45 shlokas
- 1
हरिरुवाच
नवव्यूहार्चनं वक्ष्ये यदुक्तं कश्यपाय हि
जीवमुत्क्षिप्य मूर्धन्यं नाभ्यां व्योम्नि निवेशयेत्
hariruvāca
navavyūhārcanaṃ vakṣye yaduktaṃ kaśyapāya hi
jīvamutkṣipya mūrdhanyaṃ nābhyāṃ vyomni niveśayet
- 2
ततोरम् इति बीजेन दहेद्भूतात्मकं वपुः
यमित्यनेन बीजेन तच्च सर्वं विनाशयेत्
tatoram iti bījena dahedbhūtātmakaṃ vapuḥ
yamityanena bījena tacca sarvaṃ vināśayet
- 3
लमित्यनेन बीजेन प्लावयेत्सचराचरम्
वमित्यनेन बीजेन चिन्तयेदमृतं ततः
lamityanena bījena plāvayetsacarācaram
vamityanena bījena cintayedamṛtaṃ tataḥ
- 4
ततो बुद्बुदमध्ये तु पीतवासाश्चतुर्भुजः
अहं मतस्तथात्मानं ध्यानेन परिचिन्तयेत्
tato budbudamadhye tu pītavāsāścaturbhujaḥ
ahaṃ matastathātmānaṃ dhyānena paricintayet
- 5
मन्त्रन्यासं ततः कुर्यात्त्रिविधं करदेहयोः
द्वादशाक्षरबीजेन उक्तबीजैरनन्तरम्
mantranyāsaṃ tataḥ kuryāttrividhaṃ karadehayoḥ
dvādaśākṣarabījena uktabījairanantaram
- 6
षडङ्गेन ततः कुर्यात्साक्षाद्येन हरिर्भवेत्
दक्षिणाङ्गुष्ठमारभ्य मध्याङ्गुष्ठं दले न्यसेत्
ṣaḍaṅgena tataḥ kuryātsākṣādyena harirbhavet
dakṣiṇāṅguṣṭhamārabhya madhyāṅguṣṭhaṃ dale nyaset
- 7
मध्ये बीजद्वयं न्यस्य न्यसेदङ्गे ततः पुनः
हृच्छिरसि शिखावर्मवक्क्राक्ष्युदहपृष्ठतः
madhye bījadvayaṃ nyasya nyasedaṅge tataḥ punaḥ
hṛcchirasi śikhāvarmavakkrākṣyudahapṛṣṭhataḥ
- 8
बाह्वोश्च करयोर्जान्वोः पादयोश्चापि विन्यसेत्
पद्माकारौ करौ कृत्वा मध्ये ऽङ्गुष्ठं निवेशयेत्
bāhvośca karayorjānvoḥ pādayoścāpi vinyaset
padmākārau karau kṛtvā madhye 'ṅguṣṭhaṃ niveśayet
- 9
चिन्तयेत्तत्र सर्वेशं परं तत्त्वमनामयम्
क्रमाच्चैतानि बीजानि तर्जन्यादिषु विन्यसेत्
cintayettatra sarveśaṃ paraṃ tattvamanāmayam
kramāccaitāni bījāni tarjanyādiṣu vinyaset
- 10
ततो मूर्धाक्षिवक्त्रेषु कण्ठे च हृदये तथा
नाभौ गुह्ये तथा जान्वोः पादयोर्विन्यसेत्क्रमात्
tato mūrdhākṣivaktreṣu kaṇṭhe ca hṛdaye tathā
nābhau guhye tathā jānvoḥ pādayorvinyasetkramāt
- 11
पाण्योः षडङ्गबीजानि न्यस्य काये ततो न्यसेत्
अङ्गुष्ठादिकनिष्ठान्तं विन्यसेद्बीजपञ्चकम्
pāṇyoḥ ṣaḍaṅgabījāni nyasya kāye tato nyaset
aṅguṣṭhādikaniṣṭhāntaṃ vinyasedbījapañcakam
- 12
करमध्ये नेत्रबीजम् अङ्गन्यासो ऽप्ययं क्रमः
हृदये हृदयं न्यस्य शिरः शिरसि विन्यसेत्
karamadhye netrabījam aṅganyāso 'pyayaṃ kramaḥ
hṛdaye hṛdayaṃ nyasya śiraḥ śirasi vinyaset
- 13
शिखायां तु शिखां न्यस्य कवचं सर्वतस्तनौ
नेत्रं नेत्रे विधातव्यम् अस्त्रं च करयोर्द्वयोः
śikhāyāṃ tu śikhāṃ nyasya kavacaṃ sarvatastanau
netraṃ netre vidhātavyam astraṃ ca karayordvayoḥ
- 14
तेनैव च दिशो बद्धा पूजाविधिमथाचरेत्
हृदये चिन्तयेत्पूर्वं योगपीठं समाहितः
tenaiva ca diśo baddhā pūjāvidhimathācaret
hṛdaye cintayetpūrvaṃ yogapīṭhaṃ samāhitaḥ
- 15
धर्मज्ञानं च वैराग्यमैश्वर्यं च यथाक्रमम्
आग्नेयादौ च पूर्वादावधर्मादींश्च विन्यसेत्
dharmajñānaṃ ca vairāgyamaiśvaryaṃ ca yathākramam
āgneyādau ca pūrvādāvadharmādīṃśca vinyaset
- 16
