79 shlokas
- 1
हरिरुवाच
सूर्यस्य कथितो वंशः सोमवंशं शृणुष्व मे
नारायणसुतो ब्रह्मा ब्रह्मणो ऽत्रेः समुद्भवः
hariruvāca
sūryasya kathito vaṃśaḥ somavaṃśaṃ śṛṇuṣva me
nārāyaṇasuto brahmā brahmaṇo 'treḥ samudbhavaḥ
- 2
अत्रेः सोमस्तस्य भार्या तारा सुरगुरोः प्रिया
सोमात्तारा बुधं जज्ञे बुधपुत्रः पुरूरवाः
atreḥ somastasya bhāryā tārā suraguroḥ priyā
somāttārā budhaṃ jajñe budhaputraḥ purūravāḥ
- 3
बुधपुत्रादथोर्वश्यां षट्पुत्रास्तु श्रुतात्मकः
विश्वावसुः शतायुश्च आयुर्धोमानमावसुः
budhaputrādathorvaśyāṃ ṣaṭputrāstu śrutātmakaḥ
viśvāvasuḥ śatāyuśca āyurdhomānamāvasuḥ
- 4
अमावसोर्भीमनामा भीमपुत्रश्च काञ्चनः
काञ्चनस्य सुहोत्रो ऽभूज्जह्नुश्चाभूत्सुहोत्रतः
amāvasorbhīmanāmā bhīmaputraśca kāñcanaḥ
kāñcanasya suhotro 'bhūjjahnuścābhūtsuhotrataḥ
- 5
जह्नोः सुमन्तुरभवत्सुमन्तोर् अपजापकः
बलाकाश्वस्तस्य पुत्रो बलाकाश्वात्कुशः स्मृतः
jahnoḥ sumanturabhavatsumantor apajāpakaḥ
balākāśvastasya putro balākāśvātkuśaḥ smṛtaḥ
- 6
कुशाश्वः कुशनाभश्चामूर्तरयो वसुः कुशात्
गाधिः कुशाश्वात्संजज्ञे विश्वामित्रस्तदात्मजः
kuśāśvaḥ kuśanābhaścāmūrtarayo vasuḥ kuśāt
gādhiḥ kuśāśvātsaṃjajñe viśvāmitrastadātmajaḥ
- 7
कन्या सत्यवती दत्ता ऋचीकाय द्विजाय सा
ऋचीकाज्जमदग्निश्च रामस्तस्याभवत्सुतः
kanyā satyavatī dattā ṛcīkāya dvijāya sā
ṛcīkājjamadagniśca rāmastasyābhavatsutaḥ
- 8
विश्वामित्राद्देवरातमदुच्छन्दादयः सुताः
आयुषो नहुषस्तस्मादनेना रजिरम्भकौ
viśvāmitrāddevarātamaducchandādayaḥ sutāḥ
āyuṣo nahuṣastasmādanenā rajirambhakau
- 9
क्षत्रवृद्धः क्षत्त्रवृद्धात्सुहोत्रश्चाभवन्नृपः
काश्यकाशौ गृत्समदः सुहोत्रादभवंस्त्रयः
kṣatravṛddhaḥ kṣattravṛddhātsuhotraścābhavannṛpaḥ
kāśyakāśau gṛtsamadaḥ suhotrādabhavaṃstrayaḥ
- 10
गृत्समदाच्छौनको ऽभूत्काश्याद्दीर्घतमास्तथा
वैद्यो धन्वन्तरिस्तस्मात्केतुमांश्च तदात्मजः
gṛtsamadācchaunako 'bhūtkāśyāddīrghatamāstathā
vaidyo dhanvantaristasmātketumāṃśca tadātmajaḥ
- 11
भीमरथः केतुमतो दिवोदासस्तदात्मजः
दिवोदासात्प्रतर्दनः शत्रुजित्सो ऽत्र विश्रुतः
bhīmarathaḥ ketumato divodāsastadātmajaḥ
divodāsātpratardanaḥ śatrujitso 'tra viśrutaḥ
- 12
ऋतध्वजस्तस्य पुत्रो ह्यलर्कश्च ऋतध्वजात्
अलर्कात्सन्नतिर्जज्ञे सुनीतः सन्नतेः सुतः
ṛtadhvajastasya putro hyalarkaśca ṛtadhvajāt
alarkātsannatirjajñe sunītaḥ sannateḥ sutaḥ
- 13
सत्यकेतुः सुनीतस्य सत्यकेतोर्विभुः सुतः
विभोस्तु सुविभुः पुत्रः सुविभोः सुकुमारकः
satyaketuḥ sunītasya satyaketorvibhuḥ sutaḥ
vibhostu suvibhuḥ putraḥ suvibhoḥ sukumārakaḥ
- 14
सुकुमाराद्धृष्टकेतुर्वीतिहोत्रस्तदात्मजः
वीतिहोत्रस्य भर्गो ऽभूद्भर्गभूमिस्तदात्मजः
sukumārāddhṛṣṭaketurvītihotrastadātmajaḥ
vītihotrasya bhargo 'bhūdbhargabhūmistadātmajaḥ
- 15
वैष्णवाः स्युर्महात्मान इत्येते काशयो नृपाः
पञ्चपुत्रशतान्यासन्रजेः शक्रेण संहृताः
vaiṣṇavāḥ syurmahātmāna ityete kāśayo nṛpāḥ
pañcaputraśatānyāsanrajeḥ śakreṇa saṃhṛtāḥ
