87 shlokas
- 1
ब्रह्मोवाच
अहन्यहनि यः कुर्यात्क्रियां स ज्ञानमाप्नुयात्
ब्राह्मे मुहूर्ते चोत्थाय धर्ममर्थं च चिन्तयेत्
brahmovāca
ahanyahani yaḥ kuryātkriyāṃ sa jñānamāpnuyāt
brāhme muhūrte cotthāya dharmamarthaṃ ca cintayet
- 2
चिन्तयेद्धृदि पद्मस्थमानन्दमजरं हरिम्
उषःकाले तु सम्प्राप्ते कृत्वा चावश्यकं बुधः
cintayeddhṛdi padmasthamānandamajaraṃ harim
uṣaḥkāle tu samprāpte kṛtvā cāvaśyakaṃ budhaḥ
- 3
स्नायान्नदीषु शुद्धासु शौचं कृत्वा यथाविधि
प्रातःस्नानेन पूयन्ते ये ऽपि पापकृतो जनाः
snāyānnadīṣu śuddhāsu śaucaṃ kṛtvā yathāvidhi
prātaḥsnānena pūyante ye 'pi pāpakṛto janāḥ
- 4
तस्मात्सर्वप्रयत्नेन प्रातः स्नानं समाचरेत्
प्रातः स्नानं प्रशंसन्ति दृष्टादृष्टष्टकरं हि तत्
tasmātsarvaprayatnena prātaḥ snānaṃ samācaret
prātaḥ snānaṃ praśaṃsanti dṛṣṭādṛṣṭaṣṭakaraṃ hi tat
- 5
सुखात्सुप्तस्य सततं लालाद्याः संस्रवन्ति हि
अतो नैवाचरेत्कर्माण्यकृत्वा स्नानमादितः
sukhātsuptasya satataṃ lālādyāḥ saṃsravanti hi
ato naivācaretkarmāṇyakṛtvā snānamāditaḥ
- 6
अलक्ष्मीः कालकर्णी च दुःस्वप्नं दुर्विचिन्तितम्
प्रातः स्नानेन पापानि धूयन्ते नात्र संशयः
alakṣmīḥ kālakarṇī ca duḥsvapnaṃ durvicintitam
prātaḥ snānena pāpāni dhūyante nātra saṃśayaḥ
- 7
न च स्नानं विना पुंसां प्राशस्त्यं कर्म संस्मृतम्
होमे जप्ये विशेषेण तस्मात्स्नानं समाचरेत्
na ca snānaṃ vinā puṃsāṃ prāśastyaṃ karma saṃsmṛtam
home japye viśeṣeṇa tasmātsnānaṃ samācaret
- 8
अशक्तावशिरस्कं तु स्नानमस्य विधीयते
आर्द्रेण वाससा वापि मार्जनं कायिकं स्मृतम्
aśaktāvaśiraskaṃ tu snānamasya vidhīyate
ārdreṇa vāsasā vāpi mārjanaṃ kāyikaṃ smṛtam
- 9
ब्राह्ममाग्नेयमुद्दिष्टं वायव्यं दिव्यमेव च
वारुणं यौगिकं तद्वत्षडङ्गं स्नानमाचरेत्
brāhmamāgneyamuddiṣṭaṃ vāyavyaṃ divyameva ca
vāruṇaṃ yaugikaṃ tadvatṣaḍaṅgaṃ snānamācaret
- 10
ब्राह्मं तु मार्जनं मन्त्रैः कुशैः सोदकबिन्दुभिः
आग्नेयं भस्मना आ पादमस्तकाद्देहधूननम्
brāhmaṃ tu mārjanaṃ mantraiḥ kuśaiḥ sodakabindubhiḥ
āgneyaṃ bhasmanā ā pādamastakāddehadhūnanam
- 11
गवां हि रजसा प्रोक्तं वायव्यं स्नानमुत्तमम्
यत्तु सातपवर्षेण स्नानं तद्दिव्यमुच्यते
gavāṃ hi rajasā proktaṃ vāyavyaṃ snānamuttamam
yattu sātapavarṣeṇa snānaṃ taddivyamucyate
- 12
वारुणं चावगाहं च मानर्स त्वात्मवेदनम्
यौगिकं स्नानमाख्यातं योगेन हरिचिन्तनम्
vāruṇaṃ cāvagāhaṃ ca mānarsa tvātmavedanam
yaugikaṃ snānamākhyātaṃ yogena haricintanam
- 13
आत्मतीर्थमिति ख्यातं सेवितं ब्रह्मवादिभिः
क्षीरवृक्षसमुद्भूतं मालतीसम्भवं शुभम्
ātmatīrthamiti khyātaṃ sevitaṃ brahmavādibhiḥ
kṣīravṛkṣasamudbhūtaṃ mālatīsambhavaṃ śubham
- 14
अपामार्गं च बिल्वं च करवीरं च धावने
उदङ्मुखः प्राङ्मुखो वा भक्षयेद्दन्तधावनम्
apāmārgaṃ ca bilvaṃ ca karavīraṃ ca dhāvane
udaṅmukhaḥ prāṅmukho vā bhakṣayeddantadhāvanam
- 15
प्रक्षाल्य भुक्त्वा तज्जह्याच्छुचौ देशे समाहितः
स्नात्वा संतर्पयेद्देवान् ऋषीन्पितृगणांस्तथा
prakṣālya bhuktvā tajjahyācchucau deśe samāhitaḥ
