19 shlokas
- 1
हरिरुवाच
सप्तमोपचयाद्यस्थश्चन्द्रः सर्वत्र शोभनः
शुक्लपक्षे द्वितीयस्तु पञ्चमो नवमस्तथा
hariruvāca
saptamopacayādyasthaścandraḥ sarvatra śobhanaḥ
śuklapakṣe dvitīyastu pañcamo navamastathā
- 2
सम्पूज्यमानो लोकैस्तु गुरुवद्दृश्यते शशी
चन्द्रस्य द्वादशावस्था भवन्ति शृणु ता अपि
sampūjyamāno lokaistu guruvaddṛśyate śaśī
candrasya dvādaśāvasthā bhavanti śṛṇu tā api
- 3
त्रिषु त्रिषु च ऋक्षेषु अश्विन्यादि वदाम्यहम्
प्रवासस्थं पुनर्दृष्टं मृतावस्थं जयावहम्
triṣu triṣu ca ṛkṣeṣu aśvinyādi vadāmyaham
pravāsasthaṃ punardṛṣṭaṃ mṛtāvasthaṃ jayāvaham
- 4
हास्यावस्थं नतावस्थं प्रमोदावस्थमेव च
विषादावस्थभोगस्थे ज्वरावस्थं व्यवस्थितम्
hāsyāvasthaṃ natāvasthaṃ pramodāvasthameva ca
viṣādāvasthabhogasthe jvarāvasthaṃ vyavasthitam
- 5
कम्पावस्थं सुखावस्थं द्वादशावस्थगं भवेत्
प्रवासो हानिमृन्यृ च जयो हासे ऽरतिः सुखम्
kampāvasthaṃ sukhāvasthaṃ dvādaśāvasthagaṃ bhavet
pravāso hānimṛnyṛ ca jayo hāse 'ratiḥ sukham
- 6
शोको भोगो ज्वरः कम्पः सुखं चेति क्रमात्फलम्
जन्मस्थः कुरुते तुष्टिं द्वितीये नास्ति निर्वृतिः
śoko bhogo jvaraḥ kampaḥ sukhaṃ ceti kramātphalam
janmasthaḥ kurute tuṣṭiṃ dvitīye nāsti nirvṛtiḥ
- 7
तृतीये राजसंमानं चतुर्थे कलहागमः
पञ्चमेन मृगाङ्केन स्त्रीलाभो वै तथा भवेत्
tṛtīye rājasaṃmānaṃ caturthe kalahāgamaḥ
pañcamena mṛgāṅkena strīlābho vai tathā bhavet
- 8
घनधान्यागमः षष्ठे रतिः पूजा च सप्तमे
अष्टमे प्राणसन्देहो नवमे कोशसञ्चयः
ghanadhānyāgamaḥ ṣaṣṭhe ratiḥ pūjā ca saptame
aṣṭame prāṇasandeho navame kośasañcayaḥ
- 9
दशमे कार्यनिष्पत्तिर्ध्रुवमेकादशे जयः
द्वादशेन शशाङ्केन मृत्युरेव न संशयः
daśame kāryaniṣpattirdhruvamekādaśe jayaḥ
dvādaśena śaśāṅkena mṛtyureva na saṃśayaḥ
- 10
कृत्तिकादौ च पूर्वेण सप्तर्क्षाणि च वै व्रजेत्
मघादौ दक्षिणे गच्छेदनुराधादि पश्चिमे
kṛttikādau ca pūrveṇa saptarkṣāṇi ca vai vrajet
maghādau dakṣiṇe gacchedanurādhādi paścime
- 11
प्रशस्ता चोत्तरयात्रा धनिष्ठादिषु सप्तसु
अश्विनी रेवती चित्रा धनिष्ठा समलंकृतौ
praśastā cottarayātrā dhaniṣṭhādiṣu saptasu
aśvinī revatī citrā dhaniṣṭhā samalaṃkṛtau
- 12
मृगाश्विचित्रापुष्याश्च मूला हस्ता शुभाः सदा
कन्याप्रदाने यात्रायां प्रतिष्ठादिषु कर्मसु
mṛgāśvicitrāpuṣyāśca mūlā hastā śubhāḥ sadā
kanyāpradāne yātrāyāṃ pratiṣṭhādiṣu karmasu
- 13
शुक्रचन्द्रौ हि जन्मस्थौ शुभदौ च द्वितीयके
शशिज्ञशुक्रजीवाश्च राशौ राशौ चाथ तृतीयके
śukracandrau hi janmasthau śubhadau ca dvitīyake
śaśijñaśukrajīvāśca rāśau rāśau cātha tṛtīyake
- 14
भौममन्दशशाङ्कार्का बुधः श्रेष्ठश्चतुर्थके
शुक्रजीवौ पञ्चमे च चन्द्रकेतुसमाहितौ
bhaumamandaśaśāṅkārkā budhaḥ śreṣṭhaścaturthake
śukrajīvau pañcame ca candraketusamāhitau
- 15
मन्दाकारै च कुजः षष्ठे गुरुचन्द्रौ च सप्तमे
ज्ञशुक्रावष्टमे श्रेष्ठौ नवमस्थो गुरुः शुभः
mandākārai ca kujaḥ ṣaṣṭhe gurucandrau ca saptame
jñaśukrāvaṣṭame śreṣṭhau navamastho guruḥ śubhaḥ
- 16
अर्कार्किचन्द्रा दशमे ग्रहा एकादशे खिलाः
बुधो ऽथ द्वादशे चैव भार्गवः सुखदो भवेत्
arkārkicandrā daśame grahā ekādaśe khilāḥ
budho 'tha dvādaśe caiva bhārgavaḥ sukhado bhavet
- 17
सिंहेन मकरः श्रेष्ठः कन्यया मेष उत्तमः
तुलया सह मीनस्तु कुम्भेन सहकर्कटः
siṃhena makaraḥ śreṣṭhaḥ kanyayā meṣa uttamaḥ
tulayā saha mīnastu kumbhena sahakarkaṭaḥ
- 18
धनुषा वृषभः श्रेष्ठो मिथुनेन च वृश्चिकः
एतत्षडष्टकं प्रीत्यै भवत्येव न संशयः
dhanuṣā vṛṣabhaḥ śreṣṭho mithunena ca vṛścikaḥ
etatṣaḍaṣṭakaṃ prītyai bhavatyeva na saṃśayaḥ
- 19
इति श्रीगारुडे महापुराणे पूर्वखण्डे प्रथमांशाख्ये आचारकाण्डे ज्योतिःशास्त्रे ग्रहाणां शुभाशुभस्थानादिनिरूपणं नामैकषष्टितमो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe jyotiḥśāstre grahāṇāṃ śubhāśubhasthānādinirūpaṇaṃ nāmaikaṣaṣṭitamo 'dhyāyaḥ

