13 shlokas
- 1
हरिरुवाच
अथ योगं प्रवक्ष्यामि भुक्तिमुक्तिकरं परम्
ध्यायिभिः प्रोच्यते ध्येयो ध्यानेन हरिरीश्वरः
hariruvāca
atha yogaṃ pravakṣyāmi bhuktimuktikaraṃ param
dhyāyibhiḥ procyate dhyeyo dhyānena harirīśvaraḥ
- 2
तच्छृणुष्व महेशान सर्वपापविनाशनम्
विष्णुः सर्वेश्वरो ऽनन्तः षड्भिर्भूपरिवर्जितः
tacchṛṇuṣva maheśāna sarvapāpavināśanam
viṣṇuḥ sarveśvaro 'nantaḥ ṣaḍbhirbhūparivarjitaḥ
- 3
वासुदेवो जगन्नाथो ब्रह्मात्मास्म्यहमेव हि
देहिदेहस्थितो नित्यः सर्वदेहविवर्जितः
vāsudevo jagannātho brahmātmāsmyahameva hi
dehidehasthito nityaḥ sarvadehavivarjitaḥ
- 4
देहधर्मविहीनश्च क्षराक्षरविवर्जितः
षड्विधेषु स्थितो द्रष्टा श्रोता घ्राता ह्यतीन्द्रियः
dehadharmavihīnaśca kṣarākṣaravivarjitaḥ
ṣaḍvidheṣu sthito draṣṭā śrotā ghrātā hyatīndriyaḥ
- 5
तद्धर्मरहितः स्रष्टा नामगोत्रविवर्जितः
मन्ता मनःस्थितो देवो मनसा परिवर्जितः
taddharmarahitaḥ sraṣṭā nāmagotravivarjitaḥ
mantā manaḥsthito devo manasā parivarjitaḥ
- 6
मनोधर्मविहीनश्च विज्ञानं ज्ञानमेव च
बोद्धा बुद्धिस्थितः साक्षी सर्वज्ञो बुद्धिवर्जितः
manodharmavihīnaśca vijñānaṃ jñānameva ca
boddhā buddhisthitaḥ sākṣī sarvajño buddhivarjitaḥ
- 7
बुद्धिधर्मविहीनश्च सर्वः सर्वगतो मनः
सर्वप्राणिविनिर्मुक्तः प्राणधर्मविवर्जितः
buddhidharmavihīnaśca sarvaḥ sarvagato manaḥ
sarvaprāṇivinirmuktaḥ prāṇadharmavivarjitaḥ
- 8
प्राणप्राणो महाशान्तो भयेन परिवर्जितः
अहङ्कारादिहीनश्च तद्धर्मपरिवर्जितः
prāṇaprāṇo mahāśānto bhayena parivarjitaḥ
ahaṅkārādihīnaśca taddharmaparivarjitaḥ
- 9
तत्साक्षी तन्नियन्ता च परमानन्दरूपकः
जाग्रत्स्वप्नसुषुप्तिस्थस्तत्साक्षी तद्विवर्जितः
tatsākṣī tanniyantā ca paramānandarūpakaḥ
jāgratsvapnasuṣuptisthastatsākṣī tadvivarjitaḥ
- 10
तुरीयः परमो धाता दृग्रूपो गुणवर्जितः
मुक्तो बुद्धो ऽजरो व्यापी सत्य आत्मास्म्यहं शिवः
turīyaḥ paramo dhātā dṛgrūpo guṇavarjitaḥ
mukto buddho 'jaro vyāpī satya ātmāsmyahaṃ śivaḥ
- 11
एवं ये मानवा विज्ञा ध्यायन्तीशं परं पदम्
प्राप्नुयुस्ते च तद्रूपं नात्र कार्या विचारणा
evaṃ ye mānavā vijñā dhyāyantīśaṃ paraṃ padam
prāpnuyuste ca tadrūpaṃ nātra kāryā vicāraṇā
- 12
इति ध्यानं समाख्यातं तव शङ्कर सुव्रत
पठेद्य एतत्सततं विष्णुलोकं स गच्छति
iti dhyānaṃ samākhyātaṃ tava śaṅkara suvrata
paṭhedya etatsatataṃ viṣṇulokaṃ sa gacchati
- 13
इति श्रीगारुडे महापुराणे पूर्वखण्डे प्रथमांशाख्ये आचारकाण्डे ध्यानयोगो नाम चतुर्दशो ऽध्यायः
iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe dhyānayogo nāma caturdaśo 'dhyāyaḥ

