10 shlokas
- 1
हरिरुवाच
पुनः सूर्यार्चनं वक्ष्ये यदुक्तं धनदाय हि
अष्टपत्रं लिखेत्पद्मं शुचौ देशे सकर्णिकम्
hariruvāca
punaḥ sūryārcanaṃ vakṣye yaduktaṃ dhanadāya hi
aṣṭapatraṃ likhetpadmaṃ śucau deśe sakarṇikam
- 2
आवाहनीं ततो बद्धा मुद्रामावाहयेद्रविम्
खखोल्कं स्थाप्य मुद्रां तु स्थापयेन्मन्त्ररूपिणीम्
āvāhanīṃ tato baddhā mudrāmāvāhayedravim
khakholkaṃ sthāpya mudrāṃ tu sthāpayenmantrarūpiṇīm
- 3
आग्नेय्यां दिशि देवस्य हृदयं स्थापयेच्छिव
ऐशान्यां तु शिरः स्थाप्यं नैरृत्यां विन्यसेच्छिखाम्
āgneyyāṃ diśi devasya hṛdayaṃ sthāpayecchiva
aiśānyāṃ tu śiraḥ sthāpyaṃ nairṛtyāṃ vinyasecchikhām
- 4
पौरंदर्यां न्यसेद्धर्मम् एकाग्रस्थितमानसः
वायव्यां चैव नेत्रं तु वारुण्यामस्त्रमेव च
pauraṃdaryāṃ nyaseddharmam ekāgrasthitamānasaḥ
vāyavyāṃ caiva netraṃ tu vāruṇyāmastrameva ca
- 5
ऐशान्यां स्थापयेत्सोमं पौरन्दर्यां तु लोहितम्
आग्नेय्यां सोमतनयं याम्यां चैव बृहस्पतिम्
aiśānyāṃ sthāpayetsomaṃ paurandaryāṃ tu lohitam
āgneyyāṃ somatanayaṃ yāmyāṃ caiva bṛhaspatim
- 6
नैरृत्यां दानवगुरुं वारुण्यां तु शनैश्चरम्
वायव्यां च तथा केतुं कौबेर्यां राहुमेव च
nairṛtyāṃ dānavaguruṃ vāruṇyāṃ tu śanaiścaram
vāyavyāṃ ca tathā ketuṃ kauberyāṃ rāhumeva ca
- 7
द्वितीयायां तु कक्षायां सूर्यान्द्वादश पूजयेत्
भगः सूर्यो ऽर्यमा चैव मित्रो वै वरुणस्तथा
dvitīyāyāṃ tu kakṣāyāṃ sūryāndvādaśa pūjayet
bhagaḥ sūryo 'ryamā caiva mitro vai varuṇastathā
- 8
सविता चैव धाता च विवस्वांश्च महाबलः
त्वष्टा पूषा तथा चेन्द्रो द्वादशो विष्णुरुच्यते
savitā caiva dhātā ca vivasvāṃśca mahābalaḥ
tvaṣṭā pūṣā tathā cendro dvādaśo viṣṇurucyate
- 9
पूर्वादावर्चयेद्देवानिन्द्रादीञ्छ्रद्धया नरः
जया च विजया चैव जयन्ति चापराजिता
शेषश्च वासुकिश्चैव नागानित्यादि पूजयेत्
pūrvādāvarcayeddevānindrādīñchraddhayā naraḥ
jayā ca vijayā caiva jayanti cāparājitā
śeṣaśca vāsukiścaiva nāgānityādi pūjayet
- 10
इति श्रीगारुडे महापुराणे पूर्वखण्डे प्रथमांशाख्ये आचारकाण्डे सूर्यार्चनविधिर्नाम सप्तदशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe sūryārcanavidhirnāma saptadaśo 'dhyāyaḥ

