33 shlokas
- 1
ब्रह्मोवाच
वक्ष्ये प्रतिपदादीनि व्रतानि व्यास शृण्वथ
वैश्वानरपदं याति शिखिव्रतमिदं स्मृतम्
brahmovāca
vakṣye pratipadādīni vratāni vyāsa śṛṇvatha
vaiśvānarapadaṃ yāti śikhivratamidaṃ smṛtam
- 2
प्रतिपद्येकभक्ताशी समाप्ते कपिलाप्रदः
चैत्रादौ कारयेच्चैव ब्रह्मपूजां यथाविधि
गन्धपुष्पार्चनैर्दानैर्माल्याद्यैश्च मनोरमैः
pratipadyekabhaktāśī samāpte kapilāpradaḥ
caitrādau kārayeccaiva brahmapūjāṃ yathāvidhi
gandhapuṣpārcanairdānairmālyādyaiśca manoramaiḥ
- 3
सहोमैः पूजयेद्देवं सर्वान्कामानवाप्नुयात्
कार्तिके त सिते ऽष्टम्यां पुष्पहारी च वत्सरम्
sahomaiḥ pūjayeddevaṃ sarvānkāmānavāpnuyāt
kārtike ta site 'ṣṭamyāṃ puṣpahārī ca vatsaram
- 4
पुष्पादिदाता रूपेण रूपभागी भवेन्नरः
कृष्णपक्षे तृतीयायां श्रावणे श्रीधरं श्रिया
puṣpādidātā rūpeṇa rūpabhāgī bhavennaraḥ
kṛṣṇapakṣe tṛtīyāyāṃ śrāvaṇe śrīdharaṃ śriyā
- 5
यजेद् अशून्यशय्यायां फलं दद्याद्द्विजातये
शय्यां दत्त्वा प्रार्थयेच्च श्रीधराय नमः श्रियै
yajed aśūnyaśayyāyāṃ phalaṃ dadyāddvijātaye
śayyāṃ dattvā prārthayecca śrīdharāya namaḥ śriyai
- 6
उमां शिवं हुताशं च तृतीयायां च पूजयेत्
हविष्यम् अन्नं नैवेद्यं देयं दमनकं तथा
umāṃ śivaṃ hutāśaṃ ca tṛtīyāyāṃ ca pūjayet
haviṣyam annaṃ naivedyaṃ deyaṃ damanakaṃ tathā
- 7
चैत्रादौ फलमाप्नोति उमया मे प्रभाषितम्
फाल्गुनादितृतीयायां लवणं यस्तु वर्जयेत्
caitrādau phalamāpnoti umayā me prabhāṣitam
phālgunāditṛtīyāyāṃ lavaṇaṃ yastu varjayet
- 8
समाप्ते शयनं दद्याद्गृहं चोपस्करान्वितम्
सम्पूज्य विप्रमिथनं भवानी प्रीयतामिति
samāpte śayanaṃ dadyādgṛhaṃ copaskarānvitam
sampūjya vipramithanaṃ bhavānī prīyatāmiti
- 9
गौरीलोके वसेन्नित्यं सौभाग्यकरमुत्तमम्
गौरी काली उमा भद्रा दुर्गा कान्तिः सरस्वती
gaurīloke vasennityaṃ saubhāgyakaramuttamam
gaurī kālī umā bhadrā durgā kāntiḥ sarasvatī
- 10
मङ्गला वैष्णवी लक्ष्मीः शिवा नारायणी क्रमात्
मार्गे तृतीयामारभ्य अवियोगादिम् आप्नुयात्
maṅgalā vaiṣṇavī lakṣmīḥ śivā nārāyaṇī kramāt
mārge tṛtīyāmārabhya aviyogādim āpnuyāt
- 11
चतुर्थ्यां सितमाघादौ निराहारो व्रतान्वितः
दत्त्वा तिलांस्तु विप्राय स्वयं भुङ्क्ते तिलोदकम्
caturthyāṃ sitamāghādau nirāhāro vratānvitaḥ
dattvā tilāṃstu viprāya svayaṃ bhuṅkte tilodakam
- 12
वर्षद्वये समाप्तिश्च निर्विघ्नादिं समाप्नुयात्
गः स्वाहा मूलमन्त्रो ऽयं प्रणवेन समन्वितः
varṣadvaye samāptiśca nirvighnādiṃ samāpnuyāt
gaḥ svāhā mūlamantro 'yaṃ praṇavena samanvitaḥ
- 13
ग्लैं ग्लां हृदये गां गीं हूं ह्रीं ह्रीं शिरः शिखा
गूं वर्म गों च गैं नेत्रं गों च आवाहनादिषु
glaiṃ glāṃ hṛdaye gāṃ gīṃ hūṃ hrīṃ hrīṃ śiraḥ śikhā
gūṃ varma goṃ ca gaiṃ netraṃ goṃ ca āvāhanādiṣu
- 14
आगच्छोल्काय गनन्धोल्कः पुष्पोल्को धूपकोल्ककः
दीपोल्काय महोल्काय बलिश्चाथ विसजनम्
āgaccholkāya ganandholkaḥ puṣpolko dhūpakolkakaḥ
dīpolkāya maholkāya baliścātha visajanam
- 15
सिदेधोल्काय च गायत्त्री न्यासोङ्गुष्ठादिर् ईरितः
ॐ महाकर्णाय विद्महे वक्रतुण्डाय धीमहि तन्नो दन्तिः प्रचोदयात्