- 16
प्रतिक्षत्रः क्षत्त्रवृद्धात्संजयश्च तदात्मजः
विजयः संजयस्यापि विजयस्य कृतः सुतः
pratikṣatraḥ kṣattravṛddhātsaṃjayaśca tadātmajaḥ
vijayaḥ saṃjayasyāpi vijayasya kṛtaḥ sutaḥ
- 17
कृताद्वृषधनश्चाभूत्सहदेवस्तदात्मजः
सहदेवाददीनो ऽभूज्जयत्सेनो ऽप्यदीनतः
kṛtādvṛṣadhanaścābhūtsahadevastadātmajaḥ
sahadevādadīno 'bhūjjayatseno 'pyadīnataḥ
- 18
जयत्सेनात्संकृतिश्च क्षत्त्रधर्मा च संकृतेः
यतिर्ययातिः संयातिर् आयातिर्विकृतिः क्रमात्
jayatsenātsaṃkṛtiśca kṣattradharmā ca saṃkṛteḥ
yatiryayātiḥ saṃyātir āyātirvikṛtiḥ kramāt
- 19
नहुषस्य सुताः ख्याता ययातेर्नृपतेस्तथा
यदुं च तुर्वसुं चैव देवयानी व्यजायत
nahuṣasya sutāḥ khyātā yayāternṛpatestathā
yaduṃ ca turvasuṃ caiva devayānī vyajāyata
- 20
द्रुह्युं चानुं च पूरुं च शर्मिष्ठा वार्षपार्वणी
सहस्रजित्क्रोष्टुमना रघुश्चैव यदोः सुताः
druhyuṃ cānuṃ ca pūruṃ ca śarmiṣṭhā vārṣapārvaṇī
sahasrajitkroṣṭumanā raghuścaiva yadoḥ sutāḥ
- 21
सहस्रजितः शतजित्तस्माद्वै हयहैहयौ
अनरण्यो हयात्पुत्रो धर्मो हैहयतो ऽभवत्
sahasrajitaḥ śatajittasmādvai hayahaihayau
anaraṇyo hayātputro dharmo haihayato 'bhavat
- 22
धर्मस्य धर्मनेत्रो ऽभूत्कुन्तिर्वै धर्मनेत्रतः
कुन्तेर्बभूव साहञ्जिर्महिष्मांश्च तदात्मजः
dharmasya dharmanetro 'bhūtkuntirvai dharmanetrataḥ
kunterbabhūva sāhañjirmahiṣmāṃśca tadātmajaḥ
- 23
भद्रश्रेण्यस्तस्य पुत्त्रो भद्रश्रेण्यस्य दुर्दमः
धनको दुर्दमाच्चैव कृतवीर्यश्च जानकिः
bhadraśreṇyastasya puttro bhadraśreṇyasya durdamaḥ
dhanako durdamāccaiva kṛtavīryaśca jānakiḥ
- 24
कृताग्निः कृतकर्मा च कृतौजाः सुमहाबलः
कृतवीर्यादर्जुनो ऽभूदर्जुनाच्छूरसेनकः
kṛtāgniḥ kṛtakarmā ca kṛtaujāḥ sumahābalaḥ
kṛtavīryādarjuno 'bhūdarjunācchūrasenakaḥ
- 25
जयध्वजो मधुः शूरो वृषणः पञ्च सव्रताः
जयध्वजात्तालजङ्घो भरतस्तालजङ्घतः
jayadhvajo madhuḥ śūro vṛṣaṇaḥ pañca savratāḥ
jayadhvajāttālajaṅgho bharatastālajaṅghataḥ
- 26
वृषणस्य मधुः पुत्त्रो मधोर्वृष्ण्यादिवंशकः
क्रोष्टोर्विजज्ञिवान्पुत्त्र आहिस्तस्य महात्मनः
vṛṣaṇasya madhuḥ puttro madhorvṛṣṇyādivaṃśakaḥ
kroṣṭorvijajñivānputtra āhistasya mahātmanaḥ
- 27
आहेर् उशङ्कुः संजज्ञे तस्य चित्ररथः सतः
शशबिन्दुश्चित्ररथात्पत्न्यो लक्षं च तस्य ह
āher uśaṅkuḥ saṃjajñe tasya citrarathaḥ sataḥ
śaśabinduścitrarathātpatnyo lakṣaṃ ca tasya ha
- 28
दशलक्षं च पुत्राणां पृथुकीर्त्यादयो वराः
पृथुकीर्तिः पृथुजयः पृथुदानः पृथुश्रवाः
daśalakṣaṃ ca putrāṇāṃ pṛthukīrtyādayo varāḥ
pṛthukīrtiḥ pṛthujayaḥ pṛthudānaḥ pṛthuśravāḥ
- 29
पृथुश्रवसो ऽभूत्तम उशनास्तमसो ऽभवत्
तत्पुत्रः शितगुर्नाम श्रीरुक्मकवचस्ततः
pṛthuśravaso 'bhūttama uśanāstamaso 'bhavat
tatputraḥ śitagurnāma śrīrukmakavacastataḥ
- 30
रुक्मश्च पृथुरुक्मश्च ज्यामघः पालितो हरिः
श्रीरुक्मकवचस्यैते विदर्भो ज्यामघात्तथा
rukmaśca pṛthurukmaśca jyāmaghaḥ pālito hariḥ
śrīrukmakavacasyaite vidarbho jyāmaghāttathā

