12 shlokas
- 1
ब्रह्मोवाच
हरिवंशं प्रवक्ष्यामि कृष्णमाहात्म्यमुत्तमम्
वसुदेवात्तु देवक्यां वासुदेवो बलो ऽभवत्
brahmovāca
harivaṃśaṃ pravakṣyāmi kṛṣṇamāhātmyamuttamam
vasudevāttu devakyāṃ vāsudevo balo 'bhavat
- 2
धर्मादिरक्षणार्थाय ह्यधर्मादिविनष्टये
कृष्णः पीत्वा स्तनौ गाढं पूतनामनयत्क्षयम्
dharmādirakṣaṇārthāya hyadharmādivinaṣṭaye
kṛṣṇaḥ pītvā stanau gāḍhaṃ pūtanāmanayatkṣayam
- 3
शकटः परिवृत्तो ऽथ भग्नौ च यमलार्जुनौ
दमितः कालियो नागो धेनुको विनिपातितः
śakaṭaḥ parivṛtto 'tha bhagnau ca yamalārjunau
damitaḥ kāliyo nāgo dhenuko vinipātitaḥ
- 4
धृतो गोवर्धनः शैल इन्द्रेण परिपूजितः
भारावतरणं चक्रे प्रतिज्ञां कृतवान्हरिः
dhṛto govardhanaḥ śaila indreṇa paripūjitaḥ
bhārāvataraṇaṃ cakre pratijñāṃ kṛtavānhariḥ
- 5
रक्षणायार्जुनादेश्च ह्यरिष्टादिर्निपातितः
केशी विनिहतो दैत्यो गोपाद्याः परितोषिताः
rakṣaṇāyārjunādeśca hyariṣṭādirnipātitaḥ
keśī vinihato daityo gopādyāḥ paritoṣitāḥ
- 6
चाणूरो मुष्टिको मल्लः कंसो मञ्चान्निपातितः
रुक्मिणीसत्यभामाद्याः ह्यष्टौ पत्न्यो हरेः पराः
cāṇūro muṣṭiko mallaḥ kaṃso mañcānnipātitaḥ
rukmiṇīsatyabhāmādyāḥ hyaṣṭau patnyo hareḥ parāḥ
- 7
षोडश स्त्रीसहस्राणि ह्यन्यान्यास महात्मनः
तासां पुत्राश्च पौत्राद्याः शतशो ऽथ सहस्रशः
ṣoḍaśa strīsahasrāṇi hyanyānyāsa mahātmanaḥ
tāsāṃ putrāśca pautrādyāḥ śataśo 'tha sahasraśaḥ
- 8
रुक्मिण्यां चैव प्रद्युम्नो न्यवधीच्छम्बरं च यः
तस्य पुत्रो ऽनिरुद्धो ऽभूद् उषाबाणसुतापतिः
rukmiṇyāṃ caiva pradyumno nyavadhīcchambaraṃ ca yaḥ
tasya putro 'niruddho 'bhūd uṣābāṇasutāpatiḥ
- 9
हरिशकरयोर्यत्र महायुद्धं बभूव ह
बाणबाहुसहस्रं च छिन्नं बाहुद्वयं ह्यभूत्
hariśakarayoryatra mahāyuddhaṃ babhūva ha
bāṇabāhusahasraṃ ca chinnaṃ bāhudvayaṃ hyabhūt
- 10
नरको निहतो येन पारिजातं जहार यः
बलश्च शिशुपालश्च हतश्च द्विविदः कपिः
narako nihato yena pārijātaṃ jahāra yaḥ
balaśca śiśupālaśca hataśca dvividaḥ kapiḥ
- 11
अनिरुद्धादभूद्वज्रः स च राजा गते हरौ
संदीपनिं गुरुं चक्रे सपुत्रं च चकार सः
मथुरायां चोग्रसेनं पालनं च दिवौकसाम्
aniruddhādabhūdvajraḥ sa ca rājā gate harau
saṃdīpaniṃ guruṃ cakre saputraṃ ca cakāra saḥ
mathurāyāṃ cograsenaṃ pālanaṃ ca divaukasām
- 12
इति श्रीगारुडे महापुराणे पूर्वखण्डे प्रथमांशाख्ये आचारकाण्डे हरिवंशवर्णनं नाम चतुश्चात्वारिंशदुत्तरशततमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe harivaṃśavarṇanaṃ nāma catuścātvāriṃśaduttaraśatatamo 'dhyāyaḥ