sidedholkāya ca gāyattrī nyāsoṅguṣṭhādir īritaḥ
oṃ mahākarṇāya vidmahe vakratuṇḍāya dhīmahi tanno dantiḥ pracodayāt
- 16
पूजयेत्तिलहोमैश्च एते पूज्या गणास्तथा
गणाय गणपतये स्वाहा कूष्माण्डकाय च
pūjayettilahomaiśca ete pūjyā gaṇāstathā
gaṇāya gaṇapataye svāhā kūṣmāṇḍakāya ca
- 17
अमोघोल्कायैकदन्ताय त्रिपुरान्तकरूपिणे
ॐ श्यामदन्तविकरालास्याहवेपाय वै नमः
amogholkāyaikadantāya tripurāntakarūpiṇe
oṃ śyāmadantavikarālāsyāhavepāya vai namaḥ
- 18
पद्मदंष्ट्राय स्वाहान्ते मुद्रा वै नर्तनं गणे
हस्ततालश्च हसनं सौभाग्यादिफलं भवेत्
padmadaṃṣṭrāya svāhānte mudrā vai nartanaṃ gaṇe
hastatālaśca hasanaṃ saubhāgyādiphalaṃ bhavet
- 19
मार्गशीर्षे तथा शुक्लचतुर्थ्यां पूजयेद्गणम्
अब्दं प्राप्नोति विद्याश्रीकीर्त्यायुःपुत्रसन्ततिम्
mārgaśīrṣe tathā śuklacaturthyāṃ pūjayedgaṇam
abdaṃ prāpnoti vidyāśrīkīrtyāyuḥputrasantatim
- 20
सोमवारे चतुर्थ्यां च समुपोष्यार्चयेद्गणम्
जपञ्जुह्वत्स्मरन्विद्या स्वर्गं निर्वाणतां व्रजेत्
somavāre caturthyāṃ ca samupoṣyārcayedgaṇam
japañjuhvatsmaranvidyā svargaṃ nirvāṇatāṃ vrajet
- 21
यजेच्छुक्लचतुर्थ्यां यः खण्डलड्डुकमोदकैः
विघ्नाचनेन सर्वान्स कामान्सौभाग्यमाप्नुयात्
yajecchuklacaturthyāṃ yaḥ khaṇḍalaḍḍukamodakaiḥ
vighnācanena sarvānsa kāmānsaubhāgyamāpnuyāt
- 22
पुत्रादिकं दमनकैर्दमनाख्या चतुर्थ्यपि
आं गणपतये नमः चतुर्थ्यन्तं यजेद्गणम्
putrādikaṃ damanakairdamanākhyā caturthyapi
āṃ gaṇapataye namaḥ caturthyantaṃ yajedgaṇam
- 23
मासे तु यस्मिन्कस्मिंश्चिज्जुहुयाद्वा जपेत्स्मरेत्
सर्वान्कामानवाप्नोति सर्वविघ्नविनाशनम्
māse tu yasminkasmiṃścijjuhuyādvā japetsmaret
sarvānkāmānavāpnoti sarvavighnavināśanam
- 24
विनायकं मूर्तिकाद्यं यजेदेभिश्च नामभिः
सो ऽपि सद्गतिमाप्नोति स्वर्गमोक्षसुखानि च
vināyakaṃ mūrtikādyaṃ yajedebhiśca nāmabhiḥ
so 'pi sadgatimāpnoti svargamokṣasukhāni ca
- 25
गणपूज्यो वक्रतुण्ड एकदंष्ट्री त्रियम्बकः
नीलग्रीवो लम्बोदरो विकटो विघ्नराजकः
gaṇapūjyo vakratuṇḍa ekadaṃṣṭrī triyambakaḥ
nīlagrīvo lambodaro vikaṭo vighnarājakaḥ
- 26
धूम्रवर्णो भालचन्द्रो दशमस्त विनायकः
गणपतिर्हस्तिमुखो द्वादशारे यजेद्गणम्
dhūmravarṇo bhālacandro daśamasta vināyakaḥ
gaṇapatirhastimukho dvādaśāre yajedgaṇam
- 27
पृथक्समस्तं मधावी सर्वान्कामानवाप्नुयात्
श्रावणे चाश्विने भाद्रे पञ्चम्यां कात्तिक शुभे
pṛthaksamastaṃ madhāvī sarvānkāmānavāpnuyāt
śrāvaṇe cāśvine bhādre pañcamyāṃ kāttika śubhe
- 28
वासुकिस्तक्षकश्चैव कालीयो मणिभद्रकः
ऐरावतो धृतराष्ट्रः कर्कोटकधनञ्जयौ
vāsukistakṣakaścaiva kālīyo maṇibhadrakaḥ
airāvato dhṛtarāṣṭraḥ karkoṭakadhanañjayau
- 29
घृताद्यैः स्नापिता ह्येते आयुरारोग्यसम्पदः
अनन्तं वासुकिं शङ्खं पद्मं कम्बलमेव च
ghṛtādyaiḥ snāpitā hyete āyurārogyasampadaḥ
anantaṃ vāsukiṃ śaṅkhaṃ padmaṃ kambalameva ca
- 30
तथा कर्कोटकं नागं धृतराष्ट्रं च शङ्खकम्
कालीयं तक्षकं चैव पिङ्गलं मासि मासि च
tathā karkoṭakaṃ nāgaṃ dhṛtarāṣṭraṃ ca śaṅkhakam
kālīyaṃ takṣakaṃ caiva piṅgalaṃ māsi māsi ca

