35 shlokas
- 1
सूत उवाच
प्राणेश्वरं गारुडं च शिवोक्तं प्रवदाम्यहम्
स्थानान्यादौ प्रवक्ष्यामि नागदष्टो न जीवति
sūta uvāca
prāṇeśvaraṃ gāruḍaṃ ca śivoktaṃ pravadāmyaham
sthānānyādau pravakṣyāmi nāgadaṣṭo na jīvati
- 2
चितावल्मीकशैलादौ कपे च विवरे तरोः
दंशे रेखात्रयं यस्य प्रच्छन्नं स न जीवति
citāvalmīkaśailādau kape ca vivare taroḥ
daṃśe rekhātrayaṃ yasya pracchannaṃ sa na jīvati
- 3
षष्ठ्यां च कर्कटे मेषे मूलाश्लेषामघादिषु
कक्षाश्रोणिगले सन्धौ शङ्खकर्णोदरादिषु
ṣaṣṭhyāṃ ca karkaṭe meṣe mūlāśleṣāmaghādiṣu
kakṣāśroṇigale sandhau śaṅkhakarṇodarādiṣu
- 4
दण्डी शस्त्रधरो भिक्षुर्नग्नादिः कालदूतकः
बाहौ च वक्त्रे ग्रीवायां दष्टायां न हि जीवति
daṇḍī śastradharo bhikṣurnagnādiḥ kāladūtakaḥ
bāhau ca vaktre grīvāyāṃ daṣṭāyāṃ na hi jīvati
- 5
पूर्वं दिनपतिर्भुङ्क्ते अर्धयामं ततो ऽपरे
शेषा ग्रहाः प्रतिदिनं षट्संख्यापरिवर्तनैः
pūrvaṃ dinapatirbhuṅkte ardhayāmaṃ tato 'pare
śeṣā grahāḥ pratidinaṃ ṣaṭsaṃkhyāparivartanaiḥ
- 6
नागभोगः क्रमाज्ज्ञेयो रात्रौ बाणविवर्तनैः
शेषो ऽर्कः फणिपश्चन्द्रस्तक्षको भौम ईरितः
nāgabhogaḥ kramājjñeyo rātrau bāṇavivartanaiḥ
śeṣo 'rkaḥ phaṇipaścandrastakṣako bhauma īritaḥ
- 7
कर्कोटो ज्ञो गुरुः पद्मो महापद्मश्च भार्गवः
शङ्खः शनैश्चरो राहुः कुलिकश्चाहयो ग्रहाः
karkoṭo jño guruḥ padmo mahāpadmaśca bhārgavaḥ
śaṅkhaḥ śanaiścaro rāhuḥ kulikaścāhayo grahāḥ
- 8
रात्रौ दिवा सुरगुरोर्भागे स्यादमरान्तकः
पङ्गोः काले दिवा राहुः कुलिकेन सह स्थितः
rātrau divā suragurorbhāge syādamarāntakaḥ
paṅgoḥ kāle divā rāhuḥ kulikena saha sthitaḥ
- 9
यामार्धसन्धिसंस्थां च वेलां कालवतीं चरेत्
बाणद्विषड्वह्निवाजियुगभूर् एकभागतः
yāmārdhasandhisaṃsthāṃ ca velāṃ kālavatīṃ caret
bāṇadviṣaḍvahnivājiyugabhūr ekabhāgataḥ
- 10
दिवा षडेदनेत्राद्रिपञ्चत्रिमानुषांशकैः
पादाङ्गुष्ठे पादपृष्ठे पादपृष्ठे गुल्फे जानुनि लिङ्गके
divā ṣaḍedanetrādripañcatrimānuṣāṃśakaiḥ
pādāṅguṣṭhe pādapṛṣṭhe pādapṛṣṭhe gulphe jānuni liṅgake
- 11
नाभौ हृदि स्तनतटे कण्ठे नासापुटे ऽक्षिणि
कर्णयोश्च भ्रुवोः शङ्खे मस्तके प्रतिपत्क्रमात्
nābhau hṛdi stanataṭe kaṇṭhe nāsāpuṭe 'kṣiṇi
karṇayośca bhruvoḥ śaṅkhe mastake pratipatkramāt
- 12
तिष्ठच्चन्द्रश्च जीवेच्च पुंसो दक्षिणभागके
कायस्य वामभागे तु स्त्रिया वायुवहात्करात्
tiṣṭhaccandraśca jīvecca puṃso dakṣiṇabhāgake
kāyasya vāmabhāge tu striyā vāyuvahātkarāt
- 13
अमृतस्तत्कृतो मोहो निवर्तेत च मर्दनात्
आत्मनः परमं बीजं हंसाख्यं स्फटिकामलम्
amṛtastatkṛto moho nivarteta ca mardanāt
ātmanaḥ paramaṃ bījaṃ haṃsākhyaṃ sphaṭikāmalam
- 14
दातव्यं विषपापघ्नं बीजं तस्य चतुर्विधम्
बिन्दुपञ्चस्वरयुतम् आद्यम् उक्तं द्वितीयकम्
षष्ठारूढं तृतीयं स्यात्सविसर्गं चतुर्थकम्
ॐ कुरु कुले स्वाहा
dātavyaṃ viṣapāpaghnaṃ bījaṃ tasya caturvidham
bindupañcasvarayutam ādyam uktaṃ dvitīyakam
ṣaṣṭhārūḍhaṃ tṛtīyaṃ syātsavisargaṃ caturthakam
oṃ kuru kule svāhā
- 15
विद्या त्रैलोक्यरक्षार्थं गरुडेन धृता पुरा
वधेप्सुर्नागनागानां मुखे ऽथ प्रणवं न्यसेत्