एभिः परिच्छन्नतनुं पीठभूतं तदात्मकम्
अनन्तं विन्यसेत्पश्चात्पूर्वकायोन्नतं स्थितम्
ebhiḥ paricchannatanuṃ pīṭhabhūtaṃ tadātmakam
anantaṃ vinyasetpaścātpūrvakāyonnataṃ sthitam
- 17
ततो विद्यात्सरोजातं दलाष्टसमदिग्दलम्
सिताब्जं शतपत्राढ्यं विप्रकीर्णोर्धकर्णिकम्
tato vidyātsarojātaṃ dalāṣṭasamadigdalam
sitābjaṃ śatapatrāḍhyaṃ viprakīrṇordhakarṇikam
- 18
ध्यात्वा वेदादिना पश्चात्सूर्यसोमानलात्मनाम्
मण्डलानि क्रमादेवमुपर्युपरि चिन्तयेत्
dhyātvā vedādinā paścātsūryasomānalātmanām
maṇḍalāni kramādevamuparyupari cintayet
- 19
ततः पूर्वादिदिक्संस्थाः शक्तीः केशवगोचराः
विमलाद्या न्यसेदष्टौ नवमीं कर्णिकागताम्
tataḥ pūrvādidiksaṃsthāḥ śaktīḥ keśavagocarāḥ
vimalādyā nyasedaṣṭau navamīṃ karṇikāgatām
- 20
एवं ध्यात्वा समभ्यर्च्य योगपीठमनन्तरम्
मनसावाह्य तत्रेशं हरिं शार्ङ्गं न्यसेत्पुनः
evaṃ dhyātvā samabhyarcya yogapīṭhamanantaram
manasāvāhya tatreśaṃ hariṃ śārṅgaṃ nyasetpunaḥ
- 21
हृदयादीनि पूर्वादिचतुर्दिग्दलयोगतः
मध्ये नेत्रं तु कोणेषु अस्त्रमन्त्रं न्यसेत्ततः
hṛdayādīni pūrvādicaturdigdalayogataḥ
madhye netraṃ tu koṇeṣu astramantraṃ nyasettataḥ
- 22
सङ्कर्षणादिबीजानि पूर्वादिक्रमयोगतः
द्वारि पूर्वे परे चैव वैनतेयं तु विन्यसेत्
saṅkarṣaṇādibījāni pūrvādikramayogataḥ
dvāri pūrve pare caiva vainateyaṃ tu vinyaset
- 23
सुदर्शनं सहस्रारं दक्षिणे द्वारि विन्यसेत्
श्रियं दक्षिणतो न्यस्य लक्ष्मीमुत्तरतस्तथा
sudarśanaṃ sahasrāraṃ dakṣiṇe dvāri vinyaset
śriyaṃ dakṣiṇato nyasya lakṣmīmuttaratastathā
- 24
द्वार्युत्तरे गदां न्यस्य शङ्खं कोणेषु विन्यसेत्
देवदक्षिणतः शार्ङ्गं वामे चैव सुधीर्न्यसेत्
dvāryuttare gadāṃ nyasya śaṅkhaṃ koṇeṣu vinyaset
devadakṣiṇataḥ śārṅgaṃ vāme caiva sudhīrnyaset
- 25
तद्वत्खड्गं तथा चक्रं न्यसेत्पार्श्वद्वयोर्द्वयम्
ततो ऽन्तर्लोकपालांश्च स्वदिग्भेदेन विन्यसेत्
tadvatkhaḍgaṃ tathā cakraṃ nyasetpārśvadvayordvayam
tato 'ntarlokapālāṃśca svadigbhedena vinyaset
- 26
वज्रादीन्यायुधान्येव तथैव विनिवेशयेत्
ऊर्ध्वं ब्रह्म तथानन्तमधश्च परिचिन्तयेत्
vajrādīnyāyudhānyeva tathaiva viniveśayet
ūrdhvaṃ brahma tathānantamadhaśca paricintayet
- 27
सर्वं ध्यात्वेति सम्पूज्य मुद्राः संदर्शयेत्ततः
अञ्जलिः प्रथमा मुद्रा क्षिप्रं देवप्रसाधनी
sarvaṃ dhyātveti sampūjya mudrāḥ saṃdarśayettataḥ
añjaliḥ prathamā mudrā kṣipraṃ devaprasādhanī
- 28
वन्दनी हृदयासक्तात्सार्धं दक्षिणतोन्नता
ऊर्धाङ्गुण्ठो वाममुष्टिर्दक्षिणाङ्गुष्ठबन्धनः
vandanī hṛdayāsaktātsārdhaṃ dakṣiṇatonnatā
ūrdhāṅguṇṭho vāmamuṣṭirdakṣiṇāṅguṣṭhabandhanaḥ
- 29
सव्यस्य तस्य चाङ्गुष्ठो यः स उद्धः प्रकीर्तितः
तिस्रः साधारणा ह्येता मूर्तिभेदेन कल्पिताः
savyasya tasya cāṅguṣṭho yaḥ sa uddhaḥ prakīrtitaḥ
tisraḥ sādhāraṇā hyetā mūrtibhedena kalpitāḥ
- 30
कनिष्ठादिप्रमोकेण अष्टौ मुद्रा यथाक्रमम्
अष्टानां पूर्वबीजानां क्रमशस्त्ववधारयेत्
kaniṣṭhādipramokeṇa aṣṭau mudrā yathākramam
aṣṭānāṃ pūrvabījānāṃ kramaśastvavadhārayet

