17 shlokas
- 1
हरिरुवाच
शतानीको ह्यश्वमेधदत्तश्चाप्य् अधिसोमकः
कृष्णो ऽनिरुद्धश्चाप्युष्णस्ततश्चित्ररथो नृपः
hariruvāca
śatānīko hyaśvamedhadattaścāpy adhisomakaḥ
kṛṣṇo 'niruddhaścāpyuṣṇastataścitraratho nṛpaḥ
- 2
शुचिद्रथो वृष्णिमांश्च सुषेणश्च सुनीथकः
नृचक्षुश्च मुखाबाणः मेधावी च नृपञ्जयः
śucidratho vṛṣṇimāṃśca suṣeṇaśca sunīthakaḥ
nṛcakṣuśca mukhābāṇaḥ medhāvī ca nṛpañjayaḥ
- 3
पारिप्लवश्च मुनयो मेधावी च नृपञ्जयः
बृहद्रथो हरिस्तिग्मः शतानीकः सुदानकः
pāriplavaśca munayo medhāvī ca nṛpañjayaḥ
bṛhadratho haristigmaḥ śatānīkaḥ sudānakaḥ
- 4
उदानो ऽह्निनरश्चैव दण्डपाणिर्निमित्तकः
क्षेमकश्च ततः शूद्रः पिता पूर्वस्ततः सुतः
udāno 'hninaraścaiva daṇḍapāṇirnimittakaḥ
kṣemakaśca tataḥ śūdraḥ pitā pūrvastataḥ sutaḥ
- 5
बृहद्बलास्तु कथयन्ते नृपाश्चैक्ष्वाकुवंशजाः
बृहद्बलादुरुक्षयो वत्सव्यूहस्ततः परः
bṛhadbalāstu kathayante nṛpāścaikṣvākuvaṃśajāḥ
bṛhadbalādurukṣayo vatsavyūhastataḥ paraḥ
- 6
वत्सव्यूहात्ततः सूर्यः सहदेवस्तदात्मजः
बृहदश्वो भानुरथः प्रतीच्यश्च प्रतीतकः
मनुदेवः सुनक्षत्रः किन्नरश्चान्तरिक्षकः
vatsavyūhāttataḥ sūryaḥ sahadevastadātmajaḥ
bṛhadaśvo bhānurathaḥ pratīcyaśca pratītakaḥ
manudevaḥ sunakṣatraḥ kinnaraścāntarikṣakaḥ
- 7
सुपर्णः कृतजिच्चैव बृहद्भ्राजश्च धार्मिकः
कृतञ्जयो धनञ्जयः संजयः शाक्य एव च
suparṇaḥ kṛtajiccaiva bṛhadbhrājaśca dhārmikaḥ
kṛtañjayo dhanañjayaḥ saṃjayaḥ śākya eva ca
- 8
शुद्धोदनो बाहुलश्च सेनजित्क्षुद्रकस्तथा
सुमित्रः कुडवश्चातः सुमित्रान्मागधाञ्छृणु
śuddhodano bāhulaśca senajitkṣudrakastathā
sumitraḥ kuḍavaścātaḥ sumitrānmāgadhāñchṛṇu
- 9
जरासन्धः सहदेवः सोमापिश्च श्रुतश्रवाः
अयुतायुर्निरमित्रः सुक्षत्रो बहुकर्मकः
jarāsandhaḥ sahadevaḥ somāpiśca śrutaśravāḥ
ayutāyurniramitraḥ sukṣatro bahukarmakaḥ
- 10
श्रुतंजयः सेनजिच्च भूरिश्चैव शुचिस्तथा
क्षेम्यश्च सुव्रतो धर्मः श्मश्रुलो दृढसेनकः
śrutaṃjayaḥ senajicca bhūriścaiva śucistathā
kṣemyaśca suvrato dharmaḥ śmaśrulo dṛḍhasenakaḥ
- 11
सुमतिः सुबलो नीतो सत्यजिद्विश्वजित्तथा
इषुंजयश्च इत्येते नृपा बार्हद्रथाः स्मृताः
sumatiḥ subalo nīto satyajidviśvajittathā
iṣuṃjayaśca ityete nṛpā bārhadrathāḥ smṛtāḥ
- 12
अधर्मिष्ठाश्च शूद्राश्च भविष्यन्ति नृपास्ततः
स्वर्गादिकृद्धि भगवान्साक्षान्नारायणो ऽव्ययः
adharmiṣṭhāśca śūdrāśca bhaviṣyanti nṛpāstataḥ
svargādikṛddhi bhagavānsākṣānnārāyaṇo 'vyayaḥ
- 13
नैमित्तिकः प्राकृतिकस्तथैवात्यन्तिको लयः
याति भूः प्रलयं चाप्सु ह्यापस्तेजसि पावकः
naimittikaḥ prākṛtikastathaivātyantiko layaḥ
yāti bhūḥ pralayaṃ cāpsu hyāpastejasi pāvakaḥ
- 14
वायौ वायुश्च वियति त्वाकाशौ यात्यहङ्कृतौ
अहं बुद्धौ मतिर्जोवे जीवो ऽव्यक्ते तदात्मनि
vāyau vāyuśca viyati tvākāśau yātyahaṅkṛtau
ahaṃ buddhau matirjove jīvo 'vyakte tadātmani
- 15
आत्मा परेश्वरो विष्णुरेको नारायणो नरः
अविनाश्यपरं सर्वं जगत्स्वर्गादि नाशि हि
ātmā pareśvaro viṣṇureko nārāyaṇo naraḥ
avināśyaparaṃ sarvaṃ jagatsvargādi nāśi hi
- 16
नृपादयो गता नाशमतः पापं विवर्जयेत्
धर्मं कुर्यात्स्थिरं येन पापं हित्वा हरिं व्रजेत्
nṛpādayo gatā nāśamataḥ pāpaṃ vivarjayet
dharmaṃ kuryātsthiraṃ yena pāpaṃ hitvā hariṃ vrajet
- 17
इति श्रीगारुडे महापुराणे पूर्वखण्डे प्रथमांशाख्ये आचारकाण्डे भविष्यराजवंशदृ नामैकचत्वारिंशदुत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe bhaviṣyarājavaṃśadṛ nāmaikacatvāriṃśaduttaraśatatamo 'dhyāyaḥ