vidyā trailokyarakṣārthaṃ garuḍena dhṛtā purā
vadhepsurnāganāgānāṃ mukhe 'tha praṇavaṃ nyaset
- 16
गले कुरु न्यसेद्धीमान्कुले च गुल्फयोः स्मृतः
स्वाहा पादयुगे चैव युगहा न्यास ईरितः
gale kuru nyaseddhīmānkule ca gulphayoḥ smṛtaḥ
svāhā pādayuge caiva yugahā nyāsa īritaḥ
- 17
गृहे विविखिता यत्र तन्नागाः संत्यजन्ति च
सहस्रमन्त्रं जप्त्वा तु कर्णे सूत्रं धृतं तथा
gṛhe vivikhitā yatra tannāgāḥ saṃtyajanti ca
sahasramantraṃ japtvā tu karṇe sūtraṃ dhṛtaṃ tathā
- 18
यद्गृहे शर्करा जप्ता क्षिप्ता नागास्त्यजन्ति तत्
सप्तलक्षस्य जप्याद्धि सिद्धिः प्राप्ता सुरासुरैः
yadgṛhe śarkarā japtā kṣiptā nāgāstyajanti tat
saptalakṣasya japyāddhi siddhiḥ prāptā surāsuraiḥ
- 19
ॐ सुवर्णरेखे कुक्कुटविग्रहरूपिणि स्वाहा
एवं चाष्टदले पद्मदले वर्णयुगं लिखेत्
oṃ suvarṇarekhe kukkuṭavigraharūpiṇi svāhā
evaṃ cāṣṭadale padmadale varṇayugaṃ likhet
- 20
नामैतद्वारिधाराभिः स्नातो दष्टो विषं त्यजेत्
ॐ पक्षि स्वाहा
nāmaitadvāridhārābhiḥ snāto daṣṭo viṣaṃ tyajet
oṃ pakṣi svāhā
- 21
अङ्गुष्ठादि कनिष्ठान्तं करे न्यस्याथ देहके
के वक्त्रे हृदि लिङ्गे च पादयोर्गरुडस्य हि
aṅguṣṭhādi kaniṣṭhāntaṃ kare nyasyātha dehake
ke vaktre hṛdi liṅge ca pādayorgaruḍasya hi
- 22
नाक्रामन्ति च तच्छायां स्वप्ने ऽपि विषपन्नगाः
यस्तु लक्षं जपेच्चास्याः स दृष्ट्वा नाशयेद्विषम्
nākrāmanti ca tacchāyāṃ svapne 'pi viṣapannagāḥ
yastu lakṣaṃ japeccāsyāḥ sa dṛṣṭvā nāśayedviṣam
- 23
ॐ ह्री ह्रौ ह्रीं भिरुण्डायै स्वाहा
कर्णे जप्ता त्वियं विद्या दष्टकस्य विषं हरेत्
oṃ hrī hrau hrīṃ bhiruṇḍāyai svāhā
karṇe japtā tviyaṃ vidyā daṣṭakasya viṣaṃ haret
- 24
अ आ न्यसेत्तु पादाग्रे इ ई गुल्फे ऽथ जानुनि
उ ऊ ए ऐ कटितटे ओ नाभौ हृदि औ न्यसेत्
a ā nyasettu pādāgre i ī gulphe 'tha jānuni
u ū e ai kaṭitaṭe o nābhau hṛdi au nyaset
- 25
वक्त्रे अमुत्तमाङ्गे अः न्यसेद्वै हंससंयुताः
हंसो विषादि च हरेज्जप्तो ध्यातो ऽथ पूजितः
vaktre amuttamāṅge aḥ nyasedvai haṃsasaṃyutāḥ
haṃso viṣādi ca harejjapto dhyāto 'tha pūjitaḥ
- 26
गरुडो ऽहमिति ध्यात्वा कुर्याद्विषहरां क्रियाम्
हंमन्त्रं गात्रविन्यस्तं विषादिहरमीरितम्
garuḍo 'hamiti dhyātvā kuryādviṣaharāṃ kriyām
haṃmantraṃ gātravinyastaṃ viṣādiharamīritam
- 27
न्यस्य हंसं वामकरे नासामुखनिरोधकृत्
मन्त्रो हरेद्दष्टकस्य त्वङ्मांसादिगतं विषम्
nyasya haṃsaṃ vāmakare nāsāmukhanirodhakṛt
mantro hareddaṣṭakasya tvaṅmāṃsādigataṃ viṣam
- 28
स वायुना समाकृष्य दष्टानां गरलं हरेत्
तनौ न्यसेद्दष्टकस्य नीलकण्ठादि संस्मरेत्
sa vāyunā samākṛṣya daṣṭānāṃ garalaṃ haret
tanau nyaseddaṣṭakasya nīlakaṇṭhādi saṃsmaret
- 29
पीतं प्रत्यङ्गिरामूलं तण्डुलद्भिर्विषापहम्
पुनर्नवाफलिनीनां मूलं वक्क्रजम् ईदृशम्
pītaṃ pratyaṅgirāmūlaṃ taṇḍuladbhirviṣāpaham
punarnavāphalinīnāṃ mūlaṃ vakkrajam īdṛśam
- 30
मूलं शुक्लबृहत्यास्तु कर्कोट्या गैरिकर्णिकम्
अद्भिर्घृष्टघृतोपेतलेपो ऽयं विषमर्दनः
mūlaṃ śuklabṛhatyāstu karkoṭyā gairikarṇikam
adbhirghṛṣṭaghṛtopetalepo 'yaṃ viṣamardanaḥ

