
- 12
एकादशी द्वादशी च निशान्ते च त्रयोदशी
नित्यमेकादशी यत्र तत्र संनिहितो हरिः
ekādaśī dvādaśī ca niśānte ca trayodaśī
nityamekādaśī yatra tatra saṃnihito hariḥ
- 13
दशम्येकादशी यत्र तत्रस्थाश्चासुरादयः
द्वादश्यां पारणं कुर्यात्सूतके मृतके चरेत्
daśamyekādaśī yatra tatrasthāścāsurādayaḥ
dvādaśyāṃ pāraṇaṃ kuryātsūtake mṛtake caret
- 14
चतुर्दशीं प्रतिपदं पूर्वमिश्राम् उपावसेत्
पौर्णमास्याम् अमावास्यां प्रतिपन्मिश्रितां मुने
caturdaśīṃ pratipadaṃ pūrvamiśrām upāvaset
paurṇamāsyām amāvāsyāṃ pratipanmiśritāṃ mune
- 15
द्वितीयां तृतीयामिश्रां तृतीयां चाप्युपावसेत्
चतुर्थ्या संगतां नित्यं चतुर्थोञ्चनया युताम्
पञ्चमीं षष्ठ्यसंयुक्तां षष्ठ्या युक्तां च सप्तमीम्
dvitīyāṃ tṛtīyāmiśrāṃ tṛtīyāṃ cāpyupāvaset
caturthyā saṃgatāṃ nityaṃ caturthoñcanayā yutām
pañcamīṃ ṣaṣṭhyasaṃyuktāṃ ṣaṣṭhyā yuktāṃ ca saptamīm
- 16
इति श्रीगारुडे महापुराणे पूर्वखण्डे प्रथमांशाख्ये आचारकाण्डे भीष्मपञ्चकादिव्रतं नाम त्रयोविंशत्युत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe bhīṣmapañcakādivrataṃ nāma trayoviṃśatyuttaraśatatamo 'dhyāyaḥ