snātvā saṃtarpayeddevān ṛṣīnpitṛgaṇāṃstathā
- 16
आचम्य विधिवन्नित्यं पुनराचम्य वाग्यतः
संमार्ज्य मन्त्रैर् आत्मानं कुशैः सोदकबिन्दुभिः
ācamya vidhivannityaṃ punarācamya vāgyataḥ
saṃmārjya mantrair ātmānaṃ kuśaiḥ sodakabindubhiḥ
- 17
आपोहिष्ठाव्याहृतिभिः सावित्र्या वारुणैः शुभैः
ओङ्कारव्याहृतियुतां गायत्त्रीं वेदमातरम्
āpohiṣṭhāvyāhṛtibhiḥ sāvitryā vāruṇaiḥ śubhaiḥ
oṅkāravyāhṛtiyutāṃ gāyattrīṃ vedamātaram
- 18
जप्त्वा जलाञ्जलिं दद्याद्भास्करं प्रति तन्मनाः
प्राक्कूलेषु ततः स्थित्वा दर्भेषु सुसमाहितः
japtvā jalāñjaliṃ dadyādbhāskaraṃ prati tanmanāḥ
prākkūleṣu tataḥ sthitvā darbheṣu susamāhitaḥ
- 19
प्राणायामं ततः कृत्वा ध्यायेत्सन्ध्यामिति श्रुतिः
या सन्ध्या सा जगत्सूतिर्मायातीता हि निष्कला
prāṇāyāmaṃ tataḥ kṛtvā dhyāyetsandhyāmiti śrutiḥ
yā sandhyā sā jagatsūtirmāyātītā hi niṣkalā
- 20
ऐश्वरी केवला शक्तिस्तत्त्वत्रयसमुद्भवा
ध्यात्वा रक्तां सितां कृष्णां गायत्त्रीं वै जपेद्बुधः
aiśvarī kevalā śaktistattvatrayasamudbhavā
dhyātvā raktāṃ sitāṃ kṛṣṇāṃ gāyattrīṃ vai japedbudhaḥ
- 21
प्राङ्मुखः सततं विप्रः सन्ध्योपासनमाचरेत्
सन्ध्याहीनो ऽशुचिर्नित्यमनर्हः सर्वकर्मसु
prāṅmukhaḥ satataṃ vipraḥ sandhyopāsanamācaret
sandhyāhīno 'śucirnityamanarhaḥ sarvakarmasu
- 22
यदन्यत्कुरुते किंचिन्न तस्य फलभाग्भवेत्
अनन्यचेतसः सन्तो ब्राह्मणा वेदपारगाः
yadanyatkurute kiṃcinna tasya phalabhāgbhavet
ananyacetasaḥ santo brāhmaṇā vedapāragāḥ
- 23
उपास्य विधिवत्सन्ध्यां प्राप्ताः पूर्वपरां गतिम्
यो ऽन्यत्र कुरुते यत्नं धर्मकार्ये द्विजोत्तमः
upāsya vidhivatsandhyāṃ prāptāḥ pūrvaparāṃ gatim
yo 'nyatra kurute yatnaṃ dharmakārye dvijottamaḥ
- 24
विहाय सन्ध्याप्रणतिं स याति नरकायुतम्
तस्मात्सर्वप्रयत्नेन सन्ध्योपासनमाचरेत्
vihāya sandhyāpraṇatiṃ sa yāti narakāyutam
tasmātsarvaprayatnena sandhyopāsanamācaret
- 25
उपासितो भवेत्तेन देवो योगतनुः परः
सहस्रपरमां नित्यां शतमध्यां दशावराम्
upāsito bhavettena devo yogatanuḥ paraḥ
sahasraparamāṃ nityāṃ śatamadhyāṃ daśāvarām
- 26
गायत्त्रीं वै जपेद्विद्वान्प्राङ्मुखः प्रयतः शुचिः
अथोपतिष्ठेदादित्यमुदयस्थं समाहितः
gāyattrīṃ vai japedvidvānprāṅmukhaḥ prayataḥ śuciḥ
athopatiṣṭhedādityamudayasthaṃ samāhitaḥ
- 27
मन्त्रैस्तु विविधैः सौरैः ऋग्यजुःसामसंज्ञितैः
उपस्थाय महायोगं देवदेवं दिवाकरम्
mantraistu vividhaiḥ sauraiḥ ṛgyajuḥsāmasaṃjñitaiḥ
upasthāya mahāyogaṃ devadevaṃ divākaram
- 28
कुर्वीत प्रणतिं भूमौ मूर्धानमभिमन्त्रितः
ॐ खखोल्काय शान्ताय कारणत्रयहेतवे
kurvīta praṇatiṃ bhūmau mūrdhānamabhimantritaḥ
oṃ khakholkāya śāntāya kāraṇatrayahetave
- 29
निवेदयामि चात्मानं नमस्ते ज्ञानरूपिणे
त्वमेव ब्रह्म परममापो ज्योती रसो ऽमृतम्
nivedayāmi cātmānaṃ namaste jñānarūpiṇe
tvameva brahma paramamāpo jyotī raso 'mṛtam
- 30
भूर्भुवः स्वस्त्वमोङ्कारः सर्वो रुद्रः सनातनः
एतद्वै सूर्यहृदयं जप्त्वा स्तवनमुत्तमम्
bhūrbhuvaḥ svastvamoṅkāraḥ sarvo rudraḥ sanātanaḥ
etadvai sūryahṛdayaṃ japtvā stavanamuttamam

